ވެލާނާގެ ސަރަހައްދުން ދެ ޕާކިންގ ޒޯން ބަންދުކުރީ މާލެ ސިޓީ ކައުންސިލަށް އެންގުމެއް ނެތި، އަދި ހުއްދަވެސް ނުނަގާ ކަމަށް އެ ކައުންސިލުން ބުނެފިއެވެ. 

ވެލާނާގެއާއި، ދަރުމަވަންތަ ސްކޫލާ އިންވެގެން ހުރި މެކޭނިކަލް ޕާކިން ސިސްޓަމް ހުރި ބިމުގައި ފެންސު ޖަހައި ބަންދުކޮށްފައި ހުރުމުގެ ސަބަބުން ވެލާނާގޭ އޮފީސް ޢިމާރާތުގައި ހިމެނޭ ބައެއް އޮފީސްތަކުގެ މުވައްޒަފުން ވަނީ ޕާކް ކުރާނެ ތަނެއްނެތްކަމަށް ބުނެ އެ ސަރަހައްދުގައި މިއަދު އިޙްތިޖާޖުކޮށްފައެވެ.

އެ މައްސަލާގައި ބައެއް ނޫސްތަކުން، އެ ސަރަހައްދު ބަންދު ކޮށްފައިވަނީ މާލެ ސިޓީ ކައުންސިލުން ކަމަށް ބުނެ ޚަބަރު ފަތުރާފައިވާތީ، އެކަމާއި ގުޅިގެން މާލެ ސިޓީ ކައުންސިލުން ބުނީ، ވެލާނާގޭ ކައިރި ޕާރކިން ޒޯން ބަންދުކޮށް، އެ ސަރައްހަދުގައި ހުރި އުޅަނދުތައް ޓޯ ކޮށްފައިވަނީ ކައުންސިލްގެ އެންގުމަކަށް ނޫން ކަމަށެވެ.

Advertisement

އަދި އެ ސަރަހައްދު ބަންދުކޮށް މަސައްކަތް ކުރަމުން ދަނީ ވެސް މާލެ ސިޓީ ކައުންސިލަށް އެންގުމަކާއި ނުލާ ކަމަށާ، އެއީ ކައުންސިލްގެ އެއްވެސް ކަހަލަ ހުއްދައެއް ލިބިގެން ކުރާ ކަމެއް ނޫން ކަމަށްވެސް ބުނެފައިވެއެވެ. 

"އަދި މި މަސައްކަތަކީ ކައުންސިލް އިން ކުރިއަށް ގެންދާ މަސައްކަތެއް ކަމަށް ބުނެ ފަތުރަމުން ދަނީ ތެދު މައޫލޫމާތު ނޫން ކަމުގައިވެސް ދަންނަވަމެވެ." މާލެ ސިޓީ ކައުންސިލުން ބުނެފައިވެއެވެ. 

ޕާކިންގ ޒޯން ބަންދުކުރި މައްސަލާގައި ޕްލޭނިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ، ވެލާނާގޭ ކައިރީގައި އޮތް ޕާކިން ޒޯން ބަންދުކުރީ އެސަރަހައްދުގައި ހުރި މެކޭނިކަލް ޕާކިން ސިސްޓަމް ނެގުމަށްކަމަށެވެ. 

އަކްރަމް ވިދާޅުވީ، އެ ސަރަހައްދުގައި ހުރި މެކޭނިކަލް ޕާކިން ސިސްޓަމް ނެގޭނީ ކްރެއިން އެ ސަރަހައްދަށް ވައްދައިގެންކަމަށެވެ. އެހެންކަމުން އެ ސިސްޓަމް އެތަނުން ނަގާތީ އެ ސަރަހައްދު ބަންދުކުރީ ރައްކާތެރިކަމުގެ ފިޔަވަޅެއްގެ ގޮތުންކަމަށް އޭނާ ވިދާޅުވިއެވެ. އަދި އެ ސިސްޓަމް ނެގުމަށްފަހު، ވީހާވެސް އަވަހަށް ޕާކިންއަށް އެތަން ހުޅުވާލާނެކަމަށާއި، އެއިރުން ގިނަ އުޅަނދުތަކަށް ޕާކް ކުރެވޭނެކަން އަކްރަމް ފާހަގަކުރެއްވިއެވެ.