ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި ފޮރިން މިނިސްޓަރު އަބްދުﷲ ޝާހިދާއި ދެ ބޭފުޅުންނަށް ދިވެހިރާއްޖޭގައި މީހުން ދިރިއުޅޭ ރަށްތަކުގެ އަދަދު އެނގިވަޑައިނުގަތުމަކީ ލަދުވެތި ކަމެއްކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެ އެވެ. 

އަލީ ހުސެއިން މިފަދައިން ވިދާޅުވެފައިވަނީ ސަރުކާރުން ރަށްތަކުގައި ހިންގަމުންދާ މަޝްރޫއާއި ގުޅޭގޮތުން ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހާއި، ފޮރިން މިނިސްޓަރު ޝާހިދު ދައްކަވާފައިވާ ވާހަކަތަކެއް ޓްވީޓާގައި ހިއްސާކުރައްވާ ކުރެއްވި ޓްވީޓެއްގަ އެވެ. 

އަލީ ހުސެއިން ހިއްސާކުރައްވާފައިވާ ރައީސް ޞާލިހުގެ ވީޑިއޯއަކީ އެމްޑީޕީގެ ރިޔާސީ ޕްރައިމަރީގެ ކެމްޕޭނު ޖަލްސާއެއްގައި ވާހަކަދައްކަވާ ވީޑިއޯއެކެވެ. އެ ވީޑިއޯގައި ރައީސް ޞާލިހު ވިދާޅުވީ ރާއްޖޭގެ 357 ރަށެއްގައި މި ސަރުކާރުން ފްލެޓުއަޅާ ނިންމާފައިވާ ކަމަށެވެ. 

Advertisement

އޭގެ އިތުރުން މިނިސްޓަރު ޝާހިދު އިންޑިއާއަށް ކުރައްވާ ދަތުރުފުޅުގައި އިންޑިއާގެ ނޫހަކަށް ދެއްވި ބަސްދީގަތުމެއްގައި ވިދާޅުވީ މި ސަރުކާރުން ރާއްޖޭގެ 250 ރަށުގައި ފެނާއި ނަރުދަމާގެ މަސައްކަތް ކުރަމުންދާ ކަމަށެވެ. 

އިނގިރޭސިބަހުން އެމަނިކުފާނު ދެއްވި އިންޓަވިއުގައި ވިދާޅުވީ ތިލަމާލެ ބުރިޖާއި ހަނިމާދޫ އެއާޕޯޓާއި އައްޑޫ އެއާޕޯޓުގެ އިތުރުން 250 ރަށުގައި ފެނާއި ނަރުދަމާގެ މަސައްކަތް ހިންގަމުންދާ ކަމަށެވެ. 

ރައީސް ޞާލިހާއި މިނިސްޓަރު ޝާހިދު މިފަދައިން ވިދާޅުވެފައި ވީނަމަވެސް، ރާއްޖޭގައި މީހުން ދިރިއުޅެނީ 187 ރަށުގައެވެ.

އެހެންކަމުން، މިނިސްޓަރު ޝާހިދާއި، ރައީސް ޞާލިހުގެ އެ ތަފާސް ހިސާބުތަކަކީ ސައްހަ ހިސާބުތަކެއް ނޫނެވެ. އަދި އެ ހުރިހާ ރަށެއްގައި ފްލެޅު އެޅުމާއި، ފެނާއި ނަރުދަމާގެ މަސައްކަތްތައް ހިނގަމުން ނުދާކަން ފާހަގަކޮށްލެވެ އެވެ. 

އެކަންކަމަށް އިޝާރާތް ކުރައްވާ އަލީ ހުސެއިން ވިދާޅުވީ ރައީސުލްޖުމްހޫރިއްޔާ އާއި، އެމަނިކުފާނުގެ ވަޒީރު ބޭފުޅުންނަށް ދިވެހިރާއްޖޭގައި މީހުން ދިރިއުޅެނީ ކިތަށް ރަށުގައިކަން އެނގު ނުލެއްވުމަކީ ވަރަށް ލަދުވެތި ކަމެއް ކަމަށެވެ.