އެމްޑީޕީގެ ރައީސް މުޙައްމަދު ނަޝީދު ޕާޓީގެ ތެރެއިން އުފައްދާފައިވާ ފިކުރެއްގެ ދިރުމާއި ޖުމްހޫރީ ޕާޓީ ގުޅިގެން ޖޮއިންޓު ޕާލަމެންޓްރީ ގުރޫޕެއް އުފެއްދުމަށް މަޝްވަރާތައް ފައްޓާނެކަމަށް ފިކުރެއްގެ ދިރުމުގެ ޕީޖީގައި ހިމެނިވަޑައިގަންނަވާ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެ އެވެ.

އާޒިމް މިފަދައިން ވިދާޅުވެފައިވަނީ ފިކުރެއްގެ ދިރުން ޕާލަމެންޓްރީ ގުރޫޕުން ރޭ ބޭއްވި ބައްދަލުވުމެއްގައި ވާހަކަދައްކަވަމުން ނެވެ. 

އެ ބައްދަލުވުމުގައި ވާހަކަދައްކަވަމުން މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު ވަނީ ސަރުކާރު ޖަވާބުދާރީ ކުރުމަށް މަޖިލީހުގައި އޮތް ހުރަސްތަކަށް އަލިއަޅުވާލައްވާފަ އެވެ.

Advertisement

އެގޮތުން މިއަދު މަޖިލީހުގައި ސަރުކާރު ތަމްސީލު ކުރާ ގިނަ މެމްބަރުންތަކެއް ތިބުމުގެ ސަބަބުން އެންމެ އެކަށީގެންވާ ގޮތެއްގައި މަޖިލީހުގައި މެމްބަރުން އަދާކުރަން ޖެހޭ ދައުރަށް ހުރަސް އެޅޭކަން އޭނާ ފާހަގަކުރެއްވި އެވެ. 

ވަހީދުގެ އިތުރުން ފިކުރެއްގެ ދިރުމުގެ ޕީޖީ ލީޑަރު އަލީ އާޒިމް ވިދާޅުވީ ކުރިއަށް އޮތް ތަނުގައި މަޖިލީހުގައި ކުރެވޭ މަސައްކަތް ހަރުދަނާ ކުރުމަށް ޖުމްހޫރީ ޕާޓީއާއެކު ޖޮއިންޓު ޕާލަމަންޓްރީ ގުރޫޕެއް އެކުލަވާލުމުގެ މަސައްކަތް ވީހާވެސް އަވަހަކަށް ފައްޓަވާނެ ކަމަށެވެ. 

ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމް ވާދަކުރައްވާނެކަން ރަސްމީކޮށް އިއުލާނު ކުރުުމާއި ގުޅިގެން ނަޝީދުގެ ފިކުރެއްގެ ދިރުން ގޮފިން ވަނީ ޤާސިމާއި ޖުމްހޫރީ ޕާޓީއަށް މަރުހަބާ ދަންނަވާފަ އެވެ. 

ޤާސިމްގެ އެ ނިންމެވުމާއެކު އެމްޑީޕީއަށް ދެން ވެރިކަން ހޯދިދާނެކަމަށް ޤަބޫލު ނުކުރައްވާކަމަށް ފިކުރެއްގެ ދިރުން ޕީޖީގައި ހިމެނިވަޑައިގަންނަވާ އީވާ އަބްދުالله ވަނީ ވިދާޅުވެފަ އެވެ. 

އެކަން ފާހަގަކުރައްވާ އާޒިމް ރޭ ވިދާޅުވީ، ދެން އުފެދޭ ސަރުކާރެއްގައި މިހާރަށްވުރެ އެމްޑީޕީގެ ހިއްސާ ބޮޑުވާނެ ކަމަށެވެ. 

އެހެންކަމުން އަންނަ ރިޔާސީ އިންތިޚާބުގައި އެމްޑީޕީގެ ފިކުރެއްގެ ދިރުން ގޮފިން ޤާސިމަށް ތާއީދުކުރަން ނިންމާ، ޤާސިމްގެ ފަހަތްޕުޅަށް އަރާވަޑައިގަތުން ގާތެވެ.