އެއްވެސް ސަރުކާރަކުން ނާޖާއިޒް ނުވަތަ ނުހައްގު މަންފާއެއް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ހޯއްދަވާފައި ނޯންނާނެކަމަށް ޖޭޕީން ބުނެފި އެވެ.
ޖުމްހޫރީ ޕާޓީން މިފަދައިން ބުނެފައިވަނީ ބަދަލުގެ ގޮތުގައި ޤާސިމް އިބްރާހިމް ރަށްތަކާއި ފަޅުތައް ނަންގައިވެގެން އުޅުވާކަމަށާއި، އެކަމާއި ގުޅިގެން ނޫސްވެރިން ސުވާލުކުރުމުން ކޯފާ އިސްކުރައްވާފައިވާކަމަށް އޮންލައިން ނޫހަކުން ރިޕޯޓު ކުރުމާއި ގުޅިގެން ނެވެ.
ސަރުކާރު ކޯލިޝަންގައި ހިމެނޭ ޖޭޕީގެ ލީޑަރު ގާސިމް އިބްރާހިމް ރައީސުލްޖުމުހުރިއްޔާ އިބްރާހިމް މުހައްމަދު ޞާލިހާ ބައްދަލުކުރެއްވުމަށް ފަހު ނިކުމެވަޑައިގަތުމުން، ނޫސްވެރިން ވަނީ އެމަނިކުފާނާއި އެއްޔެ ސުވާލު ކުރައްވާފަ އެވެ.
އަދި ނޫސްވެރިއަކު ވަނީ ސަރުކާރުން ޤާސިމަށް ލިބިވަޑައިގެންފައިވާ ރަށްތަކާއި ފަޅުތަކާއި ގުޅޭގޮތުން ސުވާލު ކުރައްވާފަ އެވެ. އެ ސުވާލުތަކަށް ޤާސިމް ސާފު ޖަވާބެއް ނުދެއްވާ ކޯފާ އިސްކުރެއްވިކަމަށް ނޫސްތަކުގައި ރިޕޯޓުކޮށްފައި ވެއެވެ.
އެކަމާއި ގުޅޭގޮތުން ޖުމްހޫރީ ޕާޓީގެ ތަރުޖަމާނު އަލީ ޞާލިހު ވިދާޅުވީ ޖުމްހޫރީ ޕާޓީގެ ލީޑަރު ޤާސިމް އިބްރާހިމަކީ، އެއްވެސް ސަރުކާރަކުން، އެއްވެސް މިންވަރެއްގެ ނާޖާއިޒް ފައިދާ ހޯއްދަވާފައިވާ އަދި ހޯއްދަވާނެ ބޭފުޅެއްވެސް ނޫން ކަމަށެވެ.
އެމަނިކުފާނު ހޯއްދެވީ ވެރިއަކަށް ހުންނެވި ބޭފުޅަކު، ޤާސިމް އިބްރާޙީމްގެ މުދަލަށް ގެއްލުންދީ، އެމަނިކުފާނު ޖަލަށްލުމުން އޭގެ ބަދަލުގެ ގޮތުގައި ހޯއްދެވި އެއްޗެއްކަމަށް އަލީ ޞާލިހު ވިދާޅުވި އެވެ. އަދި ޤާސިމަށް ލިބިލެއްވި ބަދަލަކީ، އެމަނިކުފާނަށް ލިބެން ޖެހޭ އެއްޗެއްކަމަށް ރާއްޖޭގެ ސުޕްރިމް ކޯޓުން ކަނޑައަޅުމަށްފަހު ލިބިލެއްވި އެއްޗެއްކަމަށް ވެސް ޞާލިހު ވިދާޅުވެފައި ވެއެވެ.
ޖޭޕީގެ ތަރުޖަމާނު އަލީ ޞާލިހު
"ޖުމްހޫރީ ޕާޓީގެ ލީޑަރު ޤާސިމް އިބްރާހިމަކީ، އެއްވެސް ސަރުކާރަކުން، އެއްވެސް މިންވަރެއްގެ ނާޖާއިޒް ފައިދާ ހޯއްދަވާފައިވާ އަދި ހޯއްދަވާނެ ބޭފުޅެއްވެސް ނޫން. ވެރިއަކަށް ހުންނެވި ބޭފުޅަކު، ޤާސިމް އިބްރާޙީމްގެ މުދަލަށް ގެއްލުންދީ، އެމަނިކުފާނު ޖަލަށްލެއްވުމުން، އޭގެ ބަދަލު ހޯދޭނެ. ސުޕްރީމް ކޯޓުން މައްސަލައަކާމެދު ގޮތެއް ނިންމައި، ހުކުމެއް ކުރުމުން، އެ ނިންމުމަކާ ދެކޮޅަށް “ނޫސްވެރިއަކު” ދައްކާ ވާހަކައެއް، އެ ވާހަކަ ދައްކަންޖެހުނު ސަބަބަކާ މެދު ސުވާލު އުފެދޭ"
ޖޭޕީގެ ތަރުޖަމާނު އަލީ ޞާލިހު
ބަދަލުގެ ގޮތުގައި ޤާސިމަށް ލިބިލެއްވި ފަޅުތަކާއި ރަށްތަކާއި ގުޅިގެން ނުސްވެރިޔާ ކުރި ސުވާލަށް ޤާސިމްވެސް ވަނީ ހަމަ އެ ޖަވާބު ދެއްވާފަ އެވެ.
އެގޮތުން ބަދަލުގެ ގޮތުގައި ސަރުކާރުން އެއްޗެއް ހޯއްދަވާފައި ނުވާނެ ކަމަށާއި، އެމަނިކުފާނަށް ސަރުކާރުން ދިނީ ސުޕްރިމް ކޯޓުން އަންގައިގެން ދިން ހައްގު އެއްޗެއްކަމަށް ޤާސިމް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
