ކުރީގެ ރައީސް މުހައްމަދު ނަޝީދަށް ޕްރައިމަރީ އިންތިހާބު ކާމިޔާބު ވެއްޖެ ނަމަ ޕީޕީއެމްގެ އަނިޔާވެރި ޖައްބާރު ވެރިކަމަށް އަނެއްކާވެސް ފުރުސަތު ލިބިގެން ދާނެ ކަމަށް ރާއްޖޭގެ ޚާރިޖީ ވަޒީރު ޝާހިދު ވިދާޅުވެއްޖެއެވެ. 

ޝާހިދު މިހެން ވިދާޅުވީ، މިއަދު ކ. ގުރައިދޫގައި ކުރިއަށްދިޔަ ރައީސް ޞާލިހުގެ ކެމްޕޭން ޖަލްސާގައި ވާހަކަ ދައްކަވަމުންނެވެ.

ޝާހިދު ވިދާޅުވީ ކ. އަތޮޅުގެ ރަށްތަކަކީ މާލެ ސަރަހައްދުގެ ތަސައްވަރާއި ގުޅިފައިވާ ރަށްތަކެއް ކަމަށާ ރައީސް އިބްރާހިމް މުހައްމަދު ޞާލިހު ވެރިކަމަށް ވަޑައިގެންފަހުން އެ ރަށްތަކުގައި ތަރައްގީގެ ގިނަ މަޝްރޫއުތައް ފެށިފައިވާ ކަމަށެވެ. 

އަދި އެ އެންމެހައި ކަމެއް ކުރިއަށް ގެންގޮސް، ކ އަތޮޅުގެ ރަށްތަކުގެ ތަރައްޤީ ހުއްޓުމެއްނެތި ކުރިއަށްދާނީ ރައީސް ޞާލިހަށް ދެވަނަ ދައުރެއް ލިބިގެން ކަމަށްވެސް އޭނާ ވިދާޅުވި އެވެ.

މިއާއެކު ޝާހިދު ވަނީ ރައީސް ނަޝީދަށް ޕްރައިމަރީ ކާމިޔާބު ވެއްޖެ ނަމަ، ޕީޕީއެމްގެ އަނިޔާވެރި ޖައްބާރު ވެރިކަމަށް އަނެއްކާވެސް ފުރުސަތު ލިބިގެންދާނެ ކަމަށް ވިދާޅުވެފައެވެ.

“ދެން ހުންނެވި ކެންޑިޑޭޓަށް ފުރުސަތު ދެއްވައިފި ނަމަ އެއީ ޕީޕީއެމްގެ އަނިޔާވެރި ޖައްބާރު ވެރިކަމަށް އަނެއްކާވެސް ފުރުސަތު ލިބިގެން އެ ދަނީ. ތިބޭފުޅުން ތިބެން ޖެހޭނީ އަނެއްކާވެސް ގުރައިދޫގައި ބަންދުވެގެން. ގުރައިދޫގެ ބިންވެސް ވިއްކާލާނެ ބޭރުގެ މީހުންނަށް ގުރައިދޫގެ ބަނދަރުވެސް ވިއްކާލާނެ ބޭރުގެ މީހުންނަށް،” ޝާހިދު ވިދާޅުވިއެވެ.

އެހެންކަމުން ޝާހިދު ވަނީ އެ ފުރުސަތު ނުދެއްވުމަށް އެމްޑީޕީގެ މެންބަރުންގެ އަރިހުން އެދިވަޑައިގެންފައެވެ.