ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުންތަކަށް ފަހު ސީރިޔާގެ ވެއްޓިފައިވާ އިމާރާތްތަކުގެ ދަށުގައި ތިބި މީހުން ސަލާމަތް ކުރުމަށް މަސައްކަތް ކުރަމުންދާ ވައިޓް ހެލްމެޓްސް އަށް އެހީވުމަށް ޤަޠަރުން އެހީފޮނުވައިފިއެވެ.
ޤަޠަރުން އެހީ ފޮނުވައިފައިވަނީ ހުޅަނގުއުތުރު ގައި މީހުން ސަލާމަތް ކުރުމަށް މަސައްކަތް ކުރަމުންދާ އެއިޑް ގްރޫޕަށެވެ. އެހީގެ ގޮތުގައި ފޮނުވި ތަކެތީގެ ތެރޭގައި ހިމެނެނީ އެމްބިޔުލާންސް މަރާމާތު ކުރުމަށް ބޭނުންވާނެ ސާމާނާއި ހެވީލޯޑް ވެހިކަލް ތައް ދުއްވާ ހެދުމަށް ބޭނުންވާނެ ފިޔުލް ފަދަ ތަކެއްޗެވެ.
"މިކަމުގައި ހުރަސްކުރަން އޮތް މަގު ދިގު، އެކަމަކު މިދަތި ހާލަތުގައި ޤަޠަރުގެ އެހީއާއި ނުލައި މިކަމާއި ކުރިމަތިލުމަކީ ދަތިކަމެއް،" ވައިޓް ހެލްމެޓުން ޓްވިޓާގައި ބުނެފައިވެއެވެ.
ވައިޓް ހެލްމެޓަކީ ސީރިޔާގައި ކާރިސާ ތަކުގައި އެކިއެކި އެހީފޯރުކޮށްދީ މީހުން ސަލާމަތް ކުރުމަށް އެކުލަވައިލެވިފައިވާ 3000 ދަރުމަވެރިންގެ ގްރޫޕެކެވެ.
ހޮނިހިރު ދުވަހު ވައިޓް ހެލްމެޓުން ބުނީ ބުރާސްފަތި ދުވަހުގެ ފަހުން އެއްވެސް މީހަކު ދިރިއޮއްވައި ކޮންކްރިޓް ތަކުގެ ދަށުން ސަލާމަތްކުރެވިފައި ނުވާކަމަށާއި މުޅިންވެސް ނެރެވިފައިވަނީ މަރުވެފައިވާ މީހުންގެ ހަށިތައް ކަމަށެވެ.
ޔުނައިޓެޑް އަރަބި އެމިރޭޓްސް އިން ވެސް ވަނީ ސީރީޔާ އަށް އެހީ ފޮނުވައިފައެވެ. އެކަމަށްޓަކައި ސީރިޔާގެ ރައީސް ބައްޝާރުލް އަސަދް ވަނީ އެޤައުމުގެ ސަރުކާރަށް ޝުކުރުއަދާކޮށްފައެވެ.
"ޔޫއޭއީ އަކީ އެންމެ ފުރަތަމަ ސީރިޔާއަށްޓަކައި ތެދުވި ޤައުމުތަކުގެ ތެރެއިން އެއް ޤައުމު، އެމަޖެންސީ އެއިޑާއި އިންސާނީ އެހީ އަދި ރެސްކިޔު ޓީމު ވަނީ ފޮނުވައިފައި" ދަމަސްކަސް ގައި އިމާރާތުގެ ފޮރިންގ މިނިސްޓަރ ޝެއިޙް ޢަބްދުﷲ ބިން ޒައިދް އަލް ނަހްޔާން އާއި އެކު ބޭއްވި ބައްދަލުވުމެއްގައި ބައްޝާރުލް އަސަދު ބުނެފައިވެއެވެ.
Advertisement
This content is created and paid for by advertisers and does not involve Voice Journalists
