900 އަށްވުރެ ގިނަ މަންދޫބުންނާއެކު ޖުމްހޫރީ ޕާޓީގެ 4 ވަނަ ގައުމީ ކޮންފަރެންސް މާދަން ފަށާނެކަން އިއުލާނުކޮށްފި އެވެ. 

އެ ކޮންފަރެންސާއި ގުޅޭ އެންމެ ފަހުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޕާޓީގެ ސެކެޓްރީ ޖެނެރަލް އަލީ އާރިފް ވިދާޅުވީ މި ކޮންފަރެންސަށް ވަރަށް ބޮޑު ތަރުހީބެއް ލިބިގެން ގޮސްފައިވާކަމަށެވެ.

އެގޮތުން 1000 އާއި ގާތްކުރާ އަދަދަކަށް ރާއްޖޭގެ އެކި ކަންކޮޅުތަކުން ޖޭޕީގެ މަންދޫބުން ކޮންފަރެންސްގައި ބާއިވެރިވާނެކަމަށް އޭނާ ވިދާޅުވި އެވެ. 

އެއާއެކު އެ އެންމެ ބޭފުޅުންނާއި، ސިޔާސީ ޕާޓީތަކުގެ އިސްވެރިންނަށް ދައުވަތުދީގެން ބާއްވާ ޖޭޕީގެ ގައުމީ ކޮންފަރެންސް ފެށުމުގެ ރަސްމިއްޔާތު މާދަމާ މެންދުރުފަހު 14:30 އޮންނާނެކަމަށް އާރިފް ވިދާޅުވި އެވެ. 

އާރިފް ވިދާޅުވީ ރަސްމީ ޖަލްސާއަށްފަހު ޖޭީގެ އަސާސީ ގަވައިދަށް ކޮންފަރެންސްގެ ބައިވެރިންގެ ތާއީދަށް އެހުން އޮންނާނެ ކަމަށެވެ. އަސާސީ ގަވައިދަށް ގެންނަން ޖެހޭ ބަދަލުތައް ފާސްކުރާނީ ކޮންފަރެންސްގެ ބައިވެރިންގެ އަގުލަބިއްޔަތުންކަން އޭނާ ފާހަގަކުރެއްވި އެވެ. 

ކުރިއަށް އޮތް ރިޔާސީ އިންތިޚާބަށް ގޮތް ނިންމުމަށް، ގައުމީ ކޮންފަރެންސްއަށް މިހާރު ވަނީ ގަރާރެއްވެސް ހުށައަޅާފަ އެވެ. އެ ގަރާރު ހުށައަޅުއްވާފައިވަނީ މަޖިލީހުގެ ތިނަދޫ އުތުރު ދާއިރާގެ ކުރީގެ މެންބަރު އަބްދުالله އަހްމަދެވެ.

އެ ގަރާރު ވަނީ ހޮނިހިރު ދުވަހުގެ އެޖެންޑާގައި ހިމަނާފަ އެވެ. އެގޮތުން ގަރާރަށް ބަހުސް ކުުރުން އޮންނާނީ އެ ދުވަހުގެ މެންދުރު ފަހު 2:30 ގައެވެ. ގަރާރަށް ބަހުސް ކުރުމަށް ދޮޅުގަޑިއިރު ވަނީ ކަނޑައަޅާފަ އެވެ.

އާރިފް ވިދާޅުވީ އެ ގަރާރަށް ބަހުސްކުރުމަށް އެދިވަޑައިގަންނަވާ ހުރިހާ ބޭފުޅުންނަށް އެ ފުރުސަތު ދެއްވާނެކަމަށެވެ. އެ ގަރާރާމެދު އެ ދުވަހު ހަވީރު 4:00 ގައި ގޮތް ނިންމަން ވޯޓަށް އަހަން ވެސް ވަނީ އެޖެންޑާ ކޮށްފަ އެވެ.

ރިޔާސީ އިންތިާޚުގައި ޕާޓީގެ ކެންޑިޑޭޓެއް ނެރެގެން ވާދަކުރުމާއި ގުޅޭގޮތުން ގޮތެއް ނިންމާނީ ގައުމީ ކޮންފަރެންސަށްފަހު ނަގާ ކައުންސިލުންކަމަށް ޖުމްހޫރީ ޕާޓީއިން ވަނީ މީގެ ކުރިން ބުނެފައެވެ. އެހެން ނަމަވެސް މި ގަރާރާއެކު އެކަމަށް ގޮތެއް ނިންމުން އަވަސް ވެގެންދާނެއެވެ. 

ރިޔާސީ އިންތިޚާބަށް ޖޭޕީން ވާދަކުރާނަމަ އެ ޕާޓީގެ ކެންޑިޑޭޓަކަށް ވާނީ ޕާޓީގެ ލީޑަރު ޤާސިމް އިބްރާހިމެވެ. 

މިއަދުގެ ޕްރެސް ކޮންފަރެންސްގައި ވާހަކަދެއްކެވި ހުރިހާ ބޭފުޅުންވެސް ވަނީ އަންނަ ރިޔާސީ އިންތިޚާބުގައި ޖޭޕީން ވަކި ކެންޑިޑޭޓަކާއި އެކު ވާދަކުރުމުގެ ޝައުގުވެރިކަން ހުރިކަން ފާޅުކޮށްފައެވެ. އަދި އެފަދައިން ވާދަކުރަން ބޭނުންވާކަމަށް ވިދާޅުވެފައެވެ. 

އެހެން ނަމަވެސް އެ ނިންމުން ނިންމާނީ މާދަން ފެށޭ އެ ޕާޓީގެ ގައުމީ ކޮންފަރެންސްގައެވެ. އަދި ޖޭޕީގެ އެ ނިންމުމަކީ މިއަދު ގިނަ ރައްޔިތުން ބަލަން ބޭނުންވެފައި ތިބި ނިންމުމެއްކަމަށް ޕާޓީގެ ސެކެޓްރީ ޖެނެރަލް އާރިފް ވިދާޅުވިއެވެ.