ޖުމްހުރީ ޕާޓީގެ ލީޑަރު ގާސިމް އިބްރާހިމްގެ އެޑްވައިޒަރުގެ މަގާމަށް ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެމްބަރު އަހުމަދު ނިހާން ހުސެއިން މަނިކު އައްޔަންކޮށްފިއެވެ.

ނިހާން އައްޔަންކޮށްފައިވާކަން ޖޭޕީން މިއަދު ވަނީ އިއުލާންކޮށްފައެވެ. 

ނިހާންގެ އިތުރުން ގާސިމް އިބްރާހީމްގެ އެޑްވައިޒަރުންގެ ގޮތުގައި މިހާރު ތިއްބަވަނީ ދަނގެތި ދާއިރާގެ ކުރީގެ މެމްބަރު އިލްހާމް އަހުމަދާއި ވިލިފުށީ ދާއިރާގެ ކުރީގެ މެމްބަރު ރިޔާޒް ރަޝީދެވެ. 

Advertisement

ނިހާން ސިޔާސީ މައިދާނަށް ނުކުންނަވާފައިވަނީ ރައީސް މައުމޫން އަބްދުލްގައްޔޫމްއާއެކު ޑީއާރުޕީ އިންނެވެ. އެއަށްފަހު ޕީޕީއެމް އާ ގުޅިވަޑައިގެން، ރައީސް ޔާމީންގެ ވެރިކަމުގައި ޕީޕީއެމްގެ ޕާލިމެންޓްރީ ގްރޫޕްގެ ލީޑަރުގެ މަގާމުގައިވެސް ހުންނެވިއެވެ. ރައީސް ޔާމީންގެ ވެރިކަން ބަދަލުވުމުން 2019 ވަނަ އަހަރުގެ އޮގަސްޓްމަހު އޭނާ ވަނީ ޖުމްހޫރީ ޕާޓީއަށް ސޮއިކުރައްވާފައެވެ.

ޖޭޕީއާ ގުޅުނީ ޕާޓީގެ ލީޑަރު ގާސިމް އާއި އެ ޕާޓީ އެހެން ހަރުފަތަކަށް ގެންދިއުމަށް ކަމަށާއި ޕާޓީގެ އެއްވެސް މަގާމެއް ބޭނުންނުވާ ކަމަށް ޖޭޕީއަށް ގުޅިވަޑައިގަތުމަށްފަހު ނިހާން ވިދާޅުވެފައިވެއެވެ.

ގާސިމްގެ އެޑްވައިޒަރަކަށް ނިހާން އައްޔަނު ކޮށްފައިވާއިރު މިމަހު 23 ވަނަ ދުވަހު އޮންނަ އެ ޕާޓީގެ ކޮންގްރެސް ގައި ޕާޓީގެ ލީޑަރު ކަމުގެ މަޤާމާއި، ޑެޕިއުޓީ ލީޑަރުންގެ މަޤާމު އުވާލާ ޕާޓީގެ ރައީސަށް ހުރިހާ ބާރުތަކެއް ދިނުމަށް އިސްލާހު ހުށައެޅުމަށް ވަނީ ނިންމާފައެވެ. އަދި ޕާޓީގެ ރައީސަށް ލަފާދޭން 5 އެޑްވައިޒަރުންނާއި 5 ނައިބްރައީސުން އައްޔަން ކުރުމަށްވެސް އިސްލާހު ހުށައެޅުމަށް ވަނީ ނިންމާފައެވެ.