ރައީސުލްޖުމްހޫޫރިއްޔާ އިބްރާހިމް މުޙައްމަދު ސޯލިހުގެ އަރިސް ބޭފުޅުންގެ ވަފުދެއް، ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާހިމްއާ ބައްދަލުކުރައްވައިފިއެވެ.

ޤާސިމް އިބްރާހިމާއި، ބައްދަލުކުރައްވާފައިވަނީ އެމްޑީޕީގެ ޕާލަމެންޓްރީ ގްރޫޕްގެ ލީޑަރު، އައްޑޫ ހިތަދޫ އުތުރު ދާއިރާގެ މެންބަރު މުޙައްމަދު އަސްލަމާއި، ހުޅުމާލޭ ދާއިރާގެ މެންބަރު އަލީ ނިޒާރުއެވެ.

ރޭގެ ވަގުތެއްގައި ސަން އައިލެންޑް ރިސޯޓުގައި ކުރިއަށްް ގެންދިޔަ މި ބައްދަލުކުރެއްވުމުގެ ތަފްސީލް އެ ދެޕާޓީން ވެސް ހާމަކޮށްފައި ނުވާއިރު މިއީ ކުރިއަށް އޮތް ރިޔާސީ އިންތިޚާބާއި ގުޅޭ ގޮތުން ބޭއްވުނު ބައްދަލުވުމެއް ކަމަށް ބެލެވެއެވެ. އަދި އެންމެ ފަހުން ބޭއްވި އެ ޕާޓީގެ ގައުމީ މަޖިލިސް ބައްދަލުވުމުގައި ޕާޓީގެ ރިޔާސީ ކެންޑިޑޭޓް ރައީސް ޞާލިހް އަށް ވަނީ ކޯލިޝަން ހެދުމުގެ ބާރުވެސް އެ ޕާޓީން ދީފައެވެ. 

ޖުމްހޫރީ ޕާޓީއިން ވަނީ ކުރިއަށް އޮތް ރިޔާސީ އިންތިޚާބުގައި އެ ޕާޓީއިން ވާދަކުރާނެކަން އިއުލާނުކޮށްފަ އެވެ. އެހެން ނަމަވެސް އިންތިޚާބުގައި ވާދަކުރާނީ ޕާޓީއިން ވަކި ކެންޑިޑޭޓެއް ނެރެގެން ކަމެއް ނުވަތަ އެހެން ސިޔާސީ ޕާޓީއަކާއި އެކު ކޯލިޝަން ހަދައިގެން ކަމާމެދު އަދި ވަކި ގޮތެއް ކަނޑައަޅާފައެއް ނުވެއެވެ. އެކަން ކަނޑައަޅާނީ މިމަހު 24 ގައި ބާއްވާ އެ ޕާޓީގެ ކޮންގްރެސް އިންނެވެ. 

ޖުމްހޫރީ ޕާޓީއަކީ ރާއްޖޭގައި އުފައްދާފައިވާ ސިޔާސީ ޕާޓީތަކުގެ ތެރެއިން ތިން ވަނައަށް އެންމެ ބޮޑު ޕާޓީއެވެ. އެގޮތުން އެ ޕާޓީގައި 18000 މެމްބަރުން ތިބެއެވެ. 2008 ވަނަ އަހަރު އާއި 2013 ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރުގައި ޖޭޕީގެ ކެންޑިޑޭޓެއްގެ ގޮތުގައި ޕާޓީގެ ލީޑަރު ގާސިމް ވާދަކުރެއްވިއިރު، އެއިން ކޮންމެ އިންތިޚާބެއްގެ ދެވަނަ ބުރު ކާމިޔާބު ކޮށްފައިވަނީ ޖޭޕީ ކޯލިޝަން ހަދާ ޕާޓީއެވެ. 

އަދި 2018 ވަނައަހަރުގައި ރައީސް ޞާލިހު ވެސް އިންތިޚާބު ކާމިޔާބު ކުރެއްވީ ޖޭޕީ އާއި ކޯލިޝަން ހަދައިގެން ކަމަށްވާއިރު، މިހާރުވެސް ޖޭޕީ އަކީ ސަރުކާރުގެ ކޯލިޝަންގެ ބައިވެރިއެކެވެ.