މި އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޓިކެޓު ހަވާލު ކުރުމަށް އެ ޕާޓީއިން ރޭ ބޭއްވި ޖަލްސާގައި، ގިނަ ބައެއްގެ ނަޒަރު ހުއްޓުނީ ޑިފެންސް މިނިސްޓަރު މާރިޔާ ދީދީ ދެއްކެވި ވާހަކަފުޅަކަށެވެ.

އިންޑިޔާ ދިފާއުކޮށް، ދިވެހި ރައްޔިތަކަށް ފާޑުވިދާޅުވެ މާރިޔާ ދެއްކެވި ވާހަކަފުޅަކަށް ގުޅިގެން މިއަދު މުޅި ސޯޝަލްމީޑިޔާގައި ގިނަ ބަޔަކު ދަނީ އެކަމަނާއާ ދެކޮޅަށް ވާހަކަ ދައްކަމުންނެވެ.

މާރިޔާ ފާޑުވިދާޅުވެފައި ވަނީ، ބޭސްފަރުވާއަށް އިންޑިއާއަށް ދިޔުމުން ޑީޕޯޓުކޮށްލި ޕީޕީއެމް ހުޅުމާލެ ދާއިރާގެ ރައީސް އަބްދުއް ޞަމަދަށެވެ.

ޞަމަދު އާއިލާއާއެކު އިންޑިއާއަށް ބޭސްފަރުވާއަށް ކުރި ދަތުރުގައި، އިންޑިއާގެ މަނިޕާލް ހޮސްޕިޓަލުން ހައްޔަރުކޮށް އިމިގްރޭޝަންގެ ބެލުމުގެ ދަށުގައި ދެ ދުވަސް ބަހައްޓާފައިވާއިރު، އޭނާ ބަހައްޓާފައި ހުރީ ފިނި ކޮޓަރިއެއްގައި ކަމަށް ޞަމަދު ވަނީ ކިޔައިދީފަ އެވެ. 

އެތަނުގައި އޭނާ ބަހައްޓާފައި ހުރިއިރު، އޭނާއަށް ގަޑިން ގަޑިއަށް ދޭން ޖެހޭ ބޭސްތައް ނުދީ، ކާން ނުދިނުމުގެ ސަބަބުން އަނބުރައިގަނެ އަވަސް ފަރުވާދޭން ޖެހުނުމަށް ޞަމަދު ވިދާޅުވެފައި ވެއެވެ. 

އެކަމަށް އަލިއަޅުވާލައި ރޭ މާރިޔާ ދެއްކެވި ވާހަކަފުޅުގައި ވިދާޅުވީ އެކަމަނާއާއި އެ މިނިސްޓްރީ ހަވާލުކުރައްވަމުން، ގައުމީ ދިފާއީ ބާރަކީ ފަޚުރުވެރި ގާބިލު ސިފައިން އުފައްދާ ތަނަކަށް ހެއްދެވުމަށް ރައީސް ޞާލިހު އެދިވަޑައިގެންނެވި ކަމަށެވެ. 

ދިފާއީ ބާރުގައި ގިނަ ދުވަސްތަކެއް ވަންދެން މަސައްކަތް ކުރިކަމަށް ވިދާޅުވާ ޞަމަދު އިންޑިއާއިން އަނބުރާ ފޮނުވާލުމާއި ގުޅިގެން ހިއްސާކުރި ވާހަކަތަކަމަށް ބަލާއިރު، މި ސަރުކާރުގައި ގާބިލު ސިފައިން އުފެއްދިފައިވާކަމުގެ އިހުސާސް ކުރެވޭކަމަށް މާރިޔާ ވިދާޅުވި އެވެ. 

ޞަމަދަކީ ކުރިން ދިފާއީ ބާރުގައި މަސައްކަތް ކުރެއްވި ނަމަވެސް މިހާރު ރިޓަޔާޑް ބޭފުޅެކެވެ. އަދި ހިތުގެ ބައްޔަށް ބޭސްކުރަމުންދާ ބޭފުޅެކެވެ.

މިއަދު ސިޔާސީ މައިދާނުގައި ހަރަކާތްތެރިވަމުން ދާއިރު، ޞަމަދަކީ ގަވައިދާއި ޚިލާފަށް ރާއްޖޭގެ އެކި ކަންކޮޅުތަކުގައި ގާއިމުވެތިބި އިންޑިއާ ސިފައިން އަނބުރާ ފޮނުވާލުމަށް ގޮވާލާ ކުރިއަށް ގެންދާ ހަރަކާތްތަކުގައި އިސްކޮށް ހަރަކާތްތެރިވާ ބޭފުޅެކެވެ. 

"އިންޑިއާ އައުޓު" ކެމްޕޭނުގައި ބައިވެރިވެ އިންޑިއާ ސިފައިން ތިބުމާއި ދެކޮޅަށް އަޑުއުފުލާ ފަރާތްތަކަށް އިންޑިއާއިން ބޭނުން އަދަބެއް ދިނުމަކީ މައްސަލައެއް ނޫންކަމަށް ދޭހަވާ މޭރުމުން ވާހަކަފުޅު ދައްކަވަމުން މާރިޔާ ވިދާޅުވީ ޞަމަދު އިމިގްރޭޝަންގެ ފިނި ކޮޓަރެއްގައި ބަހައްޓާލުމުން، އެކަމަށް ކެތް ނުކުރެވުނީ ފިނޑިކަމުން ކަމަށެވެ.

އެއާއި ޚިލާފަށް މިހާރު ސިފައިންގެއިން ތަމްރީނު ކުރާ ސިފައިންނަކީ ފިނިކޮޓަރިއަކަށް ލައިގެން ރޯނެ ބައެއް ނޫން ކަމަށް މާރިޔާ ވިދާޅުވި އެވެ. 

އެކަމާ ގުޅިގެން އާއްމު ރައްޔިތުންނާ ހަމައިން ފެށިގެން ސިޔާސީ ބޮޑެތި މަގާމުތަކުގައި ތިއްބެވިި ބޭފުޅުން ވަނީ މާރިޔާއަށް ފާޑުކިޔާފައެވެ. 

އޭގެ ތެރޭގައި ހިމެނިވަޑައިގަންނަވާ އެއް ބޭފުޅަކީ މަހިބަދޫ ދާއިރާގެ މަޖިލިސް މެމްބަރު އަހުމަދު ޠާރިގެވެ، ޠާރިގު ވިދާޅުވީ ޑިފެންސް މިނިސްޓަރު އެ ހުންނެވީ ކޮންޕްރޮމައިޒް ވެފައި ކަމަށެވެ.

މީގެ އިތުރުން ވިލިމާލޭގެ ދާއިރާގެ މަޖިލިސް މެމްބަރު އަހުމަދު އުޝާމް ކުރެއްވި ޓުވީޓެއްގައި ވިދާޅުވީ މާރިޔާގެ އެ ބަސްތައް ބަލައި ނުގަނެވޭ ކަމަށެވެ. ‏

މާރިޔާގެ އެ ވާހަކަފުޅުތަކަށް ދިޔާނާ ސައީދުވެސް ވަނީ ފާޑުވިދާޅުވެފައެވެ.

ދިޔާނާ ވިދާޅުވީ، "އިންޑިޔާ އައުޓް" ކެމްޕޭނަށް ތާއީދު ނުކުރައްވާ ކަމަށާއި ނަމަވެސް ދިވެހި ރައްޔިތަކު ހުށަހެޅުނު ވޭނާ ތަކުލީފަށް އޭނަޔާމެދު ރަހުމުކުރުން އެއީ އޮތް ކަމެއް ކަމަށާއި އަދި ސިޔާސީ ފިކުރަށް ބަލައި ފަރަގު ނުކޮށް އޭނާގެ އިންސާނީ ކަރާމާތް ނެގެހެއްޓުމަކީ ވަޒީރުގެ ދުސްތޫރީ ވާޖިބެއް ކަމަށެވެ.

ރޭ އެމްޑީޕީގެ ރިޔާސީ ޓިކެޓް ހަވާލު ކުރުމަށް ބޭއްވި ރަސްމިއްޔާތުގައި ގިނަ ބައެއްގެ ފާޑުކިޔުން މާރިޔާއަށް އަމާޒުވެފައި ވަނީ އެކަމަނާ ދެއްކެވި ވާހަކަފުޅާ ގުޅިގެންނެވެ.