Advertisement
ޞާލިހު ގެނެސްދިނީ ނޫރާރީ ދައުރެއް، ދައުލަތުގެ ސިފަ ޖައްސައިދީފި: ޝާހިދު
ދިވެހިރާއްޖޭގައި ދައުލަތެއްގެ ސިފަ ޖައްސަވާދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ސަރުކާރުން ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
ޝާހިދު މިފަދައިން ވިދާޅުވެފައިވަނީ ރައީސް ޞާލިހަށް އެމްޑީޕީގެ ރިޔާސީ ޓިކެޓު ރަސްމީކޮށް ހަވާލުކުރުމަށް ބޭއްވި ޚާއްސަ ޖަލްސާއެއްގައި ވާހަކަދައްކަވަމުން ނެވެ.
ޝާހިދު ވިދާޅުވީ ރައީސް އިބްރާހިމް މުހައްމަދު ޞާލިހުގެ ވެރިކަން ރައްޔިތުން ހަނދާން ކުރަނީ ގައުމަށް އައި މިނިވަން ނޫރާނީ ދައުރެއްގެ ގޮތުގައި ކަމަށެވެ. މީގެ ކުރީގެ ވެރިކަމުގައި ހިންގާފައިވާ އަނިޔާވެރި އެތައް ކަމެއް މި ސަރުކާރުން ނިމުމަކަށް ގެނެސްފައިވާކަމަށް ޝާހިދު ވިދާޅުވިއެވެ.
އެގޮތުން ޝާހިދުގެ ވާހަކައިގައި ވަނީ މީގެ ކުރީގެ ވެރިކަމުގައި ރައްޔިތުންގެ މަޖިލީސް މެމްބަރުން، މަގާމުން ވަކިކޮށް، މަޖިލީހުން ނެރުނު ގޮތް ހަނދާންކުރުމަށް އެދިލައްވާފައެވެ. އޭނާ ވިދާޅުވީ އޭރު މަޖިލީހުގައި މަސައްކަތް ކުރުމުގެ ފުރުސަތު ސަރުކާރުން ދީފައި ނުވާކަމަށެވެ.
"ހަނދުމަފުޅު ކުރައްވާ، ރައްޔިތުންގެ މަޖިލީހުގެ މެމްބަރުން މެމްބަރުކަމުން ވަކިވެއްޖެކަމަށް ނިންމާ ރައްޔިތުންގެ މަޖިލީހުގެ ތަޅުމުން ދަމާނެރެ، ބޮޑު ކަންނެލި އުކާހެން ގޭޓުމަތިން އުކާލީ، ދައުލަތުގެ ސަލާމަތީ ބާރުތަކުގެ އަތްދަށަށް ރައްޔިތުންގެ މަޖިލިސް ގެންދިޔަ، ހަނދުމަފުޅު ކުރައްވާ! އެއީ އަނިޔާވެރިކަން.. އެއީ ދައުލަތް ޚަރާބުކޮށްލުން. އަޅުގަނޑުމެންގެ މި މިނިވަން ނޫރާނީ ދައުރުގައި ރައްޔިތުންގެ މަޖިލީހަށް ދައުލަތުގެ މުއައްސަސާގެ ސިފަ ރައީސް އިބްރާހިމް މުހައްމަދު ޞާލިހު ގެނެސްދެއްވައިފި
ފޮރިން މިނިސްޓަރު އަބްދުﷲ ޝާހިދު
ދެން އޭނާ ވިދާޅުވީ މިއަދު މުއައްސަސާތަކަށް މިނިވަންކަމާއެކު މަސައްކަތް ކުރުމުގެ ފަހި ފުރުސަތު ތަނަވަސްކޮށްދެވިފައި ވާކަމަށެވެ. މީގެ ކުރީގެ ވެރިކަމުގައި ސުޕްރިމް ކޯޓުން ޓިނުގަނައި ގާޒީން ހައްޔަރުކޮށް އެތައް އަނިޔާއެއް ކުރި ނަމަވެސް މިއަދު ފެނިގެންދަނީ މިނިވަންކަމާއެކު ކޯޓުތަކަށް މަސައްކަތް ކުރުމުގެ ފުރުސަތު ފަހިވެފައި އޮތް މަންޒަރުކަމަށް ޝާހިދު ވިދާޅުވިއެވެ.
"ރާއްޖޭގެ ފަނޑިޔާރުގޭގެ ފުރާޅުން ޓިނު ނަގާ ބޮޑު ފަނޑިޔާރާއި ދެންތިބި ފަނޑިޔާރުން ނަގާ ގެންގޮސް ކުޑަގޮޅިއަށްލާ، ބަނޑު ބިންމަތީގައި ޖެއްސީ.. ކުރީގެ އަނިޔާވެރި ސަރުކާރުން. ރައީސް އިބްރާހިމް މުހައްމަދު ޞާލިހުގެ ސަރުކާރުން ގައުމަށް އައި މިނިވަން ނޫރާނީ ދައުރުން އަޅުގަނޑުމެން މިއަދު މި ހަނދާން ކުރަނީ ފަނޑިޔާރު ގެއަކީ މިނިވަން މުއައްސަސާއެއް"
ފޮރިން މިނިސްޓަރު އަބްދުﷲ ޝާހިދު
ރައީސް ޔާމީންގެ ސަރުކާރަށް ފާޑުކިޔުންތައް އަމާޒުކުރައްވާ ޝާހިދު ވިދާޅުވީ މީގެ ކުރިން ގާނޫނު އަސާސީ ގަޑުބަޑުކޮށް، ރާއްޖޭގެ ރަށްތަކާއި ފަޅުތައް ޞޭރު މީހުންނަށް ވިއްކަމުން ދިޔަކަމަށެވެ. އެހެން ނަމަވެސް އެކަންކަމަށް ރައީސް ޞާލިހުގެ ސަރުކާރުން ވަނީ ނިމުން ގެނެސްފައި ކަމަށެވެ.
"މިދިޔަ ޕީޕީއެމްގެ އަނިޔާވެރި ޖައްބާރު ވެރިކަމުގައި މުޅި ދައުލަތް ވިއްކާލަން ނިންމާ ހިންގި ބޮޑު ޖަރީމާގެ މަތިން ހަނދުމަފުޅު ކުރައްވާ. ދިވެހިރާއްޖޭގެ ގާނޫނު އަސާސީ ޚަރާބުކޮށްލާ ގާނޫނު އަސާސީއަށް އިސްލާހު ގެނައީ ރާއްޖޭގެ ފަޅުތަކާއި އަތޮޅުތަކާއި ރަށްތައް ވިއްކާލުމަށް، ހަނދުމަފުޅު ކުރައްވާ! ގައުމަށް އައި މިނިވަން ނޫރާނީ ދައުރުން އަޅުގަނޑުމެން ހަނދާން ކުރާއިރު، އެ އަނިޔާވެރިކަން، އެ ބިރުވެރިކަން، ރާއްޖޭގެ އިސްތިގުލާލު ނަގާލުމަށް ރާވާފައި އޮތް ބޮޑު ޖަރީމާ ފޮހެލެއްވީ ރައީސް އިބްރާހިމް މުހައްމަދު ޞާލިހު"
ފޮރިން މިނިސްޓަރު އަބްދުﷲ ޝާހިދު
ޝާހިދު ވިދާޅުވީ ރައީސް ޞާލިހު ސަރުކާރުގައި މީގެ ކުރިން އެއްވެސް ސަރުކާރަކަށް ފޯރުކޮށްދެވިފައި ނުވާމިންވަރަށް އަސާސީ ޚިދުމަތްތައްވެސް ފޯރުކޮށްދެވިފައިވާ ކަމަށެވެ. އެގޮތުން އެމަނިކުފާނު ވެރިކަމާއި ހަވާލުވިއިރު ރާއްޖޭގެ 70 އިންސައްތަ ރަށުގައި ސާފު ފެނާއި ނަރުދަމާ އޮތީ ނާޅާ ކަމަށާއި، މި ދައުރު ނިމެންވާއިރު ހުރިހާ ރަށަކަށް އެ ޚިދުމަތް ފޯރުކޮށްދެއްވާނެކަމުގެ ޔަގީންކަން ޝާހިދު ދެއްވިއެވެ.
"މި ދިވެހިރާއްޖޭގެ 70 ޕަސެންޓު ރަށުގައި ފެނެއް ނެތް، ނަޖިސް ފެނުން ފެންވަރައިގެން ރާއްޖެ އުފެދުނީއްސުރެ މީހުން އުޅެމުން އައީ. މި ސަރުކާރާއި ރައީސް އިބްރާހިމް މުހައްމަދު ޞާލިހު ހަވާލުވެވަޑައިގެންނެވިއިރު ރާއްޖޭގެ 70 ޕަސެންޓު ރަށުގައި ސާފު ބޯފެނެއް ނެތް، ނަރުދަމާއެއް ނެތް. ﷲ ގެ އިރާދަފުޅުން، ރައީސުލްޖުމްހޫރިއްޔާ ކުރެއްވި މަސައްކަތްުޅުން އަޅުގަނޑުމެންގެ މި ދައުރު ނިމޭއިރު، ރާއްޖޭގެ ހުރިހާ ރައްޔިތުން ފެންވަރާނީ ބޯނީ ސާފު ބޯފެން"
ފޮރިން މިނިސްޓަރު އަބްދުﷲ ޝާހިދު
ރައީސް ޞާލިހުގެ ސަރުކާރުން ކޮށްދެއްވި ގިނަ ކަންތައްތަކަކަށް ޝާހިދުގެ ވާހަކައިގައި ވަނީ އަލިއަޅުވާލައްވާފަ އެވެ. އޭގެ ތެރޭގައި މި ސަރުކާރުން ފެށި ހިލޭ ޑިގްރީ ޕްރޮގްރާމުގެ ތެރެއިން 16000 ދަރިވަރުން މިހާރު ތައުލީމު ހާސިލްކޮށްފައިވާކަން އޭނާ ފާހަގަކުރެއްވި އެވެ. އަދި ދަތުރުފަތުރުގެ ނިޒާމުން ރާއްޖެ ގުޅުވާލުމަށް ފެއްޓެވި އާރުޓީއެލް ފެރީ މަޝްރުއުގެ ސަބަބުން ލިބެމުންދާ ލުއި ފަސޭހަކަމަށް ޝާހިދު ތައުރީފު ކުރެއްވި އެވެ.
އެކަންކަން ފާހަގަކުރައްވާ ޝާހިދު ވިދާޅުވީ ރާއްޖޭގައި ދައުލަތުގެ ސިފަޖެހެން ފެށީ ރައީސް ޞާލިހު ވެރިކަމާއި ހަވާލުވެވަޑައިގަތް ފަހުން ކަމަށެވެ. އެމަނިކުފާނުގެ ވެރިކަން ރައްޔިތުން ހަނދާން ކުރަނީ ނޫރާނީ ވެރިކަމެއްގެ ގޮތުގައި ކަމަށާއި، އަނބުރާ އަނިޔާވެރިކަމަށް ދާން އެއްވެސް ރައްޔިތަކު ބޭނުން ނުވާކަމަށް ޝާހިދު ވިދާޅުވިއެވެ.
އެއާއެކު ޝާހިދު ވިދާޅުވީ އަންނަ ރިޔާސީ އިންތިޚާބު ރައީސް ޞާލިހު ކާމިޔާބުކުރައްވާނީ ގަދަކޮށް ކަމަށެވެ. އަދި އެ އިންތިޚާބު ކާމިޔާބުކޮށް އަނެއްކާވެސް ވެރިކަމަށް ހުވާކުރައްވާނީ ރައީސް ޞާލިހުކަމާމެދު ޔަގީން ކުރައްވާކަމަށް ޝާހިދު ވިދާޅުވި އެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
