ވެރިކަންކުރާ މައި ޕާޓީ، އެމްޑީޕީގެ އެތެރޭގެ ޕްރައިމަރީގައި، އިދިކޮޅު ޕީޕީއެމަށް އެއްޗެހި ގޮވާނަމަ އެކަމަށް ރައްދު ދެއްވާނެ ކަމަށް ކުރީގެ އިސްލާމިކް މިނިސްޓަރު ޑރ.މުހައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 

ޕީޕީއެމްގެ ވެރިކަމަކީ ޖައްބާރު އަނިޔާވެރި ވެރިކަމެއް ކަމަށް ފޮރިން މިނިސްޓަރު ޝާހިދު ވިދާޅުވުމާއި ގުޅިގެން އެކަމަށް ރައްދު ދެއްވައި، ޑރ. ޝަހީމް ކުރެއްވި ޓްވީޓެއްގައި ވިދާޅުވީ، ޕީޕީއެމް އަކީ ކޮންމެ ދިމާއަކުން ބިނާކުރަނިވި ޚިދުމަތްތަކެއް ޤައުމަށް ކޮށްދީފައިވާ ޕާޓީއެއް ކަމަށެވެ. 

"ރައީސް ޔާމީން ގެ ވެރިކަމުގައި ޤާއިމުކުރި ބޮޑެތި ބިޔަ މަޝްރޫޢުތައް އެހުރީ ފެންނަން. ޝާހިދުމެން އެތެރޭގެ ޕްރައިމަރީގައި ޕީޕީއެމަށް އެއްޗެހި ގޮވަންޏާ ރައްދު ދެވޭނެ ވާހަކަ ދަންނަވަން." ޝާހިދު ޓެގް ކުރައްވައި ޝަހީމް ކުރެއްވި ޓުވީޓް ގައި ވިދާޅުވެފައިވެއެވެ. 

Advertisement

އިއްޔެ ކ. ގުރައިދޫގައި ކުރިއަށްދިޔަ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ޕްރައިމަރީގެ ކެމްޕޭން ބައްދަލުމުގައި ވާހަކަ ދައްކަވަމުން ޝާހިދު ވަނީ ރައީސް ޞާލިހާއި ޕްރައިމަރީގައި ވާދަކުރައްވާ އެމްޑީޕީގެ ރައީސް، މުހައްމަދު ނަޝީދަށް ޕްރައިމަރީ ކާމިޔާބު ވެއްޖެ ނަމަ، ޕީޕީއެމްގެ އަނިޔާވެރި ޖައްބާރު ވެރިކަމަށް އަނެއްކާވެސް ފުރުސަތު ލިބިގެންދާނެ ކަމަށް ވިދާޅުވެ، ޕީޕީއެމްގެ ވެރިކަމަށް ވަރަށް ބޮޑަށް ފާޑުވިދާޅުވެފައެވެ.

“ދެން ހުންނެވި ކެންޑިޑޭޓް (ރައީސް ނަޝީދު) އަށް ފުރުސަތު ދެއްވައިފި ނަމަ އެއީ ޕީޕީއެމްގެ އަނިޔާވެރި ޖައްބާރު ވެރިކަމަށް އަނެއްކާވެސް ފުރުސަތު ލިބިގެން އެ ދަނީ. ތިބޭފުޅުން ތިބެން ޖެހޭނީ އަނެއްކާވެސް ގުރައިދޫގައި ބަންދުވެގެން. ގުރައިދޫގެ ބިންވެސް ވިއްކާލާނެ ބޭރުގެ މީހުންނަށް ގުރައިދޫގެ ބަނދަރުވެސް ވިއްކާލާނެ ބޭރުގެ މީހުންނަށް،” ޝާހިދު ވިދާޅުވިއެވެ.