ރާއްޖެ ޓްރާންސްޕޯޓް ލިންކް (އާރްޓީއެލް)ގެ ދަށުން ވިލިމާލޭގައި ދެމުންގެންދާ އީ.ވީ ބަހުގެ ޚިދުމަތުން މާދަމާއިން ފެށިގެން އަގުނަގާ ގޮތަށް އެމްޓީސީސީން ހަމަޖައްސައިފިއެވެ.

ކޮންމެ ދުވަހަކު 24 ގަޑިއިރު ލިބޭ މި ޚިދުމަތުގެ އަގަކީ -/5 ރުފިޔާއެވެ.

އެމްޓީސީސީން މައުލޫމާތު ދިން ގޮތުގައި އާރްޓީއެލް ވިލިމާލޭ ބަހުގެ ޚިދުމަތަށް 3 ގޮތަކަށް ފައިސާދެއްކޭނެއެވެ. އެއީ 

* އާރްޓީއެލް މޯބައިލް އެޕް ނުވަތަ ވެބްސައިޓް މެދުވެރިކޮށް ކިޔު.އާރް ޓިކެޓް ނަގައިގެން

* ކޮންކްޓެކްޓްލެސް މާސްޓަރކާރޑް އަދި ވިސާ ޑެބިޓް ކާރޑް ނުވަތަ ކްރެޑިޓް ކާރޑް މެދުވެރިކޮށް

* ބަހުން ކަރުދާސް ޓިކެޓް ގަނެގެން

ކަރުދާސް ޓިކެޓް ދޫކުރުން ހަމަޖެހިފައިވަނީ ބަހުގެ ތެރެއިންނެވެ. ޓަރމިނަލްތަކުން ބަހުގެ ޙިދުމަތުގައި

ބޭނުންކުރާ ކަރުދާސް ޓިކެޓް ގަނެވޭނެ އިންތިޒާމް ހަމަޖެހިފައި ނުހުންނާނެކަމަށް އެމްޓީސީސީން ވަނީ ހަނދާން ކޮށްދީފައެވެ.

"މިގޮތުން ބައްލަވައިގަންނަވާ ޓިކެޓުގެ ފައިސާ ލާނެ ޙާއްސަ ފޮއްޓެއް، ބަސްތެރޭގައި ބެހެއްޓިފައި ހުންނާނެއެވެ. ބަސް ތެރޭގައި ފައިސާ މާރުކުރެވޭނެ އިންތިޒާމް ހަމަޖެހިފައި ނެތުމާއެކު، ހުރިހާ ބޭފުޅުންވެސް ސީދާ ޓިކެޓުގެ އަގު ހަމަވާނެހެން ފައިސާ ގެންނެވެމަށް ދަންނަވަމެވެ." އެމްޓީސީސީގެ އިއުލާނުގައި ވެއެވެ.

ބަހުގައި ފައިސާ މާރުކުރެވެން ހަމަޖެހިފައި ނުވާ މައިގަނޑު ސަބަބަކީ، ކަސްޓަމަރުންގެ ވަގުތު ސަލާމަތް ކުރުމަށާއި، ބަހުގެ ޝެޑިއުލަށް ބުރުލެއް އެރިޔަ ނުދިނުމަށް ކަމަށާއި އަދި ކަރުދާސް ޓިކެޓް ގަނެވޭނެ އިންތިޒާމް ހަޖައްސާފައިވުމުގެ މައިގަނޑު މަޤްޞަދަކީ އިސް ރަށްވެހީންނަށް މި ޚިދުމަތް ބޭނުންކުރުމުގައި ފަސޭހަކޮށްދިނުން ކަމަށް އެމްޓީސީސީން ބުންޏެވެ.

މީގެ އިތުރުން އެމްޓީސީސީން ބުނީ ކިޔުއާރް ޓިކެޓް ނަގާނެ ގޮތުގެ ވީޑިއޯ، އެމްޓީސީސީގެ އާރްޓީއެލް ޔޫޓިއުބް ޗެނަލުންނާއި މީސް މީޑިއާގެ މަންސަތަކުގައި ޝާޢިޢު ކުރެވިފައި ހުންނާނެ ކަމަށާއި އަދި އާރްޓީއެލް ޓްރެވަލް އެޕް އެޕަލް އެޕް ސްޓޯރުންނާއި ގޫގުލް ޕްލޭ ސްޓޯރުން ހިލޭ ޑައުންލޯޑް ކުރެވެން ހުންނާނެ ކަމަށެވެ.

ޓްރައިއަލް މުއްދަތަށްފަހު، ޓިކެޓް ނަގައިގެން ދަތުރުކުރަން ފެށުނު ނަމަވެސް މި ޚިދުމަތް 65 އަހަރުން މަތީގެ މީހުންނަށާއި،

3 އަހަރުން ދަށުގެ ކުޑަކުދިންނަށް އައިޑީ ކާޑު ދެއްކެވުމުން ހިލޭ ލިބޭނެއެވެ.

އަދި ޚާއްސަ އެހީއަށް ބޭނުންވާ ފަރާތްތަކުން ނޭޝަނަލް ސޯޝަލް ޕްރޮޓެކްޝަން (އެންސްޕާ() އިން ދީފައިވާ ކާޑު ދެއްކުމުން ވެސް ހިލޭ ދަތުރު ކުރެވޭނެއެވެ. މީގެ އިތުރުން، ޔުނިފޯރމްގައި ތިބޭ ސްކޫލް ކުދިންނަށްވެސް ބަހުގައި ހިލޭ ދަތުރު ކުރެވޭނެއެވެ.

އާރްޓީއެލް ވިލިމާލޭ ބަހުގެ ރޫޓް މެޕް އާރޓީއެލް ވެބްސައިޓް އަދި ޓްރެވަލް އެޕް މެދުވެރިކޮށް ކަސްޓަމަރުންނަށް

ބައްލަވާލެވެން ހުންނާނެއެވެ.