މަޖިލީހުގެ ރައީސް މުހައްމަދު ނަޝީދާއި ނުލައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އޮންނާނެކަމަށް ޤަބޫލުފުޅު ނުކުރައްވާކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެ އެވެ.
ޤާސިމް މިފަދައިން ވިދާޅުވެފައިވަނީ ޖުމްހޫރީ ޕާޓީގެ ގައުމީ ކޮންފަރެންސް ނިންމުމަށް ބޭއްވި ޚާއްސަ ޖަލްސާގައި ވާހަކަދައްކަވަމުން ނެވެ.
އެ ޖަލްސާގައި ވާހަކަދައްކަވަމުން ޤާސިމް ވަނީ ނަޝީދަށް ވަރަށް ބޮޑަށް ތައުރީފު ކުރައްވާފަ އެވެ. އެގޮތުން ޤާސިމް ވިދާޅުވީ ނަޝީދަކީ ރާއްޖޭގައި ޑިމޮކްރެޓިކް ވެރިކަމަށް ކުރުމަށް ވަރަށް ބޮޑަށް ބާރު އެޅުއްވި ބޭފުޅެއްކަމަށެވެ. ޤާނޫނު އަސާސީ އިސްލާހުކުރުމަށް ފެށި "އިސްލާހީ" މަސައްކަތުގައި ބޭރުން އެންމެ ބޮޑު އެހީތެރިކަމެއް ފޯރުކޮށްދިން އެއް ބޭފުޅަކީ ރައީސް ނަޝީދުކަން ޤާސިމް ފާހަގަކުރެއްވި އެވެ.
ނަޝީދަށް ވެރިކަން ލިބިވަޑައިގަތުމުގައި ޤާސިމްއަކީ ހިއްސާދާރެއްކަމަށާއި، އެއީ ވަރަށް އުންމީދުތަކާއެކު ގެނައި ވެރިކަމެއްގެ ގޮތުގައި ޤާސިމް ސިފަކުރެއްވިއެވެ. އެހެން ނަމަވެސް، ނަޝީދަށްވެސް ގޯސްތަކެއް ހެއްދެވިފައިވާކަމަށާއި، އެ ދުވަހު އެކަން އެހެން ހިނގައިގެން ދިޔައީ ސިޔާސީގޮތުން އެމަނިކުފާނުގެ ތަޖުރިބާ މަދުވުމުންކަމަށް ޤާސިމް ވިދާޅުވި އެވެ.
"ކެރިގެން ޑިޓާމިނޭޝަނާއެކު މަސައްކަތް ކުރުމުގެ ގޮތް ބާވަތް ކޮންމެ ވެރިކަމެއްގައިވެސް ހުންނަން ޖެހޭނެ. އެއީ އެމަނިކުފާނަށް (ނަޝީދަށް) އަޅުގަނޑު ސަޕޯޓު ކުރާ އެއް ސިފަ. ދެން އެހެން ނަމަވެސް ކަންދިމާވި ގޮތުން އަޅުގަނޑު ދަންނަވާނަން ލެކް އޮފް އެކްސްޕީރިއެންސް، ތަޖުރިބާ ދުނިޔޭގެ ކަންތައްތަކުގައި ހުންނަންވީ ވަރަށް ލިބިފައި ނެތުމާއެކީގައި މިސްޓޭކެއް ހެއްދެވުނީ، ދެން ކުރާނެ ކަމެއް ނެތް، އެކަމު އެކަން މިހާރު ރަނގަޅުވެފައި އޮންނާނެކަމަށް އަޅުގަނޑު ގަބޫލުކުރަނީ"
ޖޭޕީގެ ލީޑަރު ޤާސިމް އިބްރާހިމް
އެހެން ނަމަވެސް އެމްޑީޕީ އުފައްދާ، އެ ޕާޓީ ވަރުގަދަ ކުރުމަށް ނަޝީދުކޮށްފައިވަނީ ތައުރީފު ހައްގު މަސައްކަތެއްކަމަށް ޤާސިމްގެ ވާހަކައިގައި އިޝާރާތް ކުރެއްވިއެވެ. އަދި ވިދާޅުވީ، ކޮންމެ ގޮތަކަށް ކަންކަން ވެގެން ދިޔަ ނަމަވެސް ނަޝީދާއި ނުލާ އެމްޑީޕީ އޮންނާނެކަމަށް ޤަބޫލު ނުކުރެވޭ ކަމަށެވެ.
ޤާސިމް އިބްރާހިމް ގައުމީ ކޮންފަރެންސް ނިންމުމުގެ ރަސްމިއްޔާތުގައި ވާހަކަދައްކަވަނީ
"ދެން މިއަދު އަޅުގަނޑުމެން ފަޚުރުވެރިކަމާއެކު މި ބުނާ އެމްޑީޕީ، އެމްޑީޕީ މަނިކުފާނާއި ނުލާ އޮންނާނެ އެއްޗެއްކަމށް އަޅުގަނޑު ގަބޫލެއް ނުކުރަން. އެއީ އަޅުގަނޑުގެ ވިސްނުން"
ޖޭޕީގެ ލީޑަރު ޤާސިމް އިބްރާހިމް
ޤާސިމް މި މޭރުމުން ވާހަކަފުޅު ދައްކަވާފައިވަނީ އެމްޑީޕީގެ ދެ ރައީސުންގެ މެދުގައި އުފެދިފައިވާ ސިޔާސީ ވާދަވެރިކަން ބޮޑުވެ ދެ ފެކްޝަނަށް ޕާޓީ ބެހި، ދެ ފެކްޝަނުގެ މެމްބަރުންގެ މެދުގައި ކޯޅުންގަނޑު ބޮޑުވެފައިވާ ދަނޑިވަޅެއްގަ އެވެ.
އެމްޑީޕީގެ ރިޔާސީ ޕްރައިމަރީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ކާމިޔާބު ކުރެއްވި ނަމަވެސް، އެމަނިކުފާނުގެ ފަހަތްޕުޅަށް އަރާވަޑައި ނުގަންނަވާނެކަމަށް ޕާޓީގެ ލީޑަރު އަދި މަޖިލީހުގެ ރައީސް މުހައްމަދު ނަޝީދު ވަނީ ވިދާޅުވެފަ އެވެ.
މިހާރު ސިޔާސީ މަޝްރަހުގައި ކަންކަން ހިންގާ ގޮތަށް ބަލާއިރު، ނަޝީދު ޤާސިމްގެ ފަހަތްފުޅަށް އަރާވަޑައިގަންނަވާނެކަމަށް ބެލެވޭކަމަށް ބައެއް ތަޖުރިބާކާރު ބޭބޭފުޅުން ވިދާޅުވެއެވެ.
Advertisement
This content is created and paid for by advertisers and does not involve Voice Journalists
