ޤާސިމް އިބްރާހިމް ނެތަސް ޖުމްހޫރީ ޕާޓީ ހިންގާނެ ހަރުދަނާ ލީޑަރުން ތިބުމަކީ ވަރަށް މުހިންމުކަމެއްކަމަށް ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވެފައިވަނީ ކުރިއަށް އޮތް ދައުރަށް ޖޭޕީގެ ލީޑަރުކަމަށް ޤާސިމް ހޮވިވަޑައިގެންފައިވާކަން ރަސްމީކޮށް އިއުލާނު ކުރެއްވުމަށްފަހު ކޮންފަރެންސްގެ ބައިވެރިންނާއި މުޚާތަބުކުރައްވާ ވާހަކަފުޅު ދައްކަވަމުން ނެވެ.
ޤާސިމް ވިދާޅުވީ އިންތިޚާބާއި ނުލާ ހޮވިވަޑައިގަތުމަކީ އެމަނިކުފާނު އެންމެ އުފާވާ ކަމެއް ނޫން ކަމަށެވެ. އެހެން ނަމަވެސް، އެ މަގާމުގެ މަސްއޫލިއްޔަތުތައް އަދާކުރައްވާނެކަމަށް ޤާސިމް ވިދާޅުވި އެވެ.
އެއާއެކު އެމަނިކުފާނު ވިދާޅުވީ ޖޭޕީގެ ލީޑަރުގެ ގޮތުގައި އަބަދު އެމަނިކުފާނު ނުހުންނަވާނެ ކަމަށެވެ.
އެހެން ނަމަވެސް، އެފަދަ ދުވަހެއްގައިވެސް ޕާޓީ ހިންގާނަ ހަރުދަނާ އިޚްލާސްތެރި ލީޑަރުން ތިއްބެވުމަކީ ކޮންމެހެން ބޭނުންތެރި ކަމެއްކަމަށް ދެކިވަޑައިގަންނަވާ ކަމަށެވެ. އަދި ޖުމްހޫރީ ޕާޓީގެ ތެރެއިން އެފަދަ ލީޑަރުން އުފެދިގެން ދިއުމަކީ އުންމީދުކުރައްވާ ކަމެއްކަމަށެވެ.
"މި ޕާޓީ ދެމިގެން ދިއުމަށްޓަކައި.. ޒަމާންތަކަށް ދެމިގެން ދިއުމަށްޓަކައި ކަންތައްތަކެއް ކުރަން ޖެހޭކަން އަޅުގަނޑުމެން ގަބޫލުކުރަން ޖެހޭ. ތާއަބަދަކު އަޅުގަނޑު ނުހުންނާނެ މި ލީޑަރު ކަމުގައެއް، އަޅުގަނޑަށްވެސް ނިމުމެއް އަންނަން ޖެހޭނެ، އެއީ ޤުދުރަތީ ޤާނޫނު އޮންނަ ގޮތް. އެކަން ވާނެވެސް ގޮތް މެ. އެހެންވީމަ އަޅުގަނޑުމެންގެ ރައްޔިތުންގެ ތެރެއިން މި ކަންކަމަށް ސާބިތުކަމާއެކީގައި އެދިވަޑައިގެން ކެރިވަޑައިގެން ނިކުންނަށް ތިއްބަވާނެ ބޭފުޅުންކޮޅެއް، އިޚްލާސްތެރިކަމާއެކު އަޅުގަނޑު ކުރި ރަނގަޅު ކަންތައްތައް ބަލައިގަނެގެން ކުރިއަށް ގެންދާނެ ރަނގަޅު ލީޑަޝިޕެއް އޮތުމަކީ ވަރަށް ބޭނުންތެރިކަމެއް"
ޖޭޕީގެ ލީޑަރު ޤާސިމް އިބްރާހިމް
ކުރިއަށް އޮތް ދައުރަށް ޖޭޕީގެ ލީޑަރުކަމަށް ޤާސިމް އިންތިޚާބުވެފައިވާއިރި، މިއީ އެމަނިކުފާނު އެ މަގާމު ފުރުއްވާ 3 ވަނަ ދައުރުކަން ފާހަގަކޮށްލެވެއެވެ.
ޤާސިމް އިބްރާހިމް ވަނީ ޖޭޕީގެ ކެންޑިޑޭޓެއްގެ ގޮތުގައި 2008 ވަނަ އަހަރުގެ ރިޔާސީ އިންތިހާބާއި 2013 ވަނަ އަހަރުގެ ރިޔާސީ އިންތިހާބުގައި ވާދަކުރައްވާފަ އެވެ.
Advertisement
This content is created and paid for by advertisers and does not involve Voice Journalists
