2002 ވަނަ އަހަރު ޤުޖަރަތްގައި މުސްލިމުންނާއި ދެކޮޅަށް ހިނގި ގަތުލުއާންމުތަކުގެ ފަހަތުގައިވާކަމަށް ތުހުމަތުކުރެވިފައިވާ އިންޑިއާގެ ބޮޑު ވަޒީރު ނަރެންދުރަ މޯދީގެ އަދި އޭރު ގުޖުރާތުގެ ޗީފް މިނިސްޓަރުގެ ހައިސިއްޔަތުން މޯދީ އަމަލުކުރިގޮތާއި ބެހޭ  ބީބީސީ ޑޮކިއުމެންޓްރީ އިންޑިއާގެ ސަރުކާރުން ހުއްޓުވާފިއެވެ.

އެގޮތުން މި ޑޮކިޔުމެންޓްރީއާއި ބެހޭ ވީޑިއޯތައް މީސް މީޑިއާ މެދުވެރިކޮށް ހިއްސާކުރުން ވެސް ވަނީ މަނާ ކޮށްފައެވެ.

މިކަމާއި ގުޅިގެން އިންޑިއާގެ ސަރުކާރުގެ ހާއްސަ މުޝީރު ކަަންޗާން ގުޕްތާ ކުރި ޓްވީޓެއްގައި ވިދާޅުވެފައި ވަނީ އެޤައުމުގެ އިންފޯމޭޝަން ޓެކްނޮލޮޖީގެ ގަވާއިދު ތަކާއި އެއްގޮތަށް ވަގުތީ ބާރުތައް ބޭނުން ކޮށްގެން ވީޑިއޯތައް ހިއްސާ ކުރުން ވަނީ މަނާ ކުރެވިފައި ކަމަށެއެވެ.

އަދި ބީބީސީ އިން މި ޑޮކިއުމެންޓްރީ ނުނެރުނު ނަމަވެސް މީސް މީޑިޔާގެ ޗެނަލްއެއް ކަމުގައިވާ ޔޫޓިޔުބް މެދުވެރިކޮށް ވީޑިއޯ އަޕްލޯޑް ކޮށްފައި ވާކަމަށް ޤުޕްތާ ވިދާޅުވިއެވެ.

މިކަމަާއި ގުޅިގެން ވީޑިއޯއަށް ލިންކް ކޮށް ފައިވާ 50 އަށް ވުރެ ގިނަ އަދަދެއްގެ ޓްވީޓްތަކާއި ޔޫޓިއުބްއަށް އަޕްލޯޑް ކުރެވިފައިވާ ވީޑިއޯތައް ބްލޮކް ކުރުމަށް ޓްވިޓާ އަދި ޔޫޓިޔުބް އަށް އިރުޝާދު ދެވިފައި ވާނެ ކަމަށް ވިދާޅުވެފައިވެއެވެ.

އަދި މި ދެ ކުންފުނިންވެސް މި އިރުޝާދު ތަކާއި އެއްގޮތަށް އަމަލު ކުރައްވާފައި ވާކަމަށް ވެސް ޤުޕްތާ ވިދާޅު ވެފައިވެއެވެ.

2002 ވަނަ އަހަރު ހިނގި މި މުޒާހަރާތަކުގައި 1000 އަށްވުރެ ގިނަ އަދަދެއްގެ މީހުން މަރުވެފާވާކަމަށް ސަރުކާރުގެ ތަފާސް ހިސާބު ތަކުން ދައްކާއިރު މީގެ ތެރޭގައި ގިނައީ މުސްލިމުން ކަމަށް ފާހަގަ ކުރެވެއެވެ. މި މުޒާހަރާތައް ހިނގި އިރު ޤުޖަރަތްގެ ޗީފް މިނިސްޓަރަކަށް އޭރު ހުންނެވީ މޯދީއެވެ. 

މޯދީއަކީ ހިންދޫންގެ ހަރުކަށި ފިކުރު ދިރުވައި މުސްލިމުންނާއި ދެކޮޅައް އަނިޔާވެރި އަމަލުތައް ހިންގާ އާރއެސްއެސްގެ އިސް މެންބަރެކެވެ. އަދި މޯދީ އިންޑިއާގެ މުސްލިމުންނާއި ދެކޮޅައް ހިންގާފައިވާ އަނިޔާވެރި ޖަރީމާތަކުގެ ސަބަބުން އޭނާ ވަނީ އިނގިރޭސި ވިލާތާއި އެމެރިކާއަށް އެރުން މަނާ ލިސްޓުގައި ލިސްޓުކުރެވިފައެވެ. މި ލިސްޓުން މޯދީގެ ނަން އުނިކުރެވިފައިވަނީ މޯދީ ބޮޑުވަޒީރުކަމުގެ ހުވާ ކުރުމާއި ގުޅިގެންނެވެ.