އިމިގްރޭޝަން ކޮންޓްރޯލަރ މަޤާމުގައި ހުންނެވި މުހައްމަދު އަހްމަދު ހުސެއިން ޖުމްހޫރީ ޕާޓީގެ ޑެޕިޔުޓީ ލީޑަރުގެ މަޤާމަށް ނަންހުށައަޅުއްވައިފިއެވެ.

ޕާޓީގެ ޑެޕިޔުޓީ ލީޑަރުން ހޮވުމަށް ނަން ހުށައެޅުމަށް ޖޭޕީ އިން ހުޅުވާލައިފައިވާއިރު އެޕާޓީގެ ޤައުމީ ކޮންގްރެސް މިމަހުގެ 24 ހުން 25 އަށް ވަނީ ބޭއްވުމަށް ހަމަޖެހިފައެވެ.

ޖޭޕީގެ ތަރުޖަމާނު އަލީ ޞާލިޙް މިކަމާއި ގުޅިގެން "ވޮއިސް" އަށް ވިދާޅުވެފައިވަނީ  ކޮންގްރެސްގައި ރާއްޖޭގެ އެކި ކަންކޮޅުތަކުން ގާތްގަނޑަކަށް 500 އާއި 700 އާއި ދެމެދުގެ އަދަދަކަށް މީހުން ބައިވެރިވާނެ ކަމަށެވެ. އަދި މި ކޮންފަރެންސްގައި ބައިވެރިވާނީ ޖޭޕީގެ އެކި އިންތިޚާބީ މަގާމުތަކުގައި ތިއްބެވި މަންދޫބުންކަމަށް ޞާލިހު ވިދާޅުވި އެވެ. 

ޖުމްހޫރީ ޕާޓީއިން ވަނީ ކުރިއަށް އޮތް ރިޔާސީ އިންތިޚާބުގައި އެ ޕާޓީއިން ވާދަކުރާނެކަން އިއުލާނުކޮށްފަ އެވެ. ނަމަވެސް އިންތިޚާބުގައި ވާދަކުރާނީ ޕާޓީއިން މިނިވަން ކެންޑިޑޭޓެއް ނެރެގެން ކަމެއް ނުވަތަ އެހެން ޕާޓީ އަކާއި ކޯލިޝަނެއް ހަދައިގެން ކަމެއް އަދި ހާމަކޮށްފައެއް ނުވެއެވެ.

ނަމަވެސް ޖޭޕީގެ ލީޑަރ އަދި މާމިގިލީ ދާއިރާގެ މެމްބަރ ޤާސިމް އިބްރާހިމް ވިދާޅުވެފައިވަނީ ޖޭޕީ އާއި އެކު ކޯލިޝަން ހަދަން ބޭނުންވާ ޕާޓީ އަކަށް އެފުރުސަތު އޮތް ކަމަށެވެ. އެހެން ނަމަވެސް އެކަންކަން ނިންމާނީ ޕާޓީގެ ކައުންސިލުން ކަމަށާއި، ކައުންސިލުން ނިންމާ ގޮތެއްގެ މައްޗަށް ރިޔާސީ އިންތިޚާބުގެ ކަންކަން ތަރުތީބުވެގެން ދާނެކަމަށް ގާސިމް ވިދާޅުވި އެވެ. 

ޖުމްހޫރީ ޕާޓީއަކީ ރާއްޖޭގައި އުފައްދާފައިވާ ސިޔާސީ ޕާޓީތަކުގެ ތެރެއިން ތިން ވަނައަށް އެންމެ ބޮޑު ޕާޓީއެވެ. އެގޮތުން އެ ޕާޓީގައި 18000 މެމްބަރުން ތިބެއެވެ. 

ޕާޓީއަށް މީހުން އިތުރު ކުރުމުގެ މަސައްކަތް ޖޭޕީއިން ކުރަމުންދާއިރު، އެ ޕާޓީއަކީ މިހާރު މިއޮތް ސަރުކާރުގެ އެންމެ ބޮޑު އެއް ހިއްސާދާރެވެ.