ހދ ނޮޅިވަރަމު ގައި ޓާފު ދަނޑެއް ތަރައްޤީ ކުރުމުގެ މަސައްކަތަށް އެރަށަށް ގެންގޮސްފައި ހުރި ޓާފު ތަކުގައި ބަޔަކު ގަސްދުގައި ރޯކޮށްލައިފި ކަމަށް މިނިސްޓަރ އޮފް ޔޫތް އެންޑް ސްޕޯޓްސް އަހްމަދް މަޙްލޫފް ވިދާޅުވެއްޖެއެވެ.
މަޙްލޫފް ކުރައްވާފައިވާ ޓްވީޓެއްގައި ވިދާޅުވީ ޓާފް އެޅުމުގެ މަސައްކަތް ފެށުމަށް ދެދުވަހަށް ވެފައިވަނިކޮށް ބަޔަކު ގަސްދުގައި ޓާފް ތަކުގައި ރޯކޮށްލީ ކަމަށެވެ.
ވޮއިސް އަށް މައުލޫމާތު ދެއްވަމުން ނޮޅިވަރަމް ކައުންސިލް މެމްބަރ ނިޔާޝާ އަލީ ވިދާޅުވީ ރޭ ދަންވަރުގެ ވަގުތެއްގައި ބަޔަކު ޓާފް ތަކުގައި ރޯކޮށްލައި ފައި ވާކަމަށާއި އެތަކެތި ބޭނުން ނުކުރެވޭ ވަރަށް ހަލާކުވެފައި ވާކަމަށެވެ.
ނޮޅިވަރަމް ކައުންސިލްގެ ރައީސް ވިދާޅުވީ ބެލެވެނީ ބަޔަކު ގަސްދުގައި ކޮށްފައި އޮތް ކަމެއް ކަމަށެވެ. އަމިއްލަ ޒާތުގައި ރޯވާނެ ކަމަށް ލަފާ ނުކުރެވޭ ކަމަށާއި އެހިސާބު ކައިރީގައި އަލިފާނުގެ ހާދިސާއެއްވެސް ހިނގައިފައި ނުވާ ކަމަށެވެ.
މި ކަމާއި ގުޅިގެން މީހަކަށް އަނިޔާ ވެފައި ނުވާ ކަމަށާއި އަލިފާން ގަނޑު ނިއްވާ ލައިފައިވަނީ ޕޮލިހުންނާއި ކައުންސިލްގެ މަސައްކަތުންކަމަށް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
