ޤައުމެއްގައި ހުންނަ ސްޓްރެޓެޖިކް އެސެޓު ވިއްކުމަކީ މަންމަގެ ފައްޓަރުބައި ވިއްކާލުމާއި އެއްފަދަ ކަމެއް ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފު (މަވޯޓާ) ވިދާޅުވެއްޖެ އެވެ.
މަވޯޓާ އެފަދައިން ވިދާޅުވެފައިވަނީ ސްޓްރެޓެޖިކް ޕާޓްނަޝިޕް އަދި ޕަބްލިކް ޕްރައިވެޓް ޕާޓްނަޝިޕްގެ ދަށުން އައްޑޫ އެއާޕޯޓާއި އައްޑޫ ރީޖަނަލް ސީޕޯޓު ޕްރައިވެޓައިޒް ކުރުމަށް އެދި މަޖިލީހުގެ ހިތަދޫ މެދު ދާއިރާގެ މެމްބަރު އަހުމަދު ރަޝީދު ހުށައެޅުއްވި ޤަރާރަށް މަޖިލީހުގައި ބަހުސް ކުރައްވަމުން ނެވެ.
ޝަރީފު ވިދާޅުވީ އައްޑޫ އެއާޕޯޓާއި ބަނދަރު ތަރައްގީ ކުރުމަކީ ކޮންމެހެން ކުރަން ޖެހޭ މަސައްކަތްތަކެއްކަމަށް ޤަބޫލު ކުރައްވާކަމަށެވެ. އެހެން ނަމަވެސް، އެކަން ކުރަން އޮތް ގޮތަކީ އައްޑޫ އެއާޕޯޓާއި ޕޯޓު ޕްރައިވެޓު ކުންފުންޏަކަށް ވިއްކާލުން ކަމަށް ވާނަމަ، އެއީ ބަލައިގަނެވޭނެ ކަމެއް ނޫންކަމަށް އޭނާ ވިދާޅުވި އެވެ.
މިހާރުވެސް އެ ތަންތަން ހިންގަމުންދަނީ ގެއްލުމުގައި ކަމަށް ޤަރާރު ހުށައެޅުއްވި މެމްބަރުވެސް ވިދާޅުވާއިރު، ގެއްލުމުގައި ހިނގާ ކުންފުންޏެއް ގަންނަން ޖެހޭ ސަބަބެއްވެސް ނެތްކަމަށް ޝަރީފު ވިދާޅުވި އެވެ.
"ޤައުމެއްގެ ހުންނާނެ ސްޓްރެޓެޖިކް އެސެޓު. އެ ސްޓްރެޓެޖިކް އެސެޓު ވިއްކާލުމަކީ މަންމަގެ ފައްޓަރުބައި ވިއްކާލުން ކަހަލަ ކަމެއް. މީ ވަރަށް ފުންކޮށް ވިސްނާލަން ޖެހޭ ކަމެއް. ފައިދާ ނުވާތީ އައްޑޫ ހޮސްޕިޓަލު ވިއްކާލުން، ފައިދާ ނުވާތީ އައިޖީއެމްއެޗް ވިއްކާލުން، މީ ދިވެހިރާއްޖެ ދައުލަތެއްގެ ގޮތުގައި އޮންނައިރު ކޮށްގެންވާނެ ކަންކަމެއް ނޫން"
މަރަދޫ ދާއިރާގެ މެމްބަރު އިބްރާހީމް ޝަރީފު (މަވޯޓާ)
ޝަރީފު ވިދާޅުވީ ރައްޔިތުންނަށް ދޭ ކޮންމެ ޚިދުމަތަކީ ވިޔަފާރީގެ އުސޫލުން ފައިދާ ލިބޭ ޚިދުމަތަކަށް ހަދައިގެން ނުވާނެ ކަމަށެވެ. ރައްޔިތުންނަށް ޚިދުމަތް ދޭން ޖެހޭނީ ދައުލަތުގެ ގާބިލުކަން ހުންނަ ވަރަކުން ކަމަށް ޝަރީފު ވިދާޅުވި އެވެ.
ޝަރީފު އިތުރަށް ވިދާޅުވީ މިހާރުވެސް ރާއްޖޭގައި ޕްރައިވެޓައިޒް ކޮށްގެން އެއާޕޯޓުތައް ހިންގަމުންދާ ކަމަށެވެ. އަދި އެ ތަންތަނުގެ ހާލު އައްޑޫ ސިޓީ އެއާޕޯޓުގެ މިހާރުގެ ހާލަތަަށްވުރެ ދަށްކަމަށް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
