ޕީޕީއެމް، ޕީއެންސީ އަދި ދިވެހި ރައްޔިތުން ތިބީ އަދިވެސް އިދިކޮޅުގެ ލީޑަރު ރައީސް ޔާމީން އާއި އެކުގައި ކަމަށާއި އެމަނިކުފާނު ރިޔާސީ އިންތިޚާބު ކާމިޔާބު ކުރައްވާނެ ކަމަށް އިދިކޮޅުން ބުނެފިއެވެ.
އެމްޑީޕީގެ ޕްރައިމަރީ ކާމިޔާބު ކުރައްވާ އެޕާޓީގެ ރިޔާސީ ކެނޑިޑޭޓްއެއްގެ ގޮތުގައި ރައީސް އިބްރާހިމް މުހައްމަދު ޞާލިހު ވަނީ ކަނޑައަޅާފައެވެ. މިއާއިއެކު އެމަނިކުފާނު ވަނީ މިއަހަރުގެ ރިޔާސީ އިންތިޚާބުގައި ވާދަކުރެއްވުމަށް ކޯލިޝަމް ހެދުމަށް އެހެން ޕާޓީތަކަށް ދައުވަތު ފޮނުވާފައެވެ. މި ދައުވަތު ޤަބޫލުކުރުމަށް މަޝްވަރާކުރުމަށްފަހު އެމްޑީއޭއާއި އަދާލަތު ޕާޓީ ވަނީ ރައީސް ޞާލިހުއާއިއެކު ކޯލިޝަން ހެދުމަށް ނިންމާފައެވެ.
މިކަމާއި ގުޅިގެން އިދިކޮޅުންވަނީ މިއަދު ޓްވީޓް ކޮށްފައެވެ.
އެގޮތުން ޕީއެންސީގެ ނާއިބު ރައީސް އިބްރާހިމް ޝުޖާއު ވަނީ ރިޔާސީ އިންތިޚާބަށް ރައީސް ޔާމީން ނިކުންނަވާނީ އެކަނި ނޫންކަމަށް ވިދާޅުވެފައެވެ. އަދި އެމަިކުފާނު ނިކުންނަވާނީ ޤައުމުގެ މިނިވަންކަމާއި އިސްތިޤްލާލް އަދި މާތްވެގެންވާ އިސްލާމް ދީނުގެ ހައްޤުގައި މަސައްކަތް ކުރައްވާ އެތައްހާސް ރައްޔިތުންނާއެކު ކަމަށް ވިދާޅުވެފައެވެ.
މިިއާއިއެކު ޕީޕީއެމްގެ ނާއިބު ރައީސް މުހައްމަދު ޣައްސާން މައުމޫން ވިދާޅުވެފައިވަނީ ރައީސް ޔާމީންގެ ލަފާފުޅާއިއެކު މުޅީ ޕީޕީއެމް ކެތްތެރިކަމާއި އިޚްލާސްތެރިކަމާއިއެކުު އެއް އަޒުމެއްގައި ގަދަ ހިއްވަރުގައި ސާބިތުވެ މަސައްކަތުގައި އެބަ ތިބި ކަމަށެވެ. އަދި އިންތިޚާބު ކާމިޔާބު ކުރައްވާނީ ރައީސް ޔާމީން ކަމަށް ވިދާޅުވެފައެވެ.
ޕީއެންސީގެ ނާއިބު ރައީސް އާދަމް ޝަރީފް އުމަރު ވިދާޅުވެފައިވަނީ ރިޔާސީ އިންތިޚާބުގައި ދިވެހި ރައްޔިތުންގެ އުންމީދަކީ ރައީސް ޔާމީން ކަމަށާއި އިރާދަކުރެއްވިއްޔާ ރައިސް ޔާމީން މިނިވަންކޮށް އިންތިޚާބު ކާމިޔާބު ކުރާނެކަމަށެވެ. އަދި ޝަރިފް ވަނީ ނުހައްގުން 3 ވަނަ ފަހަރަށް ރައީސް ޔާމީން ޖަލަށްލުމުންވެސް ރައްޔިތުންގެ ތާއީދާއި ލޯބި އެއްދުވަހުން އަނެއް ދުވަހަށް ދަނީ އިތުރުވަމުން ކަމަށް ވެސް ވިދާޅުވެފައެވެ.
މީގެ އިތުރުން ޕީޕީއެމްގެ ނައިބު ރައީސް އަހްމަދު ޝިޔާމް ވިދާޅުވެފައިވަނީ ސިޔާސީ މަޝްރަހުގެ ކުޅިބައި އެތުރެމުންދާ ގޮތުން އުއްމީދު އިތުރަށް އާލާ ކޮށްދޭ ކަމަށެވެ. އަދި މިވަގުތު ޖުމްހޫރީ ޕާޓީ ރައީސް ޞާލިހުއާއިއެކު 2023 ގެ އިންތިޚާބަށް ކޯލިޝަން ހެދުމަކީ ނާދިރު ކަމެއް ކަމަށެވެ. ޝިޔާމް ވަނީ ރައީސް ޔާމީންގެ ވިސްނުންފުޅު ހައިރާން ކުރުވާވަރަށް އަކުރުން އަކުރަށް ދިމާވާކަމަށް ވެސް ފާހަގަކޮށްފައެވެ.
ޕީޕިއެމްގެ ލީޑަރު އަދި ކުރީގެ ރައީސް ޔާމީންގެ މައްޗަށް ހުކުމްކޮށް ޖަލަށް ލުމާއި ގުޅީގެން އިދިކޮޅުން އަންނަނީ މުޒާހަރާކޮށް ރައީސް ޔާމީން ދޫކޮށްލުމަށް ގޮވަމުންނެވެ.
Advertisement
This content is created and paid for by advertisers and does not involve Voice Journalists
