މަޖިލީހުގައި ތިބި ބައެއް މެންބަރުން ސަރުކާރުން ގާއިމްކުރަމުންދާ މެންޓަލް ހެލްތު ޑިޕާޓްމެންޓަށް ގެންދަން ފެންނަ ކަމަށް މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވިދާޅުވެއްޖެއެވެ.
ނަފްސާނީ ދުޅަހެޔޮކަން ކަށަވަރުކުރުމަށް ފަރުވާގެ ހަރުދަނާ ނިޒާމެއް ޤާއިމުކުރުމަށް ގޮވައިލާ ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރު ރިޔާޒު ހުށަހެޅުއްވި ޤަރާރަށް ބަހުސްކުރައްވަމުން ބޮންޑެ ވިދާޅުވީ 2012 ވަނަ އަހަރުގެ ފެބްރުއަރީ 7 ވަނަ ދުވަހު ރައީސް ނަޝީދުގެ ވެރިކަން ނިމުމަކަށް ގެނަ ފަހުން ރާއްޖެވަނީ ސިޔާސީ ގޮތުން ނަފްސާނީ ވެފައި ކަމަށެވެ.
"އެ ބަލިމަޑުކަމުން، އެނަފްސާނީ ބަލިމަޑުކަމުން މަސްހުނި މޮޑެގެން އަޅުގަނޑުމެން މި މަސައްކަތް ކުރަނީ މިތާތެރޭގައި. މި މަޖިލިސް ތެރޭގައި ވެސް އޮތީ އަދި މުޅި ރާއްޖޭގައި ވެސް އޮތީ ހަމަ އެ ވަބާ. އެ ނަފްސާނީ މައްސަލަތައް އަޅުގަނޑުމެން ކުރިމަތީގައި މިއޮތީ." ބޮންޑެ ވިދާޅުވިއެވެ.
މިއާއެކު ބޮންޑެ ވިދާޅުވީ، ފެބްރުއަރީ 7 ވަނަ ދުވަހުގެ "ބަޣާވާތުގެ" ސަބަބުން އެމްޑީޕީގެ ޕާލިމެންޓަރީ ގްރޫޕްގެ ތެރޭގައިވެސް ނަފްސާނީ ބަލިމަޑުކަމެއް އުފެދިފައިވާ ކަމަށެވެ. އެ ބަޣާވާތުގެ އަސަރެއްގެ މިސާލެއްގެ ގޮތުގައި ބޮންޑެ ފާހަގަކުރައްވާފައިވަނީ އޭނާއާމެދު ފިޔަވަޅުއަޅަން އެމްޑީޕީ ޕާލިމަންޓަރީ ގުރޫޕުން ނިންމި ނިންމުމެވެ.
"އަޅުގަނޑު މި މަޖިލީހުގައި ވޯޓެއް ދިނީ، ނުވަތަ ވިޕްލައިނާ ދެކޮޅަށް އަޅުގަނޑު ހުށަހެޅީ ދައުލަތުގެ ހަރަދުތަކާ ގުޅޭގޮތުން، ފާއިތުވީ އަހަރު ހުށަހަޅާފައިވާ ބަޖެޓް، އެ ބަޖެޓްގައި ތަފްސީލެއް ނެތް އަދަދުތަކެއް ފާހަގަ ކުރެވޭތީ އަޅުގަނޑު ހުށަހެޅި މައްސަލައެއް. އެމައްސަލައާއި ދެކޮޅަށް ޕާލިމެންޓަރީ ގްރޫޕުން ނެރެފައި އޮތް ވިޕްލައިނެއް އެއީ. އެވިޕްލައިނާ ދެކޮޅަށް އަޅުގަނޑު ވޯޓް ދިންކަމަށް ވަނީ. ކިހިނެތްތޯ އަޅުގަނޑު ހުށަހެޅި މައްސަލަ އަކާ ދެކޮޅަށް އަޅުގަނޑު ވޯޓްދޭނީ؟ އަޅުގަނޑު މައްސަލައެއް ހުށަހެޅީ ފޯދަ ރިކޮމެންޑޭޝަން. އަޅުގަނޑުވީ އަނެއްކާ ވިޕްލައިން ނެރުނީމަ އެވިޕްލައިނާ ދެކޮޅަށް ވޯޓްދޭން. އެ ދެމައްސަލަ އާއި އެދެވޯޓާއި އަދި އެކްސްޕޯޓް ކުރަން އެހުށަހެޅި މައްސަލައާ ގުޅިގެން މިހާރު މިއޮތީ ފިޔަވަޅުތަކެއް އަޅާފަ. އެހެންވީމަ މި ފުރަތަމަ ބަލިމަޑުކަން ފިލުވާލަން ޖެހެނީ އަޅުގަނޑުމެންގެ ތެރެއިން." ބޮންޑެ ވިދާޅުވިއެވެ.
މީގެ އިތުރުން ބޮންޑެ ވިދާޅުވީ މަޖިލީހުގެ ގިނަ މެންބަރުންނަކީ ނަޝީދުގެ ކޮނޑުފުޅު މަތީގައި މަޖިލީހަށް ވަދެވަޑައިގެންނެވި މެންބަރުން ކަމަށާ، އެހެންނަމަވެސް މިހާރު އެ މެންބަރުން އެކަން ހަނދާނެއް ނެތްކަމަށެވެ.
މިއާއެކު އޭނާ ވިދާޅުވީ ބަޔަކު އަމިއްލަ އަށް ފައިސާ އާއި ނުފޫޒް ބޭނުންކޮށްގެން ތިމާމެން ހޮވިގެން އެހެން މީހުންގެ މައްޗަށް އަމުރު ކޮށް ރައްޔިތުން ނިކަމެތި ކުރަމުން ދާތަން ފެންނަމުންދާ ކަމަށެވެ. ވުމާއެކު ސަރުކާރުން ގާއިމްކުރަމުންދާ މެންޓަލް ހެލްތު ޑިޕާޓްމެންޓަށް އެފަދަ މެމްބަރުން ގެންދަން ފެންނަ ކަމަށް އޭނާ ވިދާޅުވިއެވެ.
އެއްބަޔަކު އަނެއް ބަޔަކަށް، ތިމާމެން މާ ބާރުގަދަ ބައެއް ކަމަށް ވެގެން އަދިވެސް މިއުޅެނީ އޭގެތެރެއިން ނުނެއްޓިގެން. މި ނަފްސާނީ މި މައްސަލައާއި ގުޅިގެން، އަޅުގަނޑު އެދެން ހަމަ ހުރިހާ މެންބަރުން މި މެންޓަލް ހެލްތާއިބެހޭ ގޮތުން ޓެސްޓުކޮށް ކޮންކަހަލަ މައްސަލައެއްްތޯ މިއުޅެނީ ބަަލަން.
އިބްރާހީމް ރަޝީދު (ބޮންޑެ)
Advertisement
This content is created and paid for by advertisers and does not involve Voice Journalists
