ސިޔާސީ ތަޖުރިބާ ރަނގަޅު ކުރެވޭނީ ތިމާއަށް ބޭނުންވާ އެއްޗަކަށްވުރެ ބޮޑަށް ޤައުމު އިސްކުރެވިގެންކަމަށް ޖޭޕީގެ ސްލޮޓެއްގައި ހެލްތު މިނިސްޓަރުކަމުގެ މަޤާމު ފުރުއްވި އަބްދުالله އަމީނު ވިދާޅުވެއްޖެ އެވެ. 

އަމީނު މިފަދައިން ވިދާޅުވެފައިވަނީ ޖުމްހޫރީ ޕާޓީގެ ޤައުމީ ކޮންފަރެންސް ނިންމުމަށް ބޭއްވި ޚާއްސަ ޖަލްސާއެއްގައި ވާހަކަދައްކަވަމުން ނެވެ. 

އަމީނުގެ ވާހަކައިގައި ވަނީ ޑިމޮކްރަސީގެ ރޭހުގައި ދިވެހިން ހޭދަކޮށްފައިވާ ދިގު ތާރީހަށް އަލިއަޅުވާލައްވާފަ އެވެ. އެގޮތުން ފާއިތުވި 15 އަހަރު ދިވެހިން ޑިމޮކްރަސީއަށް މަސައްކަތް ކޮށްފައިވާކަމަށާއި، އެހެން ނަމަވެސް މިހާރުވެސް ދައްކަމުންދަނީ މީގެ 15 އަހަރު ކުރީގެ ވާހަކަތައްކަން އޭނާ ފާހަގަކުރެއްވި އެވެ. 

Advertisement

މިއަދުވެސް ރާއްޖޭގައި އޮތީ މީގެ 15 އަހަރު ކުރީގެ މައްސަލަތައް ކަމަށާއި، މި މައްސަލަތަކަކީ ކޮންމެވެސް ހިސާބަކުން ހައްލު ލިގެން ޖެހޭ ކަންކަމުގެ ގޮތުގައި އަމީނު ސިފަކުރެއްވި އެވެ. 

އެއާއެކު އަމީނު ވިދާޅުވީ މާޒީގައި ހިނގާފައިވާ ގޯސްކަންކަމުގެ ވާހަކަ އަބަދު ދެއްކުމުގެ ބަދަލިގައި ވެރިކަން ކޮށްދެއްވި ބޭބޭފުޅުންގެ ހެޔޮ މިސާލުތަކުން ފިލާވަޅު ލިބިގަނެ ކަންކަން އިސްލާހުކުރުމަށް އާ ފެށުމަކުން ފަށަން ޖެހޭ ކަމަށެވެ. އަދި އާ ސިޔާސީ ތަޖުރިބާތަކެއް ހޯދުމަށް މަސައްކަތް ކުރަން ޖެހޭ ކަމަށެވެ. 

އެކަން ކުރެވޭނީ ތިމާއަށް އޮތީ ކޮންއެއްޗެއްތޯ ނުބަލާ ޤައުމު އިސްކޮށްގެންކަމަށް އަމީނު ވިދާޅުވި އެވެ. 

އެކަން ފާހަގަކުރައްވާ އަމީނު ވިދާޅުވީ ޖުމްހޫރީ ޕާޓީން ރައްޔިތުންނާއި ގުޅުންހުރި، ރާއްޖެއަށް ހެޔޮ ބަދަލު ގެނެސްދޭނެ މެނިފެސްޓޯއާއި ތަސައްވަރު ނެރެދޭނެ ކަމަށެވެ. އެ ޕާޓީއަކީ ރާއްޖޭގެ ސިޔާސީ މައިދާނުގެ ދަންމަރު ކަމަށާއި، އެ ދަންމަރު އަބަދުވެސް ދިއްލިފައި ހުންނަން ޖެހޭކަމަށް އަމީނު ވިދާޅުވި އެވެ. 

އަދި ޖޭޕީގެ ވިސްނުމާއި އެއްގޮތަށް ސިޔާސީ ހެޔޮ ތަޖުރިބާ ހޯދުމަށް، އެ ޕާޓީއާއި ގުޅިވަޑައިގެން މަސައްކަތްޕުޅު ކުރެއްވުމަށް އަމީނު ވަނީ ރައްޔިތުންނަށް ދައުވަތުއަރުވާފަ އެވެ.