100 މިލިޔަން ޑޮލަރަށް ވުރެ ބޮޑު ލޯނެއްގެ ސޮވެރެއިން ގެރެންޓީއެއް ހޯދުމަށް ޤާސިމް އިބްރާހިމް ސަރުކާރަށް ޕްރެޝަރު ކުރަމުންދާ ވާހަކަ ޖުމްހޫރީ ޕާޓީގެ ޑެޕިޔުޓީ ލީޑަރު އަމީން އިބްރާހިމް ދޮގުކުރައްވައިފިއެވެ.

އަމީން ޓްވިޓާގައި "ދެންމެ" ނަމަކަށް ކިޔާ ނޫހަކުން ކެމްޕޭނަށް 500 މިލިޔަން ކަނޑައަޅައިފައިވާ ޤާސިމަށް ސަރުކާރުން 100 މިލިޔަން ޑޮލަރުގެ ލޯނު މި ސުރުހީގެ ދަށުން ލިޔެފައިވާ ޚަބަރެއް ޝެއަރ ކުރައްވައި ވިދާޅުވެފައިވަނީ މިއީ ކަނޑައެޅިގެން ހަޤީޤަތާއި ޚިލާފު އެއްވެސް އަސްލެއް ނެތް ބުހުތާނެއް ކަމަށެވެ.

"ސަރުކާރުން ގެރެންޓީއެއް ހޯދަން ޖޭޕީގެ ލީޑަރު ޤާސިމް އެއްވެސް ހާލެއްގައި އެދިފައެއް ނުވޭ، މިޒާތުގެ ވާހަކަތައް މިހާރު މިފަތުރަން ފެށީ ކީއްވެކަން ވަރަށް ސާފު" އަމީން ވިދާޅުވިއެވެ.

Advertisement

"ދެންމެ" ނޫހުގައި ބުނެފައިފައިވަނީ 100 މިލިޔަން ޑޮލަރަށް ވުރެ ބޮޑު ލޯނުގެ ސޮވެރެއިން ގެރެންޓީއެއް ހޯދުމަށް ޤާސިމް ސަރުކާރަށް ޕްރެޝަރ ކުރައްވަމުން ދާކަމަށް އިތުބާރުހުރި މަސްދަރަކުން މައުލޫމާތު ލިބިފައިވާ ކަމަށެވެ. އަދި ސަރުކާރުން ސޮވެރެއިން ގެރެންޓީއެއް ހޯދުމަށް ޤާސިމް މަސައްކަތް ކުރައްވަމުން ގެންދަވަނީ އެމަނިކުފާނު ރިޔާސީ އިންތިޚާބުގައި ވާދަ ކުރައްވާނެ ކަމަށް ވިދާޅުވެ ބިރުދައްކަވައިގެން ކަމަށް އެނޫހުގައި ބުނެފައިވެއެވެ.

"ދެންމެ" ނޫހުގައި މިފަދަ ވާހަކަތަކެއް ލިޔެ ޢާންމު ވެފައިވާއި އިރު "ވޮއިސް" އަށް އެނގިފައިވާ ގޮތުން "ދެންމެ" ނޫހަކީ ރަޖިސްޓްރީ ކޮށްގެން ހިންގާ ނޫހެއް ނޫނެވެ.

މިސަރުކާރު ފެށިގެން ގޮއްސައި ވަނީ ޖޭޕީ ހިމެނޭ ކޯލިޝަންއަކުންނެވެ. އަދި މިހާތަނަށް ޖޭޕީ އޮތީ ވެސް ސަރުކާރުގެ ކޯލިޝަން ތެރޭގައެވެ. ނަމަވެސް މިހާރު މަންޒަރު ދައްކާގޮތުން ކުރިއަށް އޮތް އިންތިޚާބުގައި ޖޭޕީ އިން ރައީސް ޞާލިޙަށް ތާއީދެއް ނުކުރާނެއެވެ. އަދި އިންތިޚާބާއި މެދު ގޮތެއް ނިންމައި ޖޭޕީ އިން އިޢްލާނުކޮށްފައެއް ނުވެއެވެ.

މިދުވަސްވަރަކީ ސިޔާސީ ފަރާތްތަކުގެ ޚިޔާލު ތަފާތު ވުންތަކާއި ވާދަވެރިކަން އިތުރުވެފައިވާ ދުވަސްވަރެކެވެ.