Advertisement

މަޑުން ތިބެފައި ޖޭޕީ އިން ބަސް ބުނާނީ ވަގުތު ޖެހުނީމަ: ރިޔާޒު

14 Feb 2023 | 21:05
ޖޭޕީގެ އެޑްވައިޒަރު ރިޔާޒު ޕްރެސް ކޮންފަރެންސްގައި ވާހަކަދައްކަވަނީ/ ފޮޓޯ: ވޮއިސް

އަބަދު މަގުމަތީގައި ސިޔާސީ ހަރަކާތްތައް ނުހިންގި ނަމަވެސް ވަގުތު ޖެހުމުން ޖުމްހޫރީ ޕާޓީއިން ބަސް ބުނަމުން ގެންދާނެކަމަށް އެޕާޓީގެ އެޑްވައިޒަރު އަދި މަޖިލީހުގެ ވިލިފުށީ ދާއިރާގެ ކުރީގެ މެންބަރު ރިޔާޒް ރަޝީދު ވިދާޅުވެއްޖެ އެވެ. 

ރިޔާޒު މިފަދައިން ވިދާޅުވެފައިވަނީ ޖުމްހޫރީ ޕާޓީއިން ރިޔާސީ އިންތިޚާބަށް ތައްޔާރުވުމަށްޓަކައި ރާވާފައިވާ މުހިންމު ހަރަކާތްތަކާއި ގުޅޭ މައުލޫމާތުތައް ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ. 

މި ވެރިކަމުގައި ސަރުކާރުގެ ހިއްސާދާރެއްގެ ގޮތުގައި ޖުމްހޫރީ ޕާޓީ އޮތްއިރު ޕާޓީއިން ފުޅާ ދާއިރާއެއްގައި ސިޔާސީ ހަރަކާތްތައް ހިންގަމުން ނުދާކަމަށް ސިޔާސީ މަޝްރަހުގައި ތިއްބަވާ ފަރާތްތައް ދަނީ ބުނަމުންނެވެ. އަދި ޖުމްހޫރީ ޕާޓީއަކީ :"ހިހޫތަނުން ކާލައިގެން" އޮންނަ ޕާޓީއެއްކަމަށް ސަރުކާރުގެ ވާދަވެރި ޕާޓީއިންވެސް މީގެ ކުރިން ވަނީ ބުނެފައެވެ. 

Advertisement

ޖުމްހޫރީ ޕާޓީ މަޑުން އޮންނަ ސަބަބާއި ގުޅޭގޮތުން ރިޔާޒު ވިދާޅުވީ އެ ޕާޓީއިން މާ ގިނަ ހަރަކާތްތަކެއް ފާއިތުވި ތަނުގައި ނުހިންގީ ފަހަރެއްގައިވެސް ޕާޓީގެ ގާބިލުކަން ނެތިގެން ނޫން ކަމަށެވެ. އަދި ސިޔާސީ ހަރަކާތްތައް ހިންގާނެ ވަސީލަތްތައްވެސް ނެތިގެން ނޫން ކަމަށެވެ. 

ސިޔާސީ ޕާޓީއެއް ވިއްޔާ އަބަދުވެސް އޮންނަންޖެހޭނީ މަގުމަތީގައިކަމަށް ޖޭޕީއިން ނުދެކޭކަމަށް ރިޔާޒު ވިދާޅުވި އެވެ. އެހެން ނަމަވެސް ރައްޔިތުންގެ ހައްގުގައި ބަސް ބުނަންވީ ރަނގަޅު ވަގުތުގައި ޖުމްހޫރީ ޕާޓީއިން އަބަދުވެސް ބަސް ބުނަމުން ގެންދާނެކަމަށް އޭނާ ވިދާޅުވި އެވެ. 

"އަބަދު ޖުމްހޫރީ ޕާޓީއިން ގަބޫލުކުރާ ގޮތުގައި ޕާޓީ އޮންނަންވާނީ މަގުމަތީގައެއް ނޫން. އެހެންވީމަ އަޅުގަނޑުމެން އެ ވަގުތަކަށް އެންމެ މުނާސަބު، ރައްޔިތުންގެ ކަންތައްތަކުގައި ޖުމްހޫރީ ޕާޓީއިން ދަނީ ބަސް ބުނަމުން، ޖުމްހޫރީ ޕާޓީގެ ލީޑަރު ދަނީ ބަސް ބުނަމުން، ރައްޔިތުންނާއެކު އަބަދުވެސް ޖުމްހޫރީ ޕާޓީ އޮންނާނެ. ރައްޔިތުންނަށް ކަންބޮޑުވާ ކަންކަމުގައި ބަސް އިއްވާނެ، ރައްޔިތުންގެ ކަންބޮޑުވާ ކަންކަމުގައި ޖުމްހޫރީ ޕާޓީއިން އަބަދުވެސް އަޑުއުފުލާނެ"

ޖޭޕީގެ އެޑްވައިޒަރު ރިޔާޒު ރަޝީދު

ރިޔާޒު ވިދާޅުވީ މި މަހު ޖުމްހޫރީ ޕާޓީއިން ބާއްވާ އެ ޕާޓީގެ ކޮންގްރެސް ވެގެންދާނީ ޖުމްހޫރީ ޕާޓީގެ ސިޔާސީ ހަރަކާތްތައް ފުޅާކޮށް، ރިޔާސީ އިންތިޚާބަށް ތައްޔާރުވުމުގެ ފެށުމަކަށް ކަމަށެވެ. 

އެ ކޮންފަރެންސްއަށްފަހު ޕާޓީގެ ހިންގުން އިތުރަށް ހަރުދަނާ ވެގެންދާނެ ކަމަށް އޭނާ ވިދާޅުވިއެވެ. 

ޖޭޕީގެ ގައުމީ ކޮންފަރެންސްގެ ތެރެއިން ޕާޓީގ އަސާސީ ގަވައިދަށް ގެންނަން ހުށައަޅާ މުހިންމު އިސްލާހުތައް ފާސްކުރެވިގެންދާނެ އެވެ. އޭގެ އިތުރުން އެ ކޮންފަރެންސަށްފަހު އެކުލަވާލެވޭ ކައުންސިލުން ޖުމްހޫރީ ޕާޓީ ރިޔާސީ އިންތިޚާބުގައި ވާދަކުރާނެކަން ނުވަތަ ނޫންކަން ކަނޑައަޅާ ރަސްމީކޮށް އިއުލާނު ކުރާނެކަމަށް އެ ޕާޓީއިން ވަނީ މައުލޫމާތު ދީފަ އެވެ. 

Advertisement

ކޮމެންޓް

Advertisement

Advertisement