ކުރިއަށް އޮތް ރިޔާސީ އިންތިޚާބަށް ޖުމްހޫރީ ޕާޓީއިން ނިންމަންޖެހޭ މުހިންމު ނިންމުންތައް ނިންމާ، ޕާޓީގެ ޕްލޭނުތައް އެކުލަވާލުމަށް ބާއްވާ އެ ޕާޓީގެ ގައުމީ ކޮންގްރެސް މި މަހުގެ 24 އަދި 25 ގައި ބޭއްވުމަށް ނިންމައިފި އެވެ. 

ޖުމްހޫރީ ޕާޓީގެ ތަރުޖަމާނު އަލީ ޞާލިހު ވޮއިސްއަށް ވަނީ އެކަން ކަށަވަރުކޮށްދީފަ އެވެ.

އަލީ ޞާލިހު ވިދާޅުވީ މި ކޮންފަރެންސްގައި ރާއްޖޭގެ އެކި ކަންކޮޅުތަކުން ގާތްގަނޑަކަށް 500 އާއި 700 އާއި ދެމެދުގެ އަދަދަކަށް މީހުން ބައިވެރިވާނެ ކަމަށެވެ. އަދި މި ކޮންފަރެންސްގައި ބައިވެރިވާނީ ޖޭޕީގެ އެކި އިންތިޚާބީ މަގާމުތަކުގައި ތިއްބަވާ މަންދޫބުންކަމަށް ޞާލިހު ވިދާޅުވި އެވެ. 

ޖުމްހޫރީ ޕާޓީއިން ވަނީ ކުރިއަށް އޮތް ރިޔާސީ އިންތިޚާބުގައި އެ ޕާޓީއިން ވާދަކުރާނެކަން އިއުލާނުކޮށްފަ އެވެ. އެހެން ނަމަވެސް އިންތިޚާބުގައި ވާދަކުރާނީ ޕާޓީއިން ވަކި ކެންޑިޑޭޓެއް ނެރެގެން ކަމެއް ނުވަތަ އެހެން ސިޔާސީ ޕާޓީއަކާއި އެކު ކޯލިޝަން ހަދައިގެން ކަމާމެދު އަދި ވަކި ގޮތެއް ކަނޑައަޅާފައެއް ނުވެއެވެ. 

އެކަމާއި ގުޅޭގޮތުން މީގެ ދުވަސްކޮޅެއް ކުރިން ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވީ ޖޭޕީއާއެކު ކޯލިޝަން ހަދަން ބޭނުންވާ ފަރާތްތަކަށް އަދި އެ ފުރުސަތު އޮތް ކަމަށެވެ.

އެހެން ނަމަވެސް އެކަންކަން ނިންމާނީ ޕާޓީގެ ކައުންސިލުން ކަމަށާއި، ކައުންސިލުން ނިންމާ ގޮތެއްގެ މައްޗަށް ރިޔާސީ އިންތިޚާބުގެ ކަންކަން ތަރުތީބުވެގެން ދާނެކަމަށް ގާސިމް ވިދާޅުވި އެވެ. 

ޖުމްހޫރީ ޕާޓީއަކީ ރާއްޖޭގައި އުފައްދާފައިވާ ސިޔާސީ ޕާޓީތަކުގެ ތެރެއިން ތިން ވަނައަށް އެންމެ ބޮޑު ޕާޓީއެވެ. އެގޮތުން އެ ޕާޓީގައި 18000 މެމްބަރުން ތިބެއެވެ. 

ޕާޓީއަށް މީހުން އިތުރު ކުރުމުގެ މަސައްކަތް ޖޭޕީއިން ކުރަމުންދާއިރު، އެ ޕާޓީއަކީ މިހާރު މިއޮތް ސަރުކާރުގެ އެންމެ ބޮޑު އެއް ހިއްސާދާރެވެ. 

އެއާއެކުވެސް 2023 ވަނަ އަހަރުގެ ރިޔާސީ އިންތިޚާބުގައި ޖޭޕީއިން ކުރިއަށް ދާނީ އެމްޑީޕީ ކޯލިޝަނާއި އެކުގައިކަން އަދި އޮތީ ކަނޑަނާޅައެވެ. ގަބޫލު ކުރެވޭގޮތުގައި މި ނިންމުން އެ ޕާޓީގެ ގައުމީ ކޮންގްރެސްގައި މަޝްވަރާކުރުމަށް ފަހު ނިންމާނެ އެވެ.