ދިވެހި ފުލުހުންގެ ޚިދުމަތަކީ މިއަދު ސިޔާސީ ގޮތުން ބޮއްސުންލާފައިވާ އިދާރާއެއް ކަމަށާއި، ކުށްކުރުން ހުއްޓުވުމަށް އެ މުއައްސަސާއިން އެކަށީގެންވާ މަސައްކަތްތަކެއް ނުކުރާކަމަށް މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު (ސެންބެ) ވިދާޅުވެއްޖެ އެވެ.
ސެންބެ މިފަދައިން ވިދާޅުވެފައިވަނީ ސައިބާ ސްކޭމްތަކުގެ ޝިކާރައަކަށް ވެގެންދާ ފަރާތްތަކަށް އެކަށީގެންވާ އެހީތެރިކަމެއް ފުލުހުންގެ ފަރާތުން ފޯރުކޮށްނުދޭކަން ފާހަގަކުރައްވާ ރައްޔިތުންގެ މަޖިލީހުގައި ވާހަކަދައްކަވަމުން ނެވެ.
އެ މައުލޫއަށް ވާހަކަދައްކަވަމުން ސެންބެ ވިދާޅުވީ ސައިބާ ސްކޭމްތަކުގައި ގެއްލުންވާ މީހުން މިހާރު ދާން ޖެހެނީ ފުލުހުންގެ އިދާރާއަށް ކަމަށެވެ. އެހެން ނަމަވެސް އެ އިދާރާ ބޮއްސުންލާފައި އޮތުމުން، އެފަދަ މައްސަލަތައް ނުބަލާ ދޫކޮށްލާ ކަމަށާއި، ނަތީޖާއެއްގެ ގޮތުން ސްކޭމްތަކުގެ ޝިކާރައަކަށްވާ ފަރާތްތަކަށް އެ ފައިސާ ހޯދުމުގެ މަގު ބަންދުވެގެންދާ ކަމަށް އޭނާ ވިދާޅުވި އެވެ.
ސްކޭމްތަކުގައި ފައިސާ ގެއްލޭ ފަރާތްތަކަށް ފުލުހުން އެކަށީގެންވާ އެހީތެރިކަމެއް ފޯރުކޮށްނުދޭ މައްސަލައަކީ ވަރަށް ހިތާމަކުރާ ކަމެއްކަމަށް ސެންބެގެ ވާހަކައިގައި ފާހަގަކުރެއްވި އެވެ.
"ފުލުހުންގެ އިދާރާއަށް ނަޒަރު ހުއްޓާލާއިރު، އެ އިދާރާގެ އިހުމާލު އިންތިހާއަށް ބޮޑުވެފައި މިއަދު މިވަނީ. ދުވާލަކު އެތައް މިލިއަން ރުފިޔާއެއް އެކައުންޓުތަކުން ގެއްލެމުންދާއިރު، މި މައްސަލަތައް ހުށައެޅީމަ ނުބެލި، ދިގުލައިގެންދާ މަންޒަރު ފެނިގެން މިދަނީ. އެއްވެސް ކުށެއް ނެތް އެކައުންޓުގެ ވެރިފަރާތުގެ އެކައުންޓު ފްރީޒްކޮށްފަ އެބަހުރި އޭނަގެ އެކައުންޓަށް އެހެން މީހަކު ފައިސާ ޖަމާކޮށްގެން. އެހެންވީމަ މި ކަންކަން ނުބެލި ދިގުލައިގެން ދާތީ އަޅުގަނޑު މި ދަންނަވަނީ ކޮބާހޭ މި ކަންކަމާއި ހަވާލުވެ ތިބި މުއައްސަސާތަކުގެ ވެރިންގެ ޒިންމާ. ފުލުހުންގެ އިދާރާއަށް މިއަދު ކޮންމެ ކަމެއްވެސް ވަރިހަމަ. ސިޔާސީގޮތުން ބޮއްސުންލާފަ އޮތް ތަނަކަށް އެފައި އެތަން އެ އޮތީ"
ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު
ސެންބެ އިތުރަށް ވިދާޅުވީ ސްކޭމްތަކުގެ ޝިކާރައަކަށްވާ ފަރާތްތަކަށް އިންސާފު ހޯދާދިނުމަށް މުއައްސަސާތައް ފެއިލްވުމާއި ގުޅިގެން މުޅި ނިޒާމަށް ރައްޔިތުން ކުރާ އިތުބާރު މިހާރު ގެއްލިފައިވާކަމަށެވެ.
ވެރިކަމުގެ ނިޒާމުގައި ހުރި މުހިންމު މައްސަލަތަކަށް އަޅާނުލެވުމުގެ ސަބަބުން ހުރިހާ ތަކުލީފެއް އުފުލަން ޖެހެނީ ރައްޔިތުންނަށް ކަމަށާއި، އެއީ ނިނުމަކަށް ގެންނަން ޖެހޭ ކަމެއްކަމަށް ސެންބެ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
