ކުރިއަށް އޮތް ދައުރަށް ޖުމްހޫރީ ޕާޓީގެ ލީޑަރަކީ ޤާސިމް އިބްރާހިމްކަމަށް އެ ޕާޓީއިން ރަސްމީކޮށް އިއުލާނުކޮށްފި އެވެ. އެކަން އިއުލާނުކޮށްފައިވަނީ މިހާރު ކުރިއަށް ދާ ޖުމްހޫރީ ޕާޓީގެ ގައުމީ ކޮންފަރެންސްގަ އެވެ. 

ޖޭޕީގެ ލީޑަރުކަމުގެ މަގާމަށް ޤާސިމް ހޮވިވަޑައިގެންނެވީ، އެ މަގާމަށް އިތުރު ބޭފުޅަކު ކުރިމަތިލައްވާފައި ނުވާތީ ވޯޓާއި ނުލާ އޮޓޮއިންނެވެ. 

މިއީ ޤާސިމް ޖޭޕީގެ ލީޑަރުކަމަށް ހޮވިވަޑައިގެންނެވި 3 ވަނަ ދައުރެވެ. 

Advertisement

ޖޭޕީގެ ކެންޑިޑޭޓެއްގެ ގޮތުގައި 2008 ވަނަ އަހަރުގެ ރިޔާސީ އިންތިހާބާއި 2013 ވަނަ އަހަރުގެ ރިޔާސީ އިންތިހާބުގައި ގާސިމްް ވަނީ ވާދަ ކުރައްވާފަ އެވެ. އަދި 2008 ވަނަ އަހަރު ގާސިމަށް ލިބިވަޑައިގަތީ ހަތަރު ވަނަަ އެވެ. ފަހުން 2013 ވަނަ އަހަރު ތިން ވަނަ އެވެ.

މިހާރު ކުރިއަށްދާ ޖުމްހޫރީ ޕާޓީގެ ގައުމީ ކޮންފަރެންސްގައި މިއަދު އެންމެ ފޯރިއާއެކު ކުރިއަށްދަނީ ޖޭޕީގެ މަގާމުތަކަށް މެމްބަރުން އައްޔަންކުރުމަށް ވޯޓުލުމެވެ. 

ޖޭޕީގެ ގައުމީ ކޮންފަރެންސްގެ ތެރެއިން 

ޕާޓީގެ ލީޑަރުކަމަށް ވޯޓާއި ނުލާ ޤާސިމް އިންތިޚާބުވެފައި ވީނަމަވެސް،  ޑެޕިއުޓީ ލީޑަރުގެ ހަތަރު މަގާމާއި ކައުންސިލަށް ބޮޑު ވާދަވެރި ކަމެއް އެބަ އޮތެވެ.

އެގޮތުން ނައިބުގެ މަގާމަށް 12 ބޭފުޅުން ވަނީ ކުރިމަތިލައްވާފަ އެވެ. މި ކޮންފަރެންސްގެ ތެރެއިން ޖޭޕީގެ އެކި މަގާމުތަކަށް މީހުން އައްޔަންކޮށް ކައުންސިލް އެކުލަވާލާނެ އެވެ. 

މި ކޮންފަރެންސްއަކީ ޕާޓީގެ ހިންގުން ހަރުދަނާކޮށް، އަންނަ ރިޔާސީ އިންތިޚާބަށް ޕާޓީއިން ވާދަކުރުމާމެދު ގޮތް ނިންމާ ކޮންފަރެންސްއެވެ. ރާއްޖޭގެ އެކި ކަންކޮޅުތަކުން 900 މަންދޫބުން މި ކޮންފަރެންސްގައި ބައިވެރިވެފައި ވެއެވެ.