ކޮމަންވެލްތު ޤައުމުތަކުގެ ޚާރިޖީ ވަޒީރުންގެ ބައްދަލުވުމަކަށް ފޮރިން މިނިސްޓަރު އަބްދުالله ޝާހިދު އިނގިރޭސިވިލާތަށް ވަޑައިގެންފި އެވެ. 

އެ ދަތުރުފުޅާ ގުޅޭގޮތުން މިނިސްޓަރު ޝާހިދު ވިދާޅުވީ އެމަނިކުފާނުގެ އެ ދަތުރުފުޅުގައި ކޮމަންވެލްތު ޤައުމުތަކުގެ މެދުގައި ކުރިއަށްގެންދަން ހަމަޖެހިފައިވާ މުހިންމު މަޝްވަރާތަކެއްގައި ބައިވެރިވެވަޑައިގަންނަވާނެ ކަމަށެވެ. 

ކޮމަންވެލްތު ޤައުމުތަކުގެ ފޮރިން މިނިސްޓަރުންގެ ބައްދަލުވުމުގައި ބައިވެރިވެވަޑައިގަތުމުގެ އިތުރުން އިނގިރޭސި ސަރުކާރުގެ އިސްބޭފުޅުންނާ ބައްދަލުކުރައްވައި ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމާގުޅޭގޮތުން މަޝްވަރާ ކުރައްވާނެކަމަށް މިނިސްޓަރު ޝާހިދު ވަނީ ވިދާޅުވެފަ އެވެ. 

Advertisement

މިނިސްޓަރު ޝާހިދު އިނގިރޭސި ވިލާތަށް ވަޑައިގަތީ ޖަރުމަނުގައި ހުންނަވާފައެވެ. އެމަނިކުފާނު ޖަރުމަނަށް ވަޑައިގަތީ އެޤައުމުގެ ވެރިރަށް ބާލިންގައި ކުރިއަށްދާ އައިޓީބީއަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ އަރިހުގައެވެ. 

އޭގެކުރިން ޤަޠަރުގެ ވެރިރަށް ދޯހާގައި ކުރިޔަށްދިޔަ އދ.ގެ އެންމެ ކުޑަކޮށް ތަރައްޤީވެފައިވާ ޤައުމުތަކުގެ 5 ވަނަ ކޮންފަރެންސްގައި ބައިވެރިވެވަޑައިގަތުމަށް ރައީސްގެ އަރިހުގައި އެޤައުމަށް ވެސް މިނިސްޓަރު ޝާހިދު ވަޑައިގަތެވެ.