މިއަަހަރު ބާއްވާ ރިޔާސީ އިންތިޚާބުގައި ޖުމްހޫރީ ޕާޓީއިން ނެރޭނެ ކެންޑިޑޭޓެއް ކަނޑައަޅާނީ އެ ޕާޓީގެ ކޮންގަރެސްއަށް ފަހު އެކުލަވާލާ ކައުންސިލުންކަމަށް ޖުމްހޫރީ ޕާޓީގެ އެޑްވައިޒަރު އިލްހާމް އަހުމަދު ވިދާޅުވެއްޖެ އެވެ. 

ޖުމްހޫރީ ޕާޓީގެ ކޮންގްރެސްއާއި އެ ޕާޓީގެ އެތެރޭގެ އިންތިޚާބާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ޤާސިމް އިބްރާހިމް ރިޔާސީ އިންތިޚާބުގައި ވާދަކުރައްވަން ނިންމަވާފައިވޭތޯ ސުވާލު ކުރައްވާފަ އެވެ. 

އެ ސުވާލަށް ޖަވާބުދެއްވަމުން އިލްހާމް ވިދާޅުވީ ޖުމްހޫރީ ޕާޓީއިން ރިޔާސީ އިންތިޚާބުގައި ވާދަކުރުމަކީ ޕާޓީގެ ލީޑަރޝިޕުން ބޭނުންވާ ގޮތް ކަމަށެވެ. އެގޮތުން ޤާސިމް އިބްރާހިމް ފަދަ ސިޔާސީ ތަޖުރިބާކާރެއް ޕާޓީގެ ތެރެއިން ވާދަކުރުމަކީ ޔަގީނުންވެސް ބޭނުންވާ ކަމެއްކަމަށް އޭނާ ވިދާޅުވިއެވެ. 

Advertisement

އެހެން ނަމަވެސް ޕާޓީގެ އަސާސީ ގަވައިދު ބުނާގޮތުން ޖުމްހޫރީ ޕާޓީއިން ރިޔާސީ އިންތިޚާބުގައި ވާދަކުރާނެކަން އަދި ޕާޓީގެ ފަރާތުން ނެރޭނެ ކެންޑިޑޭޓެއް ކަނޑައެޅުމުގެ ބާރަކީ ޕާޓީގެ ކައުންސިލަށް ލިބިފައިވާ ބާރެއްކަމަށް އޭނާ ވިދާޅުވިއެވެ. 

މި މަހު ޖުމްހޫރީ ޕާޓީއިން ބާއްވާ ގައުމީ ކޮންގަރެސްއަށްފަހު ޕާޓީގެ ކައުންސިލް އެކުލަވާލެވިގެން ދާނެ ކަމަށާއި، މިއަހަރު ބާއްވާ ރިޔާސީ އިންތިޚާބުގައި ޖުމްހޫރީ ޕާޓީއިން ވާދަކުރާނެކަން ނުވަތަ ނޫންކަން ކަނޑައަޅާ، ޕާޓީއިން ނެރޭނެ ކެންޑިޑޭޓެއް ދައްކާނީ އެ ކައުންސިލުން ކަމަށް އިލްހާމް ވިދާޅުވި އެވެ. 

އިލްހާމު ވިދާޅުވީ މިހާރު ޖުމްހޫރީ ޕާޓީ އޮތީ ކޯލިޝަނެއްގެ ތެރޭގައި ކަމަށެވެ. އަދި އެ ޕާޓީއިން ގެންދަނީ ކޯލިޝަން ދެމެހެއްޓުމުގެ މަސައްކަތް ކުރަމުން ކަމަށެވެ. 

އެހެންކަމުން އަދި ރިޔާސީ އިންތިޚާބާއި ގުޅޭގޮތުން ޕާޓީއިން ވަކި ގޮތެއް ކަނޑައަޅާފައި ނުވާކަމަށް އޭނާ ވިދާޅުވި އެވެ. 

އިލްހާމު މިފަދައިން ވިދާޅުވެފައިވާއިރު ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވަނީ ރިޔާސީ އިންތިޚާބުގައި އެ ޕާޓީއިން ވާދަކުރާނެ ކަމުގެ ޔަގީންކަން ދެއްވާފައެވެ.

އެހެން ނަމަވެސް އިލްހާމެކޭވެސް އެއްގޮތަށް ޤާސިމް ވެސް ވިދާޅުވީ ރިޔާސީ އިންތިޚާބުގައި ޖޭޕީއިން ވާދަކުރާނީ ކޯލިޝަނަކާއި އެކުގައިތޯ ނުވަތަ ޕާޓީއިން ކެންޑިޑޭޓެއް ނެރެގެންތޯ ކަނޑައަޅާނީ ޕާޓީގެ ކައުންސިލުން ކަމަށެވެ.