ދުނިޔޭގެ ބައެއް ގައުމުތަކެކޭ ވެސް އެއްގޮތަށް މަސްތުވާތަކެތި އެތެރެކޮށް ވިޔަފާރި ކުރާ މީހުންނަށް މަރުގެ އަދަބު ދެވޭނެ ގޮތްތަކެއް މަޖިލީހުން ހޯދުމަށް މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުالله (މޮސްޓާ) ގޮވާލައްވައިފި އެވެ.
މޮސްޓާ މިފަދައިން ވިދާޅުވެފައި ވަނީ މަސްތުވާތަކެތި އެތެރެކުރާ ބިދޭސީން ފޮނުވާލެވޭގޮތަށް އެކުލަވާލާފައިވާ ގަވައިދު އިސްލާހުކުރުމަށް ގޮވާލާ މަޖިލީހަށް ހުށައެޅި ކުއްލި މައްސަލައަށް ބަހުސް ކުރައްވަމުން ނެވެ.
މަސްތުވާތަކެތި އެތެރެކުރާ މީހުންނަށް ދުނިޔޭގެ ބޮޑެތި ގައުމުތަކުގައި ކަނޑައަޅާފައިވާ އަދަބުތަކުން މިސާލު ނަންގަވަމުން މޮސްޓާ ވިދާޅުވީ އެންމެ ތަހުޒީބު ގައުމުތަކުގައިވެސް މަސްތުވާ ތަކެތި އެތެރެކުރާ މީހުންނަށް މަރުގެ އަދަބު ތަންފީޒު ކުރާ ކަމަށެވެ.
އެގޮތުން ސައުދިއަރަބިއްޔާ އަދި ސިންގަޕޫރު ފަދަ ގައުމުތަކުގައި ވެސް އެކަން އެގޮތަށް ކުރަމުންދާކަން އޭނާ ފާހަގަކުރެއްވި އެވެ.
މޮސްޓާ ވިދާޅުވީ މަސްތުވާ ތަކެތި އެތެރެކުރާ މީހުންނަށް އެކަށީގެންވާ އަދަބުތަކެއް ތަންފީޒު ކުރެވިގެން ނޫން ގޮތަކަށް އެކަންކަން ހައްލު ނުކުރެވޭނެ ކަމަށެވެ. އެހެންކަމުން ރާއްޖެއަށް މަސްތުވާތަކެތި އެތެރެކުރާ ފަރާތްތަކަށް މަރުގެ އަދަބު ތަންފީޒުކުރުމަށް ގަވައިދެއް ހެދުމުމުގެ މަސައްކަތް ކުރުމަށް މަޖިލީހުން އިސްނެގުމަށް މޮސްޓާ ވަނީ އެދިލައްވާފަ އެވެ.
"ދުނިޔޭގައިވެސް ބޮޑެތި އަދަދުތަކުން މަސްތުވާތަކެތި އެތެރެކުރީމަ މަރުގެ ހުކުމް އެބަ އިއްވާ. ސިންގަޕޫރު ތަންތާގައިވެސް މަރުގެ ހުކުމް އިއްވަނީ، ސައުދީއަރަބިއްޔާގަވެސް މަރުގެ ހުކުމް. ކީއްވެބާއޭ؟ ސިންގަޕޫރަކީ އިސްލާމީ ގައުމެއް ނޫން. ސައުދިއަރަބިއްޔާއަކީ އިސްލާމީ ގައުމެއް... މިތަނަކީ އިސްލާމީ ގައުމެއްގެ ނަމުގައި އިސްލާމީ ގައުމަކަށް ނުފެތޭގޮތަށް ގާނޫނުތައް ހަދާފައި އޮތްތަނެއް. މިތާ މަރުގެ އަދަބު ތަންފީޒުކުރަން ކެރޭނެތޯއޭ މި ގަރާރު ހުށައެޅި ފަރާތައްވެސް މިހާ ބޮޑެތި އަދަދުން.. އެކަމަށް ގޮވާލަން ވީ ނޫން ތޯ އޭ! މިގޮތަށް ގެންނަ މަސްތުވާ އެއްޗެހި ގެންނަ މީހުންނަށް މަރުގެ އަދަބު ތަންފީޒުކުރަން"
ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުالله (މޮސްޓާ)
މޮސްޓާ އިތުރަށް ވިދާޅުވީ މަސްތުވާ ތަކެއްޗަކީ ހަމައެކަނި ހިކި އެއްޗެހި، ނުވަތަ ޕެކެޓުތަކުގައި ބަންދުކޮށްފައި ހުންނަ އެއްޗެހިކަމަށް ކަނޑައަޅައި، އެވާހަކަ އެކަނި ދެއްކުމަކުންވެސް ނުފުދޭކަމަށެވެ.
ދިވެހިރާއްޖޭގައި ބަނގުރާ އާންމުވަމުންދާއިރު، ބަނގުރާ އެތެރެކޮށް ވިޔަފާރި ކުރާ ފަރާތްތަކަކީ ބޮޑެތި އިއްޒަތްތެރިކަމަށް ކަނޑައަޅާފައިވާކަން އޭނާ ފާހަގަކުރެއްވި އެވެ.
އެއާއެކު އޭނާ ވިދާޅުވީ އެއީ ހުއްޓުމަކަށް ގެންނަން ޖެހޭ ކަމެއް ކަމަށެވެ. ބަނގުރަލުގެ ވިޔަފާރި ކުރާ ފަރާތްތަކަށް ވެސް ގާނޫނުން އެއް ހަމައަކުން އަދަބު ކަނޑައަޅަން ޖެހޭ ކަމަށާއި، އެ ކަންކަން ހުއްޓުވިގެން ނޫނީ މަސްތުވާ ތަކެއްޗާއި ދެކޮޅަށް ކުރެވޭ މަސައްކަތް ކާމިޔާބު ނުވާނެކަމަށް މޮސްޓާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
