ޖުމްހޫރީ ޕާޓީގެ ލީޑަރު ކަމަށް އެޕާޓީގެ ލީޑަރުގެ މަޤާމުގައި ހުންނެވި ޤާސިމް އިބްރާހިމް ކުރިމަތިލައްވައިފިއެވެ.

ޖުމްހޫރީ ޕާޓީގެ ޤައުމީ ކޮންފަރެންސް މިމަހުގެ 24 އަދި 25 ގައި ބޭއްވުމަށް ހަމަޖެހިފައިވާއިރު އެ ތާރީޚަށް މިހާރު އެޕާޓީގެ އިންތިޚާބީ މަޤާމުތަކުގައި ތިއްބެވި ބޭފުޅުންގެ މަޤާމުގެ މުއްދަތު ހަމަވާނެއެވެ.

ޖޭޕީގެ ނައިބު ލީޑަރު ކަމަށް ކުރިމަތިލެއްވި ބޭފުޅުންގެ ތެރޭގައިޓްރާންސްޕޯޓު މިނިސްޓަރު އައިޝަތު ނަހުލާ، ސްޓޭޓް މިނިސްޓަރު ހަސަން މުޣުނީ، ގާސިމްގެ އެގްޒެކްޓިވް ސެކްރެޓަރީ އިގްބާލް އާދަމް، މިހާރު ވެސް ނައިބު ރައީސް ކަމުގައި ހުންނެވި އަހުމަދު ސައުދު، އިމިގްރޭޝަން ކޮންޓްރޯލާ މުހައްމަދު އަހްމަދު ހުސައިން (ހަނަފީ) އަދި ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ އަހުމަދު ހިމެނެއެވެ.

Advertisement

ޖުމްހޫރީ ޕާޓީއިން ވަނީ ކުރިއަށް އޮތް ރިޔާސީ އިންތިޚާބުގައި އެ ޕާޓީއިން ވާދަކުރާނެކަން އިއުލާނުކޮށްފަ އެވެ. އެހެން ނަމަވެސް އިންތިޚާބުގައި ވާދަކުރާނީ ޕާޓީއިން ވަކި ކެންޑިޑޭޓެއް ނެރެގެން ކަމެއް ނުވަތަ އެހެން ސިޔާސީ ޕާޓީއަކާއި އެކު ކޯލިޝަން ހަދައިގެން ކަމާމެދު އަދި ވަކި ގޮތެއް ކަނޑައަޅާފައެއް ނުވެއެވެ. 

އެކަމާއި ގުޅޭގޮތުން މީގެ ދުވަސްކޮޅެއް ކުރިން ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވީ ޖޭޕީއާއެކު ކޯލިޝަން ހަދަން ބޭނުންވާ ފަރާތްތަކަށް އަދި އެ ފުރުސަތު އޮތް ކަމަށެވެ.

އެހެން ނަމަވެސް އެކަންކަން ނިންމާނީ ޕާޓީގެ ކައުންސިލުން ކަމަށާއި، ކައުންސިލުން ނިންމާ ގޮތެއްގެ މައްޗަށް ރިޔާސީ އިންތިޚާބުގެ ކަންކަން ތަރުތީބުވެގެން ދާނެކަމަށް ޤާސިމް ވިދާޅުވި އެވެ.