ނަޝީދުގެ ތާއީދު ގާސިމަށް ލިބިއްޖެނަމަ ރައީސް ޞާލިހު ދެވަނަ ބުރަށް ދަތުރެއް ނުކުރާނެ: ތާރިގު
ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ރައީސް މުހައްމަދު ނަޝީދު، ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ތާއީދުކުރައްވަން ނިންމަވައިފިކަމަށް ވާނަމަ، އެމްޑީީގެ ޓިކެޓު ލިބިލެއްވި ނަމަވެސް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އިންތިޚާބުގެ ދެވަނަ ބުރަށް ދަތުރު ނުކުރައްވާނެކަމަށް މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެ އެވެ.
ތާރިގު މިފަދައިން ވިދާޅުވެފައިވަނީ މިއަހަރު ބާއްވާ ރިޔާސީ އިންތިޚާބުގައި ގާސިމް ވާދަކުރައްވާނެކަން ދޭހަވާ މޭރުމަކުން ނަޝީދު ވާހަކަދެއްކެވުމާއި ގުޅިގެން އުފެދިފައިވާ ބަހުސްގައި ކުރެއްވި ޓްވީޓެއްގަ އެވެ.
ތާރިގު ވިދާޅުވީ ގާސިމް އިބްރާހިމަކީ ސިޔާސީ މައިދާނުގައި ރައީސް ޞާލިހަށްވުރެ ގިނަ ދުވަސްވީ ތަޖުރިބާކާރެއް ކަމަށެވެ. ގާސިމްއަކީ 1985 ވަނަ އަހަރުން ފެށިގެން އިސްލާހީ މަސައްކަތް ކުރައްވަމުން ގެންދަވާ ބޭފުޅެއްކަމަށް އޭނާ ވިދާޅުވި އެވެ.
ނިމިދިޔަ ރިޔާސީ އިންތިޚާބުގައި ގާސިމް އިބްރާހިމް ރައީސް ޞާލިހުގެ ފަހަތްޕުޅުގައި ހުންނެވީތީ ވެރިކަމަށް އާދަވުނު ނަމަވެސް އަބަދު ގާސިމް ހުންނަވާނީ ރައީސް ޞާލިހުގެ ފަހަތްޕުޅުގައިކަމަށް ގަބޫލުކޮށްގެން ނުވާނެކަމަށް ތާރިގު ވިދާޅުވި އެވެ.
ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު
"ޖޭޕީގެ ލީޑަރު ޤާސިމް އިބްރާހިމް އަކީ ރައީސް ސޯލިހަށްވުރެ ސީނިއަރ ޕޮލިޓީޝަނެކެވެ. 1985 ވަނަ އަހަރުންފެށިގެން އިސްލާހީ މަސައްކަތުގައި ދެމިހުރި ފަރާތެކެވެ. ހާލަތްތަކެއް މެދުވެރި، ނަސީބަކުން ވެރިކަމަށް އާދެވުމަކީ ކޮންމެފަހަރަކު ޤާސިމްގެ ތާއީދު ރައީސް ސޯލިހަށް ލިބޭނެކަމެއްނޫނެވެ"
މަހިބަދޫ ދާއިރާގެ މެމްބަރު އަހުމަދު ތާރިގު
ތާރިގު ވިދާޅުވީ ރައީސް ޞާލިހަށް އޮތީ ދެގޮތް ކަމަށެވެ. އެއްގޮތަކީ ރިޔާސީ އިންތިޚާބުގައި ދުރާލާ ގާސިމްގެ ފަހަތްޕުޅަށް ވަޑައިގަތުންކަމަށް ތާރިގު ވިދާޅުވިއެވެ. އެ ނޫންކަމަށް ވާނަމަ ދެން އޮތް ގޮތަކީ ދެވަނަ ބުރުގައި ގާސިމްގެ ފަހަތްޕުޅަށް ވަޑައިގަތުން ކަމަށް އޭނާ ވިދާޅުވިއެވެ.
އެއާއެކު ތާރިގު ވިދާޅުވީ ކުރިއަށް އޮތް ރިޔާސީ އިންތިޚާބުގައި ނަޝީދު ގާސިމަށް ތާއީދުކުރައްވަން ނިންމަވައިފިކަމަށް ވާނަމަ، ރައީސް ޞާލިހު ދެވަނަ ބުރަށްވެސް ނުދާނެކަމަށެވެ.
ޖޭޕީގެ ރައީސް ގާސިމް އިބްރާހިމާއި އެމްޑީޕީގެ ރައީސް މުހައްމަދު ނަޝީދު
"ރައީސް ނަޝީދުގެ ތާއީދު ޤާސިމްއަށް ލިބިއްޖެނަމަ ރައީސް ސޯލިހު ދެވަނަ ބުރަށް ދަތުރުކުރާނެކަމަށް ނުބެލެވެއެވެ"
މަހިބަދޫ ދާއިރާގެ މެމްބަރު އަހުމަދު ތާރިގު
ކުރިއަށް އޮތް ރިޔާސީ އިންތިޚާބަށް ސިޔާސީ ޕާޓީތަކުން ވަނީ ތައްޔާރުވާން ފަށައިފަ އެވެ.
ރިޔާސީ އިންތިޚާބަށް އެމްޑީޕީއިން ނެރޭނެ ކެންޑިޑޭޓެއް ކަނޑައެޅުމަށް ބޭއްވި ރިޔާސީ ޕްރައިމަރީ އިންތިޚާބުގައި ޕާޓީ ދެބައިވެ، ޕާޓީގެ ތެރޭގައި އުފެދުނު ދެ ފެކްޝަންގެ ތަޅާފޮޅުން ބޮޑުވެެފައިވާއިރު، މިހާތަނަށް ރިޔާސީ އިންތިޚާބު ކާމިޔާބުކުރުމަށް ރައީސް ޞާލިހުގެ ފަހަތްޕުޅަށް އަރާވަޑައިގަންނަވާނެ ކަމެއް ނަޝީދު ރަސްމީކޮށް އިއުލާނު ކުރައްވާފައެއް ނުވެއެވެ.
މި އިންތިޚާބުގައި ވާދަވެރި ސިޔާސީ ޕާޓީއިން ވާދަކުރައްވާނީ ރައީސް ޔާމީންކަމަށް އެ ޕާޓީއިން ބުނަމުންދާއިރު، އެމަނިކުފާނުގެ މައްޗަށް ވަނީ 11 އަހަރުގެ ޖަލު ހުކުމެއް އިއްވާފަ އެވެ. އަދި އެ މައްސަލަ ހައިކޯޓުގައި އިސްތިއުނާފުވެސް ކޮށްފައެއް ނުވެއެވެ.
އެއާއެކު ރާއްޖޭގެ ތިންވަނަ އަށް އެންމެ ބޮޑު ޕާޓީ ޖޭޕީއިންވެސް ދަނީ ތައްޔާރީތައް ވަމުންނެވެ. އެހެން ނަމަވެސް މިހާތަނަށް ރިޔާސީ އިންތިޚާބުގައި ޖޭޕީއިން ވަކި ކެންޑިޑޭޓެއް ނެރެގެން ވާދަކުރާނެކަން އިއުލާނުކޮށްފައެއް ނުވެއެވެ.
އެހެންކަމުން މިއަހަރު ބާއްވާ ރިޔާސީ އިންތިޚާބަކީ އެއްގޮތަށްވުރެ ގިނަ ގޮތްގޮތުން ތަފާތު އިންތިޚާބަކަށް ވެގެންދާނެކަމަށް ސިޔާސީ މަޝްރަހު ދިރާސާކުރައްވާ ފަރާތްތައް ދަނީ ވިދާޅުވަމުން ނެވެ.
Advertisement
This content is created and paid for by advertisers and does not involve Voice Journalists