ޖުމްހޫރީ ޕާޓީ (ޖޭޕީ) ގެ ޑެޕިޔުޓީ ލީޑާރުގެ މަޤާމަށް ޓްރާންސްޕޯޓް އެންޑް އޭވިއޭޝަން މިނިސްޓަރ ޢާއިޝަތު ނަހުލާ ކުރިމަތި ލައްވާފިއެވެ.

ޖޭޕީގެ ތަރުޖަމާން އަލީ ސޯލިހް މިއަދު ކުރެއްވި ޓްވީޓެއްގައި ވިދާޅުވެފައި ވަނީ 4 ވަނަ ޤައުމީ ކޮންފަރެންސް އިން އިންތިޙާބު ކުރާ ޑެޕިއުޓީ ލީޑަރު ކަމުގެ މަގާމަށް މިނިސްޓާރ ނަހުލާ ކުރިމަތި ލައްވައިފި ކަމަށެވެ.

މީގެ އިތުރުން މި މަގާމަށް އިންތިޙާބު ކުރާނީ 5 ބޭފުޅުން ކަމަށާއި މިވަގުތާ ހަމަޔަށް ގިނަ ބޭފުޅުން ތަކެއް މި މަގާމަށް ކުރިމަތި ލާފައިވާ ކަމަށްވެސް އަލީ ސޯލިހް ވަނީ ވިދާޅުވެފައެވެ.

ޖޭޕީގެ ނައިބު ލީޑަރު ކަމަށް ކުރިމަތިލެއްވި ބޭފުޅުންގެ ތެރޭގައިޓްރާންސްޕޯޓު މިނިސްޓަރު އައިޝަތު ނަހުލާ، ސްޓޭޓް މިނިސްޓަރު ހަސަން މުޣުނީ، ގާސިމްގެ އެގްޒެކްޓިވް ސެކްރެޓަރީ އިގްބާލް އާދަމް، މިހާރު ވެސް ނައިބު ރައީސް ކަމުގައި ހުންނެވި އަހުމަދު ސައުދު، އިމިގްރޭޝަން ކޮންޓްރޯލާ މުހައްމަދު އަހްމަދު ހުސައިން (ހަނަފީ) އަދި ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ އަހުމަދު ހިމެނެއެވެ.

މި މަހުގެ 24، 25 ގައި ބާއްވާ ޖޭޕީގެ ކޮންގްރެސްގައި އާ ދައުރަށް ޕާޓީގެ މަގާމުތަކަށް ބޭފުޅުން އިންތިޚާބު ކުރުމަށް މަގާމުތަކަށް ވާދަކުރެއްވުމުގެ ސުންގަޑި މިއަދު މެންދުރު 12:00އަށް ހަަމަވެފައިވާއިރު އެ ޕާޓީގެ ލީޑަރު ކަމަށް ކުރިމަތިލައްވާފައި ވަނީ މިހާރު ވެސް އެ މަގާމުގައި ހުންނެވި ގާސިމެވެ. 

ޖުމްހޫރީ ޕާޓީއިން ވަނީ ކުރިއަށް އޮތް ރިޔާސީ އިންތިޚާބުގައި އެ ޕާޓީއިން ވާދަކުރާނެކަން އިއުލާނުކޮށްފަ އެވެ. ނަމަވެސް އިންތިޚާބުގައި ވާދަކުރާނީ ޕާޓީއިން ކެންޑިޑޭޓެއް ނެރެގެން ކަމެއް ނުވަތަ އެހެން ޕާޓީ އަކާއި ކޯލިޝަނެއް ހަދައިގެން ކަމެއް އަދި ހާމަކޮށްފައެއް ނުވެއެވެ.

ނަމަވެސް ޖޭޕީގެ ލީޑަރ އަދި މާމިގިލީ ދާއިރާގެ މެމްބަރ ޤާސިމް އިބްރާހިމް ވިދާޅުވެފައިވަނީ ޖޭޕީ އާއި އެކު ކޯލިޝަން ހަދަން ބޭނުންވާ ޕާޓީ އަކަށް އެފުރުސަތު އޮތް ކަމަށެވެ. އެހެން ނަމަވެސް އެކަންކަން ނިންމާނީ ޕާޓީގެ ކައުންސިލުން ކަމަށާއި، ކައުންސިލުން ނިންމާ ގޮތެއްގެ މައްޗަށް ރިޔާސީ އިންތިޚާބުގެ ކަންކަން ތަރުތީބުވެގެން ދާނެކަމަށް ގާސިމް ވިދާޅުވި އެވެ. 

ޖުމްހޫރީ ޕާޓީއަކީ ރާއްޖޭގައި އުފައްދާފައިވާ ސިޔާސީ ޕާޓީތަކުގެ ތެރެއިން ތިން ވަނައަށް އެންމެ ބޮޑު ޕާޓީއެވެ. އެގޮތުން އެ ޕާޓީގައި 18000 މެމްބަރުން ތިބެއެވެ. 

ޕާޓީއަށް މީހުން އިތުރު ކުރުމުގެ މަސައްކަތް ޖޭޕީއިން ކުރަމުންދާއިރު، އެ ޕާޓީއަކީ މިހާރު މިއޮތް ސަރުކާރުގެ އެންމެ ބޮޑު އެއް ހިއްސާދާރެވެ.