ކުރިއަށް އޮތް ރިޔާސީ އިންތިޚާބުގައި ކޯލިޝަން ހެދުމާއި ގުޅޭގޮތުން މަޝްވަރާކުރުމުގެ ބާރު އެމްޑީޕީގެ ރިޔާސީ ކެނޑިޑޭޓް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހަށް ދިނުމަށް އެމްޑީޕީގެ ގައުމީ މަޖިލީހުން ފާސްކޮށްފިއެވެ.

އެމްޑީޕީގެ ޤައުމީ މަޖިލީހުން މިގޮތަށް ފާސްކުރީ އިއްޒުއްދީން ސްކޫލުގައި ރޭ ބޭއްވި އެ ޕާޓީގެ ޤައުމީ މަޖިލީހުގެ ބައްދަލުވުމުގައެވެ.

ގާތްގަނޑަކަށް 60 ވަރަކަށް މެންބަރުން ބައިވެރިވި މި ބައްދަލުވުމުގައި، ކޯލިޝަން ހެދުމުގެ ބާރު ރައީސް ސާލިހުއަށް އެރުވުމަށް ފާސްކުރީ ޤައުމީ މަޖިލީހުގެ އަޤްލަބިއްޔަތުންނެވެ. 

ގައުމީ މަޖިލީހުން މިފަދަ ނިންމުމެއް ނިންމާފައިވާއިރު، އެ ބައްދަލުވުމުގައި އެމްޑީޕީގެ ރިޔާސީ ޕްރައިމަރީ އިން ނާކާމިޔާބީ ލިބިވަޑައިގެންނެވި އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި އެމަނިކުފާނުގެ "ފިކުރެއްގެ ދިރުން" ހަރަކާތައް ތާއީދު ކުރައްވާ މެންބަރުން ބައިވެރިވެ ވަޑައިގެންފައެއް ނުވެއެވެ. 

ރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގެ ތެރެއިން: ފޮޓޯ/ އެމްޑީޕީ

ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރައްވާނެ ކެންޑިޑޭޓަކީ ރައީސް ޞާލިހު ކަން އެޕާޓީގެ ރިޔާސީ ޕްރައިމަރީން ޔަގީންވެފައިވާއިރު، އެމަނިކުފާނަށް ރިޔާސީ ޓިކެޓް ހަވާލުކުރުން މި ހުކުރު ދުވަހުގެ ރޭ އޮންނާނެއެވެ. 

2018 ގައި ބޭއްވި ރިޔާސީ އިންތިޚާބުގައިވެސް ކޯލިޝަން ހެދުމަށް އެމްޑީޕީ ޤައުމީ މަޖިލީހުން ރައީސް އިބްރާހީމް މުޙައްމަދު ޞާލިޙަށް އެ ބާރު ދެއްވިއެވެ. އަދި އެފަހަރުގެ އިންތިޚާބު އެމަނިކުފާނު ކާމިޔާބުކުރެއްވީވެސް ޖުމްހޫރީ ޕާޓީއާއި، އަދާލަތު ޕާޓީއާއި، އެމްއާރުއެމްއެކު ހެދި ކޯލިޝަނަކާއި އެކުގައެވެ. 

އައު ޤާނޫނު އަސާސީއަށް ޢަމަލުކުރަން ފެށިފަހުން އެއްވެސް ސިޔާސީ ޕާޓީއަކަށް އެކަނި ވާދަކޮށްގެން %50 އަށްވުރެ ގިނަ ވޯޓް ހޯދައިގެން ރިޔާސީ އިންތިހާބު ކާމިޔާބުކުރެވިފައެއް ނުވާއިރު، ރައީސް ޞާލިޙްގެ ވިސްނުންފުޅަކީވެސް ކުރިއަށް އޮތް ރިޔާސީ އިންތިޚާބުގައިވެސް ކޯލިޝަނަކާއެކު ވާދަކޮށް ވެރިކަމަށް ވަޑައިގަތުންކަމަށް މީގެކުރިން ދެއްކެވި ވާހަކަފުޅުތަކުގައި ވަނީ ހާމަކުރައްވާފައެވެ.