އަސްކަރީ ދާއިރާއިން ރާއްޖެއާއި ޔޫއޭއީއާއި ދެމެދު އޮތް ގުޅުން ވަރުގަދަ ކުރުމާއި ގުޅޭގޮތުން މަޝްވަރާކުރައްވައިފިއެވެ.

މިހާރު އަބޫދާބީގައި ކުރިއަށްދާ އިންޓަރނޭޝަނަލް ޑިފެންސް އެގްޒިބިޝަން 2023ގެ ތެރެއިން ޔޫއޭއީގެ އަސްކަރިއްޔާގެ ޗީފް އޮފް ސްޓާފް ލެފްޓިނެންޓް ޖެނެރަލް އިންޖިނިއަރ ޢީސާ ސައިފް ބިން އަބްލަން އަލް މަޒްރޫއީ އާއި މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީ ވަނީ ބައްދަލުކުރައްވާފައެވެ.

މިބައްދަލުކުރެއްވުމުގައި ދެފަރާތުންވެސް ވަނީ މިހާރު ކުރިޔަށްދާ ޑިފެންސް އެގްޒިބިޝަންތައް ފަދަ ބައްދަލުވުންތަކުގެ މުހިއްމުކަން ފާހަގަކުރައްވާފައެވެ. އަދި އަސްކަރީ ދާއިރާއިން މުޅި ދުނިޔޭގެ ސަލަމާތާއި ރައްކާތެރިކަން ކަށަވަރު ކުރުމުގައި ކަމާއި ގުޅޭ ހުރިހާ ފަރާތެއް އެއްތަނަކަށް ޖަމާވެ އަމާންކަން ކަށަވަރުކުރުމުގައި ހުރި ހިރާސްތައް ދެނެގަނެ މަޝްވަރާކުރެވޭނެ މަންސައެއް މިފަދަ ބައްދަލު ވުން ތަކުގެ ސަބަބުން ލިބިފައިވާކަންވެސް ފާހަގަކުރައްވާފައެވެ.

Advertisement

އެގޮތުން މިފަދަ ބައްދަލުވުންތަކުގައި ގޮތް ނިންމާ ފެންވަރުގެ ބޭފުޅުންނާއި އަސްކަރިއްޔާގެ އެކި ފަރާތްތަކުން ބައިވެރިވުމަކީ މިކަމުން ނަތީޖާ ނެރެވިދާނެކަމެއްކަން މާރިޔާއާއި ޔޫއޭއީގެ ޗީފް އޮފް ސްޓާފްވެސް ވަނީ ފާހަގަކުރައްވާފައެވެ.

މިބައްދަލުކުރެއްވުމާއި ގުޅޭގޮތުން ކުރެއްވި ޓުވީޓެއްގައި ޑިފެންސް މިނިސްޓަރ މާރިޔާ ވިދާޅުވީ ޔޫއޭއީގެ އަސްކަރިއްޔާގެ ޗީފް އޮފް ސްޓާފްއާއި އެކު ކުރިއަށްދިޔައީ ކާމިޔާބު އަދި މުހިއްމު ބައްދަލުވުމެއްކަމަށެވެ.

އަދި މި ބައްދަލުމުގައި ދެގައުމުގައި އަމާންކަމާއި ހަމަޖެހުން ޤާއިމުކުރުމަށް އަސްކަރީގޮތުން ގުޅިގެން ކުރެވޭނެ މަސައްކަތްތަކުގެ މައްޗަށް އަލިއަޅުވާލެވި މަޝްވަރާކުރެއްވުނުކަމަށާ، މީގެ ސަބަބުން ދެ ގައުމުގެ އަސްކަރިއްޔާގެ ގުޅުން އިތުރަށް ބަދަހިވެގެންދާނެ ކަން މިނިސްޓަރ ވަނީ ފާހަގަކުރައްވާފައެވެ.

މިމަހުގެ 20 އިން 24 ހުގެ ނިޔަލަށް ޔޫއޭއީގައި ކުރިއަށްދާ މިއެގްޒެބިޝަންގައި އެކި ޤައުމުތަކުގެ އަސްކަރިއްޔާއިންވަނީ ބައިވެރިވެފައެވެ. ރާއްޖޭއިން މި އެގްޒިބިޝަންގައި، ޑިފެންސް މިނިސްޓަރއާއި އެކު ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުالله ޝަމާލްއާއި ސިފައިންގެ އިސްވެރިން ވަނީ ބައިވެރިވެވަޑައިގަންނަވާފައެވެ.