މަސްތުވާތަކެއްޗަށް ދެވިހިފާފައިވާ މީހުންނަށް ފަސޭހައިން ފަރުވާ ލިބޭނެގޮތަށް ނިޒާމު ބަދަލު ކުރުމަށް ސަރުކާރަށް ގޮވާލައި ޤަރާރެއް ހުށަހަޅައިފިއެވެ.

މި ގަރާރު ހުށަހަޅާފައިވަނީ މަޖިލީހުގެ ހެންވޭރު ހުޅަނގު ދާއިރާގެ މެންބަރު ޙަސަން ލަތީފެވެ. 

މި ގަރާރުގައި ޑްރަގަށް ދެވިހިފާފައިވާ މީހުންނަކީ މުޖްތަމައަށް ފައިދާހުރި ހެޔޮލަފާ ބައެއްގެ ގޮތުގައި އަނބުރާ ގެނައުމަށް ބޭނުންވާ އެންމެ ފެންވަރު ރަނގަޅު ފަރުވާ ލަސްނުވެ ލިބޭނެ ގައުމީ ރިހެބިލިޓޭޝަން ޕްރޮޤްރާމްތައް ހިންގޭނެ ކަމަށް އެޑީޕީގެ މެނިފެސްޓޯގައި ވައުދުވެ ވެފައިވާ ކަމަށް ފާހަކޮށްފައިވެއެވެ.

Advertisement

ނަމަވެސް ސަރުކާރުން މި ވައުދު ފުއްދުމަށް ގެންގުޅޭ ސިޔާސަތާއި ނިޒާމާއި އޮނިގަނޑު ރާވާފައިވާ ގޮތުން އެކަން ހާސިލް ކުރެވެން ނެތް ކަމަށް މި ޤަރާރުގައިވެއެވެ.

މަސްތުވާތަކެއްޗަށް ދެވިހިފާފައިވާ މީހުންނަށް ދޭންޖެހޭ ފަރުވާ ނުލިބި އެމީހުން މުޖުތަމައުގައި ބާކީވެ އަދި އެމީހުންގެ އާއިލާތައް ނިކަމެތި ވެގެންދާ ދިޔުމަށް އަވަސް ހައްލެއް ހޯދުމަށް އިންތިހާއަށް ބޭނުންވެފައިކަމަށް ވެސް ޤަރާރުގައި ބުނެފައިވެއެވެ.

މިއާއިއެކު އެފަދަ މީހުންނަށް ފަރުވާދިނުމަށް އެމްޑީޕީގެ މެނިފެސްޓޯގައިވާ ތަސައްވުރާ އެއްގޮތުށް ފަރުވާ ދެވޭނެ ޤާބިލު ކަން ސަރުކާރުގެ އިންސާނީ ވަސީލަތުގެ ތެރެއަކު ނެތް ކަމަށް ޤަރާރުގައިވެއެވެ. އަދި ދިގު މުއްދަތަކަށް ބައިތިއްބައިގެން ދޭންޖެހޭ ފަރުވާ ދިނުމަށް މި ވަގުތު ރާއްޖޭގައި ހުރި ދެ މަރުކަޒުގައިވެސް، ފަރުވާ ދޭނެ މީހުން ނެތުމުގެ ސަބަބުން އެތަންތަނުގެ ޖާގައިގެ 50 އިންސައްތަވެސް ފާއިތުވި އަހަރު ބޭނުންކުރެވިފައި ނުވާކަން ފާހަގަކޮށްފައިވެއެވެ.

އެހެންކަމުން އިތުބާރު ހިފޭނެ ގޮތަކަށް ފަރުވާ ދެެނެ ނިޒާމެއް، ދިގުނުދައްމައި ސަރުކާރުން އަވަހަށް ޤާއިމު ކުރަންޖެހޭ ކަމަށް ބުނެ ސަރުކާރުގެ އިތުރުން އަމިއްލަ ފަރާތްތައް، ވަކިން ޙާއްސަކޮށް ރާއްޖޭން ބޭރު ތަޖުރިބާކާރު ފަރާތްތަކަށް ފަރުވާ ދިނުމުގެ ފުރުސަތު ހުޅުވާލަންޖެހޭ ކަމަށް ޤަރާރުގައިވެއެވެ.

މިއާއިއެކު މަސްތުވާ ތަކެއްޗަށް ދެވިހިފާފައިވާ މީހުން ބޭނުން ކުރަންޖެހޭ ބޭސް، ވަކި ޙާއްސަ އުސޫލުތަކެއްގެ ތެރެއިން ރާއްޖޭގެ ގިނަ ސަރަހައްދުތަކަކުން ލިބޭން ހުންނަން ޖެހޭ ކަމަށް ވެސް ޤަރާރުގައިވެއެވެ.

މީގެ އިތުރުން މަސްތުވާތަކެއްޗަށް ދެވިހިފަފައިވާ މީހުންނަށް ފެންވަރު ރަނގަޅު ކައުންސެލިންގ ގެ ޙިދުމަތް ދެވޭނެ ޤައުމީ އޮނިގަނޑެއް އެކުލަވާލައި ރާއްޖޭގެ ކޮންމެ ސަރަހައްދެއްގައިވެސް ކައުންސެލިންގ ޙިދުމަތް ދެވޭނެ އިންތިޒާމް ހަމަޖެހިފައި އޮންނަން ޖެހޭ ކަމަށް ބުނެފައިވެއެވެ. އަދި މިކަމަކީ އާސަންދައިގެ ދަށުން ކަވަރު ކުރާ ފައިސާއަކަށް ވާން ޖެހޭނެ ކަމަށްް ވެސް ވަނީ ބުނެފައެވެ.