ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީގެ ފަރާތުން އެ ޕާޓީގެ ލީޑަރު ގާސިމް އިބްރާހިމް ވާދަކުރައްވަން ނިންމައިފި އެވެ. 

ޖުމްހޫރީ ޕާޓީން ރިޔާސީ ރޭހަށް ނުކުންނަކަން އެޕާޓީން ނިންމާފައިވަނީ، މިއަދު އޮތް ޕާޓީގެ 151 ވަނަ ކައުންސިލް ބައްދަލުވުމުގައެވެ. އެގޮތުން އެ ޕާޓީން ނިންމާފައި ވަނީ ކުރިއަށް އޮތް ރިޔާސީ އިންތިޚާބުގައި، އެ ޕާޓީ އިސްވެ އޮވެ އުފައްދާ ކޯލިޝަނެއްގެ ތެރެއިން ވާދަކުރުމަށެވެ. 

އެ ނިންމުން ފާސްކޮށްފައިވަނީ އެޕާޓީގެ ކައުންސިލްގެ އިއްތިފާގުންނެވެ.

Advertisement

އެ ނިންމުމަށްފަހު ވާހަކަ ދައްކަވަމުން ޤާސިމް ވިދާޅުވީ ރިޔާސީ އިންތިޚާބަށް ނިކުންނަން ނިމުމަކީ މިހާރު އޮތް ސަރުކާރު ކޯލިޝަނުން ވަކިވާން ޖެހޭ ސަބަބެއް ނޫންކަމަށެވެ. އަދި ވަޒީފާތަކުގައި ތިއްބެވި ބޭފުޅުންވެސް މިއަހަރު ނޮވެމްބަރު 11 އާއި ހަމައަށް ތިއްބަވާނެކަމަށެވެ.

"އަޅުގަނޑުމެންނަކީ ސަރުކާރު ކޯލިޝަންގައި އޮތްބައެއް. ފަސް އަހަރު ނިމެންދެން މިއަހަރު ނޮވެމްބަރު 11 ވަނަ ދުވަހާއި ހަމައަށް އަޅުގަނޑުމެން ކުރިއަށްދާނެ. ވަޒީފާތަކުގައި ތިއްބެވި ބޭފުޅުންވެސް ދެން ކުރިއަށްދާނެ އެދުވަހާއި ހަމައަށް. އަޅުގަނޑު ދަންނަވާލަން ބޭނުމީ އެއީ އެއްބަސްވުމުގައި އޮތްގޮތޭ." ޤާސިމް ވިދާޅުވިއެވެ.

މީގެ އިތުރުން ޤާސިމް ވިދާޅުވީ ޖުމްހޫރީ ޕާޓީން ކެނޑިޑޭޓަކު ނެރުމަކީ ކޯލިޝަން ރޫޅޭނެ ކަމެއް ނޫންކަމަށާ، އެކަން ވަރަށް ސާފުކޮށް އެއްބަސްވުމުގައި އެނގެން އޮތް ކަމަށެވެ. 

"އަޅުގަނޑުމެންގެ އެއްބަސްވުން އޮތް ގޮތުން 2023 އަށް ކެނޑިޑޭޓަކު ނެރުމަކީ އަޅުގަނޑުމެން އޭގައިން ބަރީއަވާ ކަމެއްނޫން. އެއީ ވަރަށް ސާފު ސަރީހަ އިބާރާތުން އޮތްގޮތް." ގާސިމް ވިދާޅުވި އެވެ. 

ގާސިމް މިފަދައިން ވިދާޅުވި ނަމަވެސް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ ރިޔާސީ އިންތިހާބުގައި ކޯލިޝަން ގައި ހިމެނޭ ޕާޓީ އަކުން ވަކިން ވާދަކުރާނަމަ ކޯލިޝަނުން ވަކިވާން ޖެހޭނެ ކަމަށް ވިދާޅުވެފައެވެ. އަދި ރައީސް ޞާލިހަށް ތާއީދު ކުރައްވާ މެމްބަރުންވެސް އަންނަނީ އެފަދައިން ވިދާޅުވަމުންނެވެ.