ޕިކްނިކް ދިޔުމަށް ތަރައްގީ ކޮށްފައިވާ ކުޑަގިރީގައި ރޯދަމަހަށް މާހެފުމުއް ބޭއްވުމަށް ހަމަޖައްސާފިއެވެ.

މިދިޔަ މަހުގެ 11 ވަނަ ދުވަހު ހުޅުވުނު ކުޑަގިރިން މިއަދު ވަނީ މާހެފުމުގެ މެނޫ ދައްކާލާފައެވެ.

އެގޮތުން މި މެނޫގައި 16 ބާވަތެއް ހިމެނޭއިރު މީގެ ތެރޭގައި ކުޅި ފާރޮށި، މަސްކުރޮޅި، ވަޅޯމަސް، ކުޅިކާޖާ، ރޮށި، ކާށި، ފޮނި ފާރޮށި، މާފުށް، އަވެލި، ކަދުރު، ހަނޑޫގުޅަ، ކުޅީބޯކިބާ، ޕާން ބޯކިބާ، ކިރުސަރުބަތު، އައިސް ކޮފީ އަދި ސޫޖީ ހިމެނެއެވެ.

Advertisement

މިއާއިއެކު މި މާހެފުމުގައި ބައިވެރިވުމަށް ކޮންމެ ދަތުރުވެރިއަކުގެ އަތުން 165 ރުފިޔާ ނެގޭނެކަމަށް ކުޑަގިރިން ބުނެފައިވެއެވެ.

އިތުރު މައުލޫމާތު ހޯދުމަށް 3356454 އަށް ގުޅުމަށް ކުޑަގިރިއިން ވަނީ އެދިފައެވެ.

15 މިނެޓުން މާލެ ނުވަތަ ހުޅުމާލެއިން ފުރައިގެން ދެވޭ މި ރަށް ކުޑަގިރި އާންމުންނަށް ހުޅުވާލެވިގެންދިޔަ އިރު މި ރަށުގައި ތަފާތު އެކި ކަންކަން ކުރެވޭނެއެވެ.

އެގޮތުން އަސާސީ ކަންކަމުގެ އިތުރުން މި ރަށުގައި ޑައިވިން އަދި ވޯޓަރސްޕޯޓްސްގެ ގިނަ ހަރަކާތްތަކާއި ޤާއިމުކޮށްފައިވާ ކުޅިވަރުގެ ވަސީލަތްތަކުގެ ތެރޭގައި ވޮލީބޯޅަ ކޯޓު، ބާސްކެޓްބޯޅަ ކޯޓު، އައުޓްޑޯ މިނީ ފުޓްބޯޅަ ކޯޓު، ކުޑަކުދިންނަށް ހާއްސަކޮށްފައިވާ ޕްލޭގްރައުންޑް، ޑައިވް ސެންޓަރ އަދި ވޯޓަރ ސްޕޯޓްސް ސެންޓަރ ހިމެނެއެވެ.

މީގެ އިތުރުން ކުޑަގިރީގައި އާންމުން ބޭނުންކުރުމަށް ޑޭ ޔޫސް ރޫމްގެ ގޮތުގައި 12 ރޫމްގެ އިތުރުން 13 ކުޑަ އަށި އަދި 4 ބޮޑު އަށިވަނީ ގާއިމުކޮށްފައެވެ.