އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރަކަށް ހުންނެވި އަލީ ޞާލިހު ޓްރާންސްޕޯޓް އެންޑް އޭވިއާޝަންގެ ސްޓޭޓް މިނިސްޓަރަކަށް ބަދަލު ކުރައްވާފިއެވެ.

މިސަރުކާރު ހިންގާ ކޯލިޝަނުގައި ހިމެނެ ޖުމްހޫރީ ޕާޓީގެ ތަރުޖަމާނުގެ މަޤާމުގައި ހުންނެވި އަލީ ޞާލިހު ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރަކަށް ބަދަލުކުރީ މިދިޔަ ބުރާސްފަތި ދުވަހުއެވެ.

އެންމެ ފުރަތަމަ ޓެކްނޮލޮޖީ މިނިސްޓްރީގެ ސްޓޭޓް މިނިސްޓަރުގެ މަޤާމް އަދާ ކުރެއްވި އަލީ ޞާލިހް، އެ މިނިސްޓްރީ އުވާލާ މިނިސްޓްރީގެ މަސައްކަތްތައް އެންވަރަޔަމެންޓް މިނިސްޓްރީއަށް ބަދަލު ކުރުމުގެ ސަބަބުން، މިހާ ތަނަށް ހުންނެވީ އެންވަޔަރަމެންޓް މިނިސްޓްރީގެ ސްޓޭޓް މިނިސްޓާގެ މަޤާމްގައެވެ.

އަލި ޞާލިހަކީ މީޑިއާއި ގާތް ގުޅުމެއް ބާއްވާ ޓެކްނޮލޮޖީ އަދި އެެންވަޔަރަމެންޓް މިނިސްޓްރީގައި މީޑިއާއި ގުޅުން ހުރި މަސްއޫލިއްޔަތު އަދާކޮށްފައިވާ ބޭފުޅެކެވެ. މިކަމުގެ ސަބަބުން ބެލެވޭ ގޮތުގައި އޭނާއާއި ހަވާލު ކުރާނެ އެއް މަސައްކަތަކީ ޓްރާންސްޕޯޓް މިނިސްޓްރީގެ ޕަބްލިކް ރިލޭޝަންޝްގެ މަސައްކަތެވެ.

ޓްރާންސްޕޯޓް މިނިސްޓްރީއަކީ މީޑިއާއާ ވަރަށް ބީރައްޓެހި، އެތައް ބައެއްގެ ހިތްހަމަނުޖެހުން ޒަމާންތަކެއް ވަންދެން އޮތް ތަނެކެވެ. އަދިވެސް އާންމުންގެ މަގުބޫލް ކަމެއް އެމިނިސްޓްރީ އަކަށް ނުހޯދެއެވެ.

މިހާރު ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރުގެ ގޮތުގައި ދެބޭފުޅަކު ތިއްބަވާނެއެވެ. އެއީ އަހްމަދު ޒާހިރާއި އަލީ ޞާލިހްއެވެ.