އެމްޑީޕީގެ ރައީސް މުހައްމަދު ނަޝީދުގެ ފަރާތްޕުޅުން ދެ މަންދޫބުން ޖުމްހޫރީ ޕާޓީގެ ލީޑަރު ޤާސިމް އިބްރާހިމާއި ބައްދަލުކުރައްވައިފި އެވެ. 

އެކަން ހާމަކުރައްވާފައިވަނީ އެ ބައްދަލުވުމުގެ ފޮޓޮއެއް ހިއްސާކުރައްވާ ރައްޔިތުންގެ މަޖިލީހުގެ މަޑަވެލި ދާއިރާގެ މެމްބަރު ހުސެއިން ފިރުޝާނު ކުރެއްވި ޓްވީޓެއްގަ އެވެ. 

ފިރުޝާނު ވިދާޅުވީ ގޮތުގައި "ފިކުރެއްގެ ދިރުން" ޓީމުގެ ފަރާތުން ރައީސް ނަޝީދުގެ މަންދޫބުންގެ ގޮތުގައި ޤާސިމްއާއި ބައްދަލުކުރެއްވީ ގދ އަތޮޅުގެ ކުރީގެ މެމްބަރު މުހައްމަދު ރަޝާދު ހުސެއިން އާއި މަޑަވެލި ދާއިރާގެ ކުރީގެ މެމްބަރު މުހައްމަދު ނާޒިމް އެވެ. 

Advertisement

ރައީސް ނަޝީދުގެ ފަރާތްޕުޅުން ދެ މަންދޫބުން ޤާސިމްއާއި ބައްދަލުކުރައްވާފައި ވަނީ ރައީސް އިބްރާހިމް މުހައްމަދު ޞާލިހުގެ ފަރާތްޕުޅުން ދެ ބޭފުޅަކު ޤާސިމާއި ބައްދަލުކުރެއްވި ފަހުންނެވެ. ރައީސް ޞާލިހުގެ ފަރާތްޕުޅުން ޤާސިމާއި ބައްދަލުކުރައްވާފައިވަނީ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒާއި، އެމްޑީޕީގެ ޕީޖީ ލީޑަރު އަސްލަމެވެ. 

ރައީސް ޞާލިހުގެ ދެ މަންދޫބުން ޤާސިމާއި ބައްދަލުކުރެއްވުން 

އެ ބައްދަލުވުމަށްފަހު ކުރެއްވި ޓްވީޓެއްގައި މެމްބަރު އަލީ ނިޔާޒު ވިދާޅުވީ އެއީ އުންމީދީ ބައްދަލުވުމެއް ކަމަށެވެ. އެމްޑީޕީގެ މިސްރާބު ހުރީ ކޯލިޝަނާއެކު ކުރިއަށް އޮތް ރިޔާސީ އިންތިޚާބު އެއްބުރުން ކާމިޔާބު ކުރުމުގެ މަގަށްކަމަށް އޭނާ ވިދާޅުވިއެވެ. 

ރައީސް ނަޝީދުގެ ފަރާތްޕުޅުން ޤާސިމްއާއެކު ކުރިއަށް ގެންދިޔަ ބައްދަލުވުމުގައި މަޝްވަރާކުރެވުނު ކަންކަން އަދި ހާމަކޮށްފައެއް ނުވެއެވެ. 

ކުރިއަށް އޮތް ރިޔާސީ އިންތިޚާބަށް ތައްޔާރުވުމުގެ މަސައްކަތް ޖުމްހޫރީ ޕާޓީއިން ވެސް ވަނީ ފަށާފައެވެ. އިންތިޚާބުގައި ޖޭޕީން ވާދަކުރާނެކަމަށް ޕާޓީގެ ލީޑަރު ޤާސިމް ވަނީ ވިދާޅުވެފަ އެވެ.

އެހެން ނަމަވެސް ޕާޓީއިން ވާދަކުރާނީ ކޯލިޝަނެއްގެ ތެރެއިންކަން ނުވަތަ ޕާޓީގެ ކެންޑިޑޭޓެއް ނެރެގެންކަން ކަނޑައަޅާނީ މި މަހުގައި އޮންނަ ޖޭޕީގެ ގައުމީ ކޮންގްރެސްއަށްފަހު އެކުލަވާލާ ކައުންސިލުންކަމަށް ޖޭޕީއިން ވަނީ ބުނެފައެވެ.