އެޕަލް ކުންފުނީގެ ފުރަތަމަ ފަތްޖެހޭ ސްމާޓްފޯނު ކަމުގައިވާ އައިފޯން ޑުއޯއަށް ބޭނުންވާ ފަތްޖެހޭ އޯލެޑް ޕެނެލް ސެމްސަންގް ޑިސްޕްލޭ އިން ސަޕްލައި ކުރުމުގެ އެއްބަސްވުމެއްގެ ދަށުން ގާތްގަނޑަކަށް 1.25 ބިލިއަން ޑޮލަރުގެ އާމްދަނީއެއް އެ ކުންފުންޏަށް ލިބިދާނެ ކަމަށް ރިޕޯޓުތައް ބުނެފިއެވެ.

ޗައިނާގެ މަޝްހޫރު އިންސައިޑަރެއް ކަމުގައިވާ އިންސްޓެންޓް ޑިޖިޓަލް އާ ޙަވާލާދީ އެޕަލް އިންސައިޑާ އިން ރިޕޯޓުކޮށްފައިވާ ގޮތުގައި ކޮންމެ ޕެނެލެއް ގަތުމަށް ގާތްގަނޑަކަށް 250 ޑޮލަރު ދެއްކުމަށް އެޕަލް އިން ވަނީ އެއްބަސްވެފައެވެ. ފަސް މިލިއަން ޑިވައިސް ވިއްކައިފި ނަމަ ހަމައެކަނި މި އަހަރު ސެމްސަންގަށް 1.25 ބިލިއަން ޑޮލަރު ލިބޭނެ ކަމަށް އެ ރިޕޯޓުގައި ފާހަގަކޮށްފައިވެއެވެ.

ދެ ކުންފުނީގެ ދެމެދުގައި ސޮއިކޮށްފައި ވަނީ ތިން އަހަރު ދުވަހުގެ އެއްބަސްވުމެއް ކަމަށް ވެއެވެ. މި އެއްބަސްވުމުގެ ދަށުން އައިފޯން ޑުއޯ އަދި އޭގެ ފަހުން ނެރޭ ފަތްޖެހޭ މޮޑެލްތަކަށް ވެސް ޑިސްޕްލޭ ފޯރުކޮށްދޭނީ ހަމައެކަނި ސެމްސަންގުންނެވެ. އެހެންކަމުން މި މުހިންމު ބައި ސަޕްލައިކުރާ ހަމައެކަނި ފަރާތެއްގެ ގޮތުގައި ސެމްސަންގް ދެމިއޮންނާނެއެވެ.

250 ޑޮލަރުގެ އަގު ނިސްބަތް ވަނީ ހަމައެކަނި އެތެރޭގެ ޑިސްޕްލޭ ޕެނެލަށް ކަމަށާއި އެސެމްބްލީ ނުވަތަ ޓެސްޓިން ޚަރަދު އެ އަގުގައި ނުހިމެނޭ ކަމަށް ރިޕޯޓުތައް ބުނެއެވެ. އައިފޯން ޑުއޯގެ ވިއްކާ އަގު ފެށެނީ 1,999 ޑޮލަރުންނެވެ.

އެޕަލްގެ ފުރަތަމަ ފަތްޖެހޭ ފޯނުގެ ސަބަބުން ސެމްސަންގުގެ ފަތްޖެހޭ މޮޑެލްތަކާ ވާދަކުރަން ޖެހޭ ނަމަވެސް ޑިސްޕްލޭ ސަޕްލައިކުރާ ފަރާތެއްގެ ހައިސިއްޔަތުން ދެކުނު ކޮރެއާގެ އެ ކުންފުންޏަށް ބޮޑު ފައިދާއެއް ލިބޭނެ ކަމަށް ބެލެވެއެވެ.