އެންޓި-ކޮރަޕްޝަން ކޮމިޝަނަށް މައްސަލަތަކެއް ހުށަހެޅުމުން އެ މައްސަލަ ތައް ދިފާއުކޮށް، ރައްޔިތުންގެ މަޖިލީހުގައި ތިބި ބައެއް މެންބަރުންގެ ބައިވެރިވުމާއި އެކު އެ ކޮމިޝަން އުވާލި ސަރުކާރެއް މި ނޫނީއްޔާ ދިވެހިރާއްޖޭގެ ތާރީޚްގައި ވެސް ނެތް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަލީ ހުސައިން ވިދާޅުވެއްޖެއެވެ.
މިއަދުގެ މަޖިލީހުގެ ޖަލްސާގައި ސަރުކާރު ހިއްސާވާ ކުންފުނިތައް އުފެއްދުމާއި، އުވާލުމާއި އަދި ރެގިއުލޭޓްކޮށް މޮނިޓަރކުރެވޭނެ ޤާނޫނެއް އެކުލަވާލުމަށް އެދި ގޮވާލާ ޤަރާރަށް ބަހުސް ކުރަން އަލީ ހުސައިން ވިދާޅުވީ، އޭސީސީ އަކީ ދިވެހިރާއްޖޭގައި ކޮރަޕްޝަން ނައްތާލުމަށް އުފެއްދި ތަނެއް ނަމަވެސް، ވޭތުވެދިޔަ 15 ވަރަކަށް އަހަރުގައި ކުލީގެ ގޮތުގައި އެ އޮފީހުން ދެއްކި ފައިސާ، ކޮރަޕްޝަން މައްސަލަތަކުގައި އަލުން އަނބުރާ ހޯދުނު ފައިސާއަށްވުރެ ގިނަ ކަމަށެވެ.
އެހެންވީމާ ހަގީގަތުގައި މިހާރު ރައްޔިތުން އެބަ ސުވާލު އުފައްދާ އެންޓި ކޮރަޕްޝަން ކޮމިޝަނެއް ރާއްޖޭގައި މިގޮތަށް ހަމަ އޮންނަންވީތޯ، ނުވަތަ އެހެން މައްސަލަ ތައް ބަލާގޮތަށް ފުލުހުންގެ އިދާރާއިން ހަމަ ކޮރަޕްޝަން ގެ މައްސަލަތައް ބަލަންވީތޯ.
އަލީ ހުސައިން
މިފަދައިން ސުވާލު އުފައްދަން ނުވާ ސަބަބެއްވެސް ނެތް ކަން ފާހަގަކުރައްވައި އަލީ ހުސައިން ވަނީ އާއްމު ރައްޔިތުންނާއި ދައުލަތުގެ މުއައްސަސާތަކުގައި މަސައްކަތްކުރާ މީހުންގެ މައްސަލަ ތައް ބެލުމުގައި ގެންގުޅޭ ތަފާތު ތަކަށް ފާޑުވިދާޅުވެފައެވެ.
އެގޮތުން ވިދާޅުވީ، ދައުލަތުގެ މުއައްސަސާތަކުގައި ތިބޭ މީހުން ހިންގާ ކޮރަޕްޝަނާއި ރިޝްވަތުގެ މައްސަލަތަކުގެ ތަހުގީގަށް، އެ މީހުން ހާޒިރު ކުރަނީ "ކޯޓު ފަޓުލޫނުގައި ޓައީ" އަޅާފައި ތިއްބާ ކަމަށާ، އެހެން ނަމަވެސް، އާއްމު ރައްޔިތަކު ރިހާކުރު ފުޅިއެއް ވަގަށް ނެގި ނަމަވެސް އެ މައްސަލަ ތަހުގީގު ކުރަނީ އެ މީހަކު ޖަލުގައި ބަންދު ކޮށްގެން ކަމަށް އަލީ ވިދާޅުވި އެވެ.
ޢަލީ ވިދާޅުވީ، އެހެނިހެން ގައުމުތަކުގައި އޭސީސީއެއް އުފައްދާފައި އޮންނަނީ މަސައްކަތް ކުރަން ކަމަށެވެ. އެހެންނަމަވެސް ރާއްޖޭގެ އޭސީސީން މަސައްކަތް ކުރާތަން ނުފެންނަ ކަމަށާ، ފެންނަނީ އޭގެ އިދިކޮޅު ކަމަށެވެ.
އެއާއި ޚިލާފަށް އަޅުގަނޑުމެންނަށް ފެނުނީ އާދަޔާ ޚިލާފް މަންޒަރެއް މި ސަރުކާރުގައި. މި ވޭތުވެދިޔަ ތާރީޚް ގައި، ދިވެހިރާއްޖޭގެ ތާރީޚްގައި ނުފެންނަ މަންޒަރެއް އަޅުގަނޑުމެންނަށް ފެނުނީ މި ސަރުކާރުގައި މި ހަތަރު އަހަރު ތެރޭގައި ފެނުނު. އެއީ އޭސީސީއަށް ވަކިމީހަކާއި ގުޅޭގޮތުން 80 ވަރަކަށް މައްސަލަ ހުށަހެޅުނީމާ، ވަކި ބަޔަކާއި ގުޅޭގޮތުން 80 ވަރަކަށް މައްސަލަ ހުށަހެޅުނީމާ، އެންޓި ކޮރަޕްޝަން ކޮމިޝަން އުވާލީ. އަޅުގަނޑުމެން ދުވަހަކުވެސް ނުދެކެން އޭސީސީއަށް މައްސަލަ ހުށަހެޅުނީމާ އެ މައްސަލަތައް ދިފާއުކޮށްފައި، ރާއްޖޭގެ ޓީވީތަކަށް އަރައި، މީޑިއާ ތަކަަށް އަރައި ޑިފެންޑް ކުރި މަންޒަރެއް އަޅުގަނޑު ނުދެކެން މި ސަރުކާރުގައި ނޫނިއްޔާ. ހަމައެކަނި ޑިފެންޑް ކުރީ އެއްވެސް ނޫން. މިތަނުގައި. މި ރައްޔިތުންގެ މަޖިލީހުގައި ތިބި މެންބަރުން، އެ ބޭފުޅުންނާ ގުޅިފައި ތިބި މެންބަރުން ބޭނުންކޮށްގެން އެންޓި-ކޮރަޕްޝަން އުވާލީ. މިއީ ދެރަވަރު ކަންކަން. ދިވެހިރާއްޖޭގެ ތާރީޚްގައި ވަރަށް ހުތުރުކޮށް ލިޔެވޭނެ ކަންކަން.
ޢަލީ ހުސައިން
އޭސީސީއަށް ބަލަން ހުށަހެޅުނު މައްސަލަތައް ގިނަ ވުމުން އެ ކޮމިޝަން އުވާލުމަށްފަހު އަލުން އަނެއްކާ މިހާރު އުފައްދާފައިވާއިރު، އެ ކޮމިޝަނުން މިހާތަނަށް ކުރެވުނީ ކޮންކަމެއް ތޯ ޢަލީ ހުސައިން ވަނީ ސުވާލު ކުރައްވާފައެވެ.
Advertisement
This content is created and paid for by advertisers and does not involve Voice Journalists
