ޖުމްހޫރީ ޕާޓީގެ ލީޑަރު އަދި މާމިގިލި ދާއިރާގެ މެންބަރު ޤާސިމް އިބްރާހިމް، އަނދަޅަށް ވެއްޓެނީ ނޫން ކަމަށާ އެހެނެއް ކަމަކު، ކޮންމެ ފަހަރަކުވެސް އެމަނިކުފާނުގެ ބޭނުން ކެނޑުމުން އަނދަވަޅުގެ ތެރެއަށް ކޮއްޕާ ވައްޓާލަނީ ކަމަށް ވިދާޅުވެ ޖޭޕީގެ ޑެޕިއުޓީ ލީޑަރު އަހުމަދު ސައުދު ކޮމަންޑޫ ދާއިރާގެ މެންބަރު މުހައްމަދު ރާޝިދަށް ރައްދު ދެއްވައިފިއެވެ. 

ކުރިން ވެއްޓުނު އަނދަވަޅަށް ވެއްޓެން ރާޝިދު ވިދާޅުވުމާއި ގުޅިގެން އެކަމަށް ރައްދު ދެއްވައި ސައުދު ކުރެއްވި ޓްވީޓެއްގައި ވަނީ އެފަދައިން ވިދާޅުވެ ރާޝިދު ވާހަކަ ދައްކަވާފައި ވަނީ، ގާސިމް ރިޔާސީ ރޭހަށް ނުކުތުން ހުއްޓުވަން ކަމަށެވެ. އެހެންނަމަވެސް މިއަދު ދިވެހި ރައްޔިތުން ގޮވަނީ ގާސިމަށް ކަމަށްވެސް ސައުދު ވިދާޅުވި އެވެ. 

ސައުދު ވަނީ ޖޭޕީގެ ލީޑަރު ގާސިމް އަނދަވަޅަށް ވެއްޓެނީ ކަމަށް ވީދާޅުވުމަކީ ޖޯކެއް ގޮތަށް ސިފަ ކުރައްވައި، އެމަނިކުފާނަށް ސިޔާސީ މައިދާނުގައި ނުކުރާ އިތުރު ތަޖުރިބާ އެއް އޮތީތޯ ނުވަތަ، ނުލިބޭ އިތުރު އަނިޔާއެއް އޮތީތޯ ސުވާލު ކުރައްވާފައެވެ. 

Advertisement

ކުރިއަށް އޮތް ރިޔާސީ އިންތިހާބުގައި ގާސިމް ވާދަކުރައްވަފާނެކަމުގެ އަޑުތަކެއް ފެތުރިފައިވަނިކޮށް، މެމްބަރު ރާޝިދު ކުރެއްވި ޓްވީޓެއްގައި ވިދާޅުވީ ދިވެހިން ދުވަހަކު ނުދެކޭފަދަ އަނިޔާވެރި އަނދިރި ދުވަސްތަކަކުން މި ޤައުމު ސަލާމަތް ކޮށްދެއްވީ ރައީސް އިބްރާހިމް މުހައްމަދު ސާލިހުކަމަށެވެ. އަދި އެކަމުގައި ޤާސިމްގެ ދައުރު ވަރަށް ބޮޑުކަމަށް ރާޝިދު ވިދާޅުވިއެވެ.

ރާޝިދު ވިދާޅުވީ ރަނގަޅު ގޮތްތަކެއް ވާން އޮތީ ރައީސް ސާލިހަށް ދެވަނަ ދައުރެއް ދީގެންކަމަށެވެ. އަދި ކުރިން ވެއްޓުނު އަނދަވަޅަށް ދިވެހި ޤައުމު ވެއްޓޭން ޤާސިމް ބޭނުންފުޅު ނުވާނެކަމަށްވެސް ރާޝިދު ވިދާޅުވިއެވެ.

"ދިވެހިން ދުވަހަކު ނުދެކޭފަދަ އަނިޔާވެރި އަނދިރި ދުވަސްތަކަކުން މި ޤައުމު ސަލާމަތް ކޮށްދެއްވީ އިބޫ! މިކަމުގައި ޤާސިމްގެ ދައުރު ބޮޑު. ޤައުމަށް މޮޅެއް ހެވެއް އޮތީ އިބޫ އަށް 2 ވަނަ ދައުރެއް ދީގެން. ކުރިން ވެއްޓުނު އަނދަވަޅަށް ދިވެހި ޤައުމު ވެއްޓޭކަށް ޤާސިމް ބޭނުންފުޅެއްް ނުވާނެ." ރާޝިދު ވިދާޅުވިއެވެ.