މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އާއި އަދާލަތު ޕާޓީގެ ކޮންޓްރޯލު ސަރުކާރުން ނެގިގޮތަށް ޖުމްހޫރީ ޕާޓީގެ ކޮންޓްރޯލު ސަރުކާރަށް ނެގިފައި ނުވާކަމަށް މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެ އެވެ.
ވަހީދު މިފަދައިން ވިދާޅުވެފައިވަނީ ކުރެއްވި ޓްވީޓެއްގަ އެވެ.
ކުރިއަށް އޮތް ރިޔާސީ އިންތިޚާބު އެމްޑީޕީގެ ކެންޑިޑޭޓު، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ކާމިޔާބުކޮށްދިނުމަށް، އެމަނިކުފާނުގެ މަންދޫބުން ޖުމްހޫރީ ޕާޓީގެ ލީޑަރު ޤާސިމް އިބްރާހިމާއެކު މަޝްވަރާ ބައްދަލުމެއް ބާއްވާފައި ވަނިކޮށް، އެ ޕާޓީގެ ގައުމީ ކޮންފަރެންސްއިން ވަނީ އިންތިޚާބަށް ވަކި ކެންޑިޑޭޓެއް ނެރެގެން ނުވަތަ ޖޭޕީ އިސްވެ އޮވެ ހިންގާ ކޯލިޝަނަކާއެކު ވާދަކުރުމަށް ފާސްކޮށްފަ އެވެ.
ބެލެވޭގޮތުގައި ޖޭޕީގެ ކޮންޓްރޯލު ސަރުކާރަށް ނެގިފައި ނުވާކަމަށް، އެމްޑީޕީގެ ރައީސް މުހައްމަދު ނަޝީދު ފެކްޝަނުގެ މެމްބަރު ވަހީދު ވިދާޅުވީ ޖޭޕީގެ ގައުމީ ކޮންފަރެންސްގެ އެ ނިންމުމަށް އިޝާރާތްކުރައްވައެވެ.
ވަހީދު ވިދާޅުވީ ސަރުކާރު ކޯލިޝަންގައި ހިމެނޭ އަދާލަތު ޕާޓީއާއި އެމްޑީޕީގެ މެމްބަރުންނަށް ވަޒީފާއާއި އެކި ހަދިޔާތައް ދީގެން، ކޮންޓްރޯލު ކުރި ގޮތަށް ސަރުކާރަށް ޖުމްހޫރީ ޕާޓީ ކޮންޓްރޯލު ކުރެވިފައި ނުވާކަމަށެވެ. އަދި އެއީ ޖޭޕީގެ "ގަދަ ސިފައެއް" ކަމަށް ވަހީދު ވިދާޅުވި އެވެ.
ޖޭޕީގެ ގައުމީ ކޮންފަރެންސް ނިންމުމުގެ ރަސްމިއްޔާތުގައި ނަޝީދު ޤާސިމް އަރިހުގައި
"ސަރުކާރު ކޯލިޝަންގައި ހިމެނޭ އެމްޑީޕީގެ ޤައުމީ މަޖިލީހާއި އަދާލަތުޕާޓީގެ މަޝްވަރާ މަޖިލިސް މެމްބަރުންނަށް ވަޒީފާއާއި ހަދިޔާތައް ދީގެން ސަރުކާރުން ކޮންޓްރޯލް ނަގާފައިވާ ބީދައިން ޖުމްހޫރީޕާޓީގެ ގުނަންތަކުގެ ކޮންޓްރޯލް ސަރުކާރަށް ނުނެގުނުކަމީ އެޕާޓީން ފެނުނު ވަރުގަދަ ސިފައެއް"
މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ)
ޖުމްހޫރީ ޕާޓީއަކީ އެމްޑީޕީ އިސްވެ އޮވެ ހިންގަމުންދާ ސަރުކާރުގެ އެންމެ ބޮޑު ހިއްސާދާރެވެ. ރައީސް އިބްރާހިމް މުހައްމަދު ޞާލިހުގެ ނައިބު ރައީސަކަށް ހުންނެވި ފައިސަލް ނަސީމަކީވެސް ޖުމްހޫރީ ޕާޓީގެ ބޭފުޅެކެވެ.
ކުރިއަށް އޮތް ރިޔާސީ އިންތިޚާބުގައި ޖޭޕީން ވަކި ކެންޑިޑޭޓެއް ނެރެގެން ވާދަކުރުމަށް އެ ޕާޓީގެ ގައުމީ ކޮަންފަރެންސްއިން ފާސްކޮށް ޕާޓީގެ ކައުންސިލަށް ހުށައެޅުމަށް ލަފާ ދީފައިވާއިރު، މި އިންތިޚާބުގައި ޖޭޕީން ވާދަކުރާނަމަ އެމްޑީޕީގެ ރައީސް މުހައްމަދު ނަޝީދުގެ ތާއީދު ޖޭޕީއަށް ލިބޭނެކަމަށް ސިޔާސީ މަޝްރަހު ދިރާސާކުރައްވާ ފަރާތްތަކުން ދަނީ ވިދާޅުވަމުން ނެވެ.
ޖުމްހޫރީ ޕާޓީގެ ލީޑަރު ޤާސިމް އިބްރާހިމްވެސް ނަޝީދަށް ތާއީދުކުރައްވާ މި ފަހުން ވަރަށް ގިނައިން ވާހަކަފުޅު ދައްކަވާފައި ވެއެވެ. އަދި ޖޭޕީގެ ގައުމީ ކޮންފަރެންސް ފެއްޓުމާއި، ނިންމުމަށް ބޭއްވި ޚާއްސަ ދެ ޖަލްސާގައިވެސް ޤާސިމްގެ އެންމެ އަރިހުގައި ނަޝީދު އިންނެވިތަން ވަނީ ފެނިގެން ގޮސްފައެވެ.
Advertisement
This content is created and paid for by advertisers and does not involve Voice Journalists
