ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް އޮތް ތާއީދު ފެނި އިދިކޮޅުން ތެޅި ފޮޅެން ފަށައިފިކަމަށް ޑިފެންސް މިނިސްޓަރު މާރިޔާ ދީދީ ވިދާޅުވެއްޖެ އެވެ. 

ޑިފެންސް މިނިސްޓަރު މާރިޔާ ދީދީ މިފަދައިން ވިދާޅުވެފައިވަނީ އެކަމަނާގެ އިސްތިއުފާއަށް ގޮވާލާ އިދިކޮޅުން އެކަމަނާގެ ގެކޮޅު ކުރިމަތީގައި މުޒާހަރާކުރަން ފެއްޓެވުމުން، ކުރެއްވި ޓްވީޓެއްގަ އެވެ. 

މާރިޔާ ވިދާޅުވީ އެމްޑީޕީގެ ރިޔާސީ ޓިކެޓު ރައީސް ޞާލިހަށް އެރުވުމަށް ބޭއްވި ރަސްމިއްޔާތަށް ހާޒިރުވި މީހުންގެ އަދަދަށް ބަލާއިރު އެއްބުރުން އެމަނިކުފާނު ރިޔާސީ އިންތިޚާބު ކާމިޔާބު ކުރައްވާނެކަން އިދިކޮޅަށްވެސް މިހާރު ވިސްނިއްޖެ ކަމަށެވެ. 

އެހެންކަމުން އިދިކޮޅުން މިހާރު މަސައްކަތް ކުރަނީ އެމްޑީޕީގެ އެންމެ ފުރަތަމަ ވެރިކަން 2012 ފެބުރުއަރީ 7 ގައި ބަދަލުކުރި ގޮތަށް އިންތިޚާބަކާއި ނުލާ ބަދަލުކުރުމަށްކަމަށް މިނިސްޓަރު މާރިޔާ ވިދާޅިވި އެވެ. 

މިނިސްޓަރު މާރިޔާ ވިދާޅުވީ އިދިކޮޅުން ތެޅިފޮޅުނަސް ކުރިއަށް އޮތް ރިޔާސީ އިންތިޚާބު ކާމިޔާބުކުރައްވާ ނޮވެމްބަރު 11 ގައި ހުވާކުރައްވާނީ ރައީސް ޞާލިހުކަމަށެވެ. 

އިދިކޮޅުން މިރޭ ޑިފެންސް މިނިސްޓަރު މާރިޔާ ދީދީގެ ގެކޮޅު ކުރިމަތީގައި މުޒާހަރާކުރަން ފެށީ، އިންޑިއާއަށް ބޭސްފަރުވާއަށް ދިޔަ ޕީޕީއެމްގެ ހުޅުމާލެ ދާއިރާގެ ރައީސް އަބްދުއްޞަމަދު ހައްޔަރުކޮށް ކުރިމަތިވި ކަންތައްތަކާއި ގުޅިގެން ފުރައްސާރަކޮށް، މަލާމާތްކޮށް މާރިޔާ ވާހަކަދެއްކެވުމާއި ގުޅިގެންނެވެ. 

ޑިފެންސް މިނިސްޓަރުގެ މަގާމުގައި ހުންނަވާ ދިވެހި ރައްޔިތަކަށް މާރިޔާ މަލާމާތްކުރީ އިންޑިއާ ރުއްސުމަށްކަމަށް އިދިކޮޅުން ވަނީ ބުނެފައެވެ. އަދި އެފަދަ ކަންކަން ބަލައިނުގަންނަކަމަށް އިދިކޮޅުން ވަނީ ބުނެފައެވެ. 

އޭގެ އިތުރުން ޑިފެންސް މިނިސްޓަރު މާރިޔާ ދީދީ ޞަމަދުގެ ކިބައިން މާފަށް އެދުމަށްވެސް އިދިކޮޅުން ވަނީ ގޮވާލާފައެވެ.