ޖުމްހޫރީ ޕާޓީގެ ލީޑަރުގެ މަގާމުގެ އިތުރު ދައުރަކަށް މިހާރުވެސް އެ މަގާމުގައި ހުންްނެވި ގާސިމް އިބްރާހިމް، ވޯޓެއް ނެތި އިންތިހާބު ވެއްޖެ އެވެ.

މިކަން ހާމަކުރައްވައި ޖުމްހޫރީ ޕާޓީގެ ޗީފް ސްޕޯކްސްޕާސަން އަލީ ސޯލިހް ވިދާޅުވީ، ޖޭޕީގެ މަގާމް ތަކަށް ކުރިމަތިލުމުގެ ސުންގަޑި އިއްޔެ ހަމަވެފައިވާއިރު، ޕާޓީގެ ލީޑަރުގެ މަގާމުގެ އިތުރު ދައުރަކަށް ގާސިމް ފިޔަވައި އެހެން ބޭފުޅަކު ކުރިމަތި ނުލައްވާ ކަމަށެވެ. އެހެން ކަމުން ވޯޓެއް ނެތި އެމަނިކުފާނު އެ މަގާމަށް އިންތިހާބުވެފައިވާ ކަމަށް މިމަހު އޮންނަ ކޮންގްރެސްގައި އެކަމަށް ގޮތެއް ނިންމުން ނޯންނާނެ ކަމަށެވެ. 

ޖޭޕީގެ ލީޑަރު ކަމަށް ވާދަވެރިކަމެއް ނެތި ގާސިމް އިންތިޚާބު ވެ ވަޑައިގެންނެވި ނަމަވެސް، ޑެޕިއުޓީ ލީޑަރު ގެ މަގާމަށް ގިނަ ބޭފުޅުން ވާދަކުރައްވާއެވެ. 

Advertisement

އެގޮތުން، ވާދަކުރައްވާ ބޭފުޅުންގެ ތެރޭގައި ޓްރާންސްޕޯޓު މިނިސްޓަރު އައިޝަތު ނަހުލާ، ސްޓޭޓް މިނިސްޓަރު ހަސަން މުޣުނީ، ގާސިމްގެ އެގްޒެކްޓިވް ސެކްރެޓަރީ އިގްބާލް އާދަމް، މިހާރު ވެސް ނައިބު ރައީސް ކަމުގައި ހުންނެވި އަހުމަދު ސައުދު، އިމިގްރޭޝަން ކޮންޓްރޯލާ މުހައްމަދު އަހްމަދު ހުސައިން (ހަނަފީ) އަދި ތިނަދޫ ދެކުނު ދާއިރާގެ ކުރީގެ މެންބަރު އަބްދުالله އަހުމަދު ހިމެނެއެވެ.

ޖުމްހޫރީ ޕާޓީއިން ވަނީ ކުރިއަށް އޮތް ރިޔާސީ އިންތިޚާބުގައި އެ ޕާޓީއިން ވާދަކުރާނެކަން އިއުލާނުކޮށްފަ އެވެ. އެހެން ނަމަވެސް އިންތިޚާބުގައި ވާދަކުރާނީ ޕާޓީއިން ވަކި ކެންޑިޑޭޓެއް ނެރެގެން ކަމެއް ނުވަތަ އެހެން ސިޔާސީ ޕާޓީއަކާއި އެކު ކޯލިޝަން ހަދައިގެން ކަމާމެދު އަދި ވަކި ގޮތެއް ކަނޑައަޅާފައެއް ނުވެއެވެ.

އަސާސީ ގަވާއިދު ބުނާ ގޮތުން އެ ޕާޓީގެ ކެންޑިޑޭޓް އަކަށް ވާނީ ޕާޓީގެ ލީޑަރެވެ. އެގޮތުން، 2008 ވަނަ އަހަރު އާއި 2013 ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރުގައި ޖޭޕީގެ ކެންޑިޑޭޓެއްގެ ގޮތުގައި ޕާޓީގެ ލީޑަރު ގާސިމް ވާދަކުރެއްވިއެވެ.