ކިއުއާރުކޯޑު ބޭނުންކޮށްގެން ކުރެވޭ މުއާމަލާތްތަކަށް ބީއެމްއެލްއިން ބަދަލު ގެނެސްފިއެވެ.

ބޭންކުން ބުނީ މިއަދުން ފެށިގެން ބޭންކުގެ މޮބައިލް ވޮލެޓް މެދުވެރިކޮށް ކިއުއާރު ބޭނުންކޮށްގެން ކުރެވޭ މުއާމަލާތްތަކަށް ބަދަލުތައް ގެނެސްފައިވާ ކަމަށެވެ. އެގޮތުން؛

* ކިއުއާރު ބޭނުންކޮށްގެން މޮބައިލް ވޮލެޓުން ކުރެވޭ ކޮންމެ މުއާމަލާތެއްގެ އެންމެ މަތީ އަދަދަކީ 750 ރުފިޔާ

Advertisement

* ކިއުއާރް ބޭނުންކޮށްގެން މޮބައިލް ވޮލެޓުން ދުވާލެއްގެ މައްޗަށް ކޮންމެ ކަސްޓަމަރަކަށް ކުރެވޭނީ ގިނަވެގެން 10 މުއާމަލާތް

މި ލިމިޓަށްވުރެ ގިނައިން ބޭނުންކުރާ ކަސްޓަމަރުންނަށް ކާޑު ބޭނުންކޮށްގެން މުއާމަލާތު ކުރުމުގެ ފުރުސަތު ލިބޭނެ ކަމަށް ބީއެމްއެލްއިން މައުލޫމާތު ދެއެވެ.

ބީއެމްއެލްއިން މިފަދަ ބަދަލެއް މިއަދު ގެނެސްފައި ވާއިރު، ބޭންކުގެ ކަސްޓަމަރުންގެ ކާޑުގެ ނުވަތަ ކަސްޓަމަރެއްގެ އެއްވެސް އެހެން މައުލޫމާތެއް އާންމުވެފައިވާ ނުވާނެ ކަމަށް އެ ބޭންކުން އިއްޔެ ވަނީ ބުނެފިއެވެ.

ސޯޝަލް މީޑިއާގައި ބީއެމްއެލްގެ ކާޑުތަކުގެ މައުލޫމާތު ހާމަވެފައިވާކަމަށް ބުނެ ދެކެވެމުންދާ ވާހަކަތަކާ ގުޅޭ ގޮތުން އެ ބޭންކުން ނެރުނު ބަޔާނެއްގައި ބުނީ، އެ ބޭންކް އިން ކަސްޓަމަރުންގެ ކާޑުގެ ނުވަތަ ކަސްޓަމަރެއްގެ އެއްވެސް އެހެން މައުލޫމާތެއް އާންމު ނުވާނެ ކަމަށެވެ.

އެހެން ނަމަވެސް ބައެއްފަހަރު ސްކޭމް ހިންގާ ފަރާތްތަކުން ދުނިޔޭގެ އެކި ކަންކޮޅުތަކުގައި މަރޗަންޓުންނާއި އީކޮމަރސް މަރޗަންޓުންގެ ޕޭމަންޓް ސިސްޓަމަށް ވަދެ ކަސްޓަމަރުންގެ ކާޑުގެ މައުލޫމާތުތައް ވަގަށް ނަގާ ކަމަށާ، މިފަދަ ގޮތަށް ކާޑުގެ މައުލޫމާތު އާންމުވާ ހާލަތްތަކުގައި މުޅި ދުނިޔެއަށް ބަލާއިރު އެތައް މިލިއަން ކަސްޓަމަރުންނަށް އޭގެ އަސަރުކުރާ ކަމަށެވެ.

ބީއެމްއެލް އިން ބުނީ، ކަސްޓަމަރުން ރައްކާތެރިކުރުމަކީ ބޭންކުން އެންމެ އިސްކަންދޭ ކަމަކަށް ވީހިނދު، ބޭންކުން އަންނަނީ ކާޑުގެ ރައްކާތެރިކަން ކަށަވަރުކޮށް އަދި ކާޑުގެ މައުލޫމާތު ހާމަވެދާނެފަދަ އަމަލެއް ހިނގަމުންދޭތޯ އަބަދުވެސް މޮނިޓަރކުރަމުން ކަމަށެވެ.