އއ އުކުޅަހަށް އުފަން އަހްމަދު ފަޔާޒަކީ ލޮލަށްނުފެނުނަސް ހިންގުންތެރި ޒުވާނެކެވެ. އުކުޅަހުގައި ހިންގާ ހޯޕް ޖަމިއްޔާގެ ރައީސް އަކީވެސް ފަޔާޒެވެ.
ހޯޕް ޖަމިއްޔާ އާއި ފަޔާޒް މިހާރު މަސައްކަތް ކުރަމުންދަނީ އެރަށުގެ ޔަތީމު ކުދިން ކޮޅެއްގެ ގެ ހެދުމުގެ މަސައްކަތެވެ. މި ޕޮރެޖެކްޓުގެ ފުރަތަމަ ފިޔަވަހީގެ ދަށުން މިހާރުވަނީ އެގޭގެ ބަދިގެ ހަދައި ނިންމައި އެ އާއިލާއާއި ހަވާލުކޮށްފައެވެ.
މިކަމާއި ގުޅިގެން "ވޮއިސް" އަށް ދެއްވި ބަސްދީގަތުމެއްގައި ފަޔާޒް ވިދާޅުވީ، 4 ކުދިންނާއި އެކު އެކަނިވެރި މަންމައަކު ދިރިއުޅެމުންދާ މިގެ މަރާމާތުކޮށް ހެދުމުގެ މަސައްކަތުގައި ރަށުގެ އަމިއްލަ ފަރާތްތަކާއި ބައެއް ޖަމިއްޔާތަކުގެ އެހީތެރިކަން ލިބެމުންދާކަމަށެވެ. އަދި މިކަމުގައި އިސްކޮށް އުޅެނީ ހޯޕް ޖަމިއްޔާ އާއި ޚިދްމަތް ޖަމިއްޔާކަން ފަޔާޒް ފާހަގަ ކުރެއްވިއެވެ.
"ޢަމަލީ ގޮތުން ބައެއް ފަހަރު އެކަހަލަ މަސައްކަތް ކޮށްއުޅެން އަޅުގަނޑުވެސް، އެވަގުތު އެތަނަށް އަރާ ލެވުނީމަ، މީހުން މަދު ވަގުތަކަށް ވީމަ މަސައްކަތުގައި ބައިވެރިވެލީ، ބައިވެރިވެލެވުނީމަ ވަރަށް އުފާވި، ނުކުޅެދުންތެރިކަން ހުންނަ މީހަކަށް ވެފައި، އަޅުގަނޑަކީވެސް ބޭނުން ޖެހިފައި ވާ މީހަކަށް ވެފައި، އެއިހުސާސްތައް އަޅުގަނޑަށް އެނގޭ، އަޅުގަނޑު އެއްޗަކަށް ބޭނުންވެފައި ހުންނަ ވަގުތު އެއްޗެއް ލިބުނީމަ ވާ އުފާ އިހްސާސް ކުރެވޭ، އެހެން ވީމަ އެހެން ބަޔަކަށް އަޅުގަނޑު މެދުވެރިވެގެން އެހީ ތެރިކަން ފޯރުކޮށްދެވުނީމަ ވަރަށް ހިތްހަމަޖެހޭ"
އަހްމަދު ފަޔާޒު
މިހާރު ކުރިއަށްދާ ޕްރޮޖެކްޓުގެ ޢަމަލީމަސައްކަތުގައި ފަޔާޒް އަދި ޖަމިއްޔާގެ ބައިވެރިން
މި ޕްރޮޖެކްޓް ރޯދަ މަސް ފެށެން ވާއިރަށް ނިންމާލުމަކީ އެޖަމިއްޔާގެ އަމާޒުކަމަށް ފަޔާޒް ބުންޏެވެ. މިމަސައްކަތް ފެށިތާ މިހާރު ތިން މަސް ވެފައި ވާކަމަށާއި އެކި އެކި ގޮންޖެހުން ތަކާއި އެކު މިހާހިސާބަށް މިމަސައްކަތް ގެންދެވިފައިވާ ކަމަށް ފަޔާޒް ބުންޏެވެ.
އެގޮތުން ކައްކާ ކެވޭނެ ގޮތަށް ބަދިގެ ހަދައި ހަވާލު ކުރެވިފައި ވާކަމަށާ އަދި ސިޓިންގރޫމާއި ގޭގެ އެކި ތަންތަނުން ވާރޭ ވެހޭނަމަ ފެން ވަންނާތީ އެކަންކަން ރަނގަޅު ކުރާނެ ކަމަށް ފަޔާޒް ބުންޏެވެ.
ފަޔާޒް އިތުރަށް ބުނީ ގެ މަރާމާތު ކޮށް ހަދައި ނިންމާ ހަވާލު ކުރާނީ ފަރުނީޗަރާއި ހިފައި ގެންގުޅޭ ސާމާނާއި ކަރަންޓު ސާމާނާއި އެކުގައި ކަމަށެވެ.
މީގެ އިތުރުން ފަޔާޒް ފާހަގަ ކުރި އެންމެ މުހިންމު ކަމަކީ ގެ ހަދައި ކަރަންޓު ސާމާނާއި އެކު ގެ ހަވާލުކުރުމުން އެއާލާއަށް އިތުރު ބުރައަކަށް ވެދާނެ ކަމަށް ވިސްނައި، އެ ގޯތީގެ ބާކީ އޮތް ބިމުގައި ތަނެއް އިމާރާތް ކޮށް އެތަން އެހެން ބަޔަކަށް ކުށްޔަށްދީ އެތަނުން އެއާއިލާއަށް ފައިސާ ލިބޭނެ ގޮތެއް އިންތިޒާމު ކުރާނެ ކަމަށެވެ.
ފަޔާޒް އިސްވެ ހުރެ ހިންގާ އުކުޅަސް ހޯޕަކީ އެރަށުގައި ފާހަގަ ކޮށްލެވޭ ޖަމިއްޔާއެކެވެ. ރަށުގައި ހިންގާ އިޖްތިމާއީ އަދި ދީނީ ހަރަކާތް ތަކުގެ ކުރީ ސަފުން ފަޔާޒު އާއި އެނާގެ ޖަމިއްޔާގެ މެމްބަރުން ފެނިގެންދެއެވެ.
Advertisement
This content is created and paid for by advertisers and does not involve Voice Journalists
