މާލޭ އެރޭޓެޑް ވޯޓާ އެންޑް ސުވަރޭޖް ކޮމްޕެނީގެ އެންމެ ބޮޑު އަމާޒަކީ ސިންގަލް ޔޫސް ޕްލާސްޓިކާއި ދުރުވެ ތިމާވެއްޓާއި ރައްޓެހި ގޮތަކަށް ފެން އުފެއްދުން ކަމަށް އެކުންފުނީގެ މެނޭޖިންގ ޑިރެކްޓަރ ހަސަން ޝާހް ވިދާޅުވެއްޖެއެވެ.
އެމްޑަބްލިޔުއެސްސީގެ މެނޭޖިންގ ޑިރެކްޓަރ ޙަސަން ޝާޙް މިހެން ވިދާޅުވީ ދައުލަތުގެ މީޑިއާގައި ވާހަކަދައްކަވަމުންނެވެ.
ޝާޙް ވިދާޅުވީ ސިންގަލް ޔޫސް ޕްލާޓިކާ ދުރުވެ ތިމާވެއްޓާ ރައްޓެހި ގޮތަކަށް ފެނުގެ ޚިދުމަތް ފޯރުކޮށްދިނުމަށް މިހާރުވެސް ގިނަ މަސައްކަތްތަކެއް ކުރަމުންއަންކަމަށެވެ. އެގޮތުން ޖަޕާންގެ ހިޓާޗީ ޒޯސެން ކުންފުންޏާ ރިނިއުބަލް އެނަރޖީ މޯލްޑިވްސްއާ އެމްޑަބްލިޔުއެސްސީ ގުޅިގެން 500 ކިލޯވޮޓްގެ ކަރަންޓް އުފެއްދޭ ވަރުގެ ސޯލާ ސިސްޓަމެއް ހަރުކުރުމުގެ މަސައްކަތް ކުރިއަށްދާކަމަށް ޝާހް ވިދާޅުވިއެވެ. އެ ސޯލާ ސިސްޓަމަކީ 1450 ކިލޯވޮޓްގެ ބެޓެރި ސިސްޓަމަކާއެކު ޤާއިމް ކުރާ އިޔާދަ ކުރުވަނިވި ހަކަތައިގެ ސިސްޓަމެކެވެ.
ޝާޙް ވިދާޅުވީ ފެން އުފެއްދުމަށް އަހަރެއްގެ މައްޗަށް މިހާރު 400 މިލިއަން ރުފިޔާގެ ޑީސަލް ބޭނުން ކުރާކަމަށެވެ. އަދި ޑީސަލް އެންދުން ހުއްޓާލައި އިޔާދަ ކުރަނިވި ހަކަތައިން ފެން އުފައްދަން ފެށުމުން ކުންފުނީގެ މާލީ ހާލަތު ބޮޑުތަނުން ރަނގަޅުވާނެކަމަށްވެސް އޭނާ ވިދާޅުވިއެވެ.. ޝާޙް އިތުރަށް ވިދާޅުވީ، ސަރުކާރުގެ ސިޔާސަތާ އެއްގޮތަށް އަމަލު ކުރުމުގެ ގޮތުން 300 އެމްއެލް ޕްލާސްޓިކް ފުޅީގައި ފެން ބަންދު ކުރުން މިހާރު ހުއްޓާލާފައިވާކަމަށެވެ. އަދި މިއަހަރު ނިމޭއިރު ޕްލާސްޓިކް ފުޅީގައި މިހާރު ބަންދުކޮށް ވިއްކަމުން ގެންދާ 500 އެމްއެލްގެ ފުޅީގައި ފެންބަންދުކުރުން ހުއްޓާލާނެކަމަށެވެ. ނަމަވެސް މިކަން ކުރާނީ ރައްޔިތުންނަށާއި ވިޔަފާރިތަކަށާއި ކުންފުންޏަށް ގެއްލުން ނުވާނެ ގޮތަކަށް ބަލައިގެން ކަމަށް ޝާޙް ވިދާޅުވިއެވެ.
ޝާހު ވިދާޅުވީ އެކަމަށް އެބަ ތައްޔާރީތަކެއް ވާކަމަށެވެ. އެގޮތުން ފެން ބަންދުކުރުން ހުއްޓާލުމުން ކުންފުންޏަށް ގެއްލުންތަކެއް ވާނެ ކަމަށާއި، އެހެން ނަމަވެސް އެކަން ހުއްޓާލުމުގެ ކުރިން ބާޒާރަށް 2 ލީޓަރު ނުވަތަ 2500 ލީޓަރުގެ ފެންފުޅި ނެރުމަށް މިހާރު މިދަނީ މަޝްވަރާތައް ކުރަމުން ކަމަށް ޝާޙު ވިދާޅުވިއެވެ.
އެމްޑަބްލިއުއެސްސީން އަންނަނީ ރާއްޖެގެ އެކި ރަށްރަށުގައި ފެނާއި ނަރުދަމާ ނިޒާމް ޤާއިމްކުރުމުގެ މަސައްކަތްތައްވެސް ކުރަމުންނެވެ. އެގޮތުން މިހާރުވެސް ތިރީހަށް ވުރެ ގިނަ ރަށުގައި ފެނާއި ނަރުދަމާ ޤާއިމް ކުރުމުގެ މަސައްކަތް އެކުންފުނިން އަންނަނީ ކުރަމުންނެވެ.
Advertisement
This content is created and paid for by advertisers and does not involve Voice Journalists
