ތިނަދޫ ޓާޝަރީ ހޮސްޕިޓަލް ޑިޒައިންކުރުމުގެ މަސައްކަތް ކުރިއަށްދާކަމަށް ހެލްތު މިނިސްޓަރު އަޙުމަދު ނަސީމް ވިދާޅުވެއްޖެއެވެ.

ނަސީމް މިފަދައިން ވިދާޅުވީ މި ސަރުކާރުން ތިނަދޫގައި އެޅުމަށް ހަމަޖެހިފައިވާ ޓާޝަރީ ހޮސްޕިޓަލު ގެ މަސައްކަތް ގޮސްފައިވާ ހިސާބަކާއި، އެ މަސައްކަތުގެ ޢަމަލީ މަސައްކަތް ފެށޭނީ ކޮން އިރަކުތޯ އަހައި ތިނަދޫ އުތުރު ދާއިރާގެ މެންބަރު ޢަބްދުލްމުޣުނީ، ލިޔުމުން ޖަވާބު ހޯއްދެވުމަށް ކުރައްވާފައިވާ ސުވާލަށް ދެއްވި ޖަވާބު ގައެވެ. 

މުޣުނީގެ ސުވާލުގެ ޖަވާބުގައި މިނިސްޓަރު ވިދާޅުވީ، އެ ހޮސްޕިޓަލުގެ މިހާރު ކުރިއަށްދާނީ ޑިޒައިން ކުރުމުގެ މަސައްކަތް ކަމަށާ ޑިޒައިންކުރުމުގެ މަސައްކަތް ނިމުނުހައި އަވަހަކަށް ހޮސްޕިޓަލް އިމާރާތްކުރުމުގެ އަމަލީ މަސައްކަތް ފެށިގެންދާނެކަމަށެވެ.

Advertisement

މީގެ ކުރިން މިނިސްޓަރު ވިދާޅުވެފައިވަނީ ގދ. ތިނަދޫގައި ޓާޝަރީ ހޮސްޕިޓަލް އެޅުމަށް މިއަހަރުގެ މެދެއްހާ ހިސާބުގައި ބީލަމަށް ހުޅުވައިލާނެކަމަަށެވެ.

ތިނަދޫގައި އެޅުމަށް ހަމަޖެހިފައިވާ 100 އެނދުގެ ޓާޝަރީ ހޮސްޕިޓަލަށް އެޅުމަށް ލޯނު ހަމަޖެހިފައިވަނީ ކުވައިތު ފަންޑުންނެވެ.

މިއީ ދަޢުލަތުގެ ބަޖެޓުން 33 މިލިއަނަށްވުރެ ގިނަ ރުފިޔާ ޚަރަދުވާ މަޝްރޫޢުއެކެވެ.